Oliver Hildenbrand

Dialäkt: Undermarkgreflerisch

dr Oliver Hildenbrand, 2015

Dr Oliver Hildenbrand (* 10. Februar 1988 z Wertheim) isch e dytsche Bolitiker (Bindnis 90/Di Griene). Vu 2013 bis 2021 isch er Landesvorsitzer vum bade-wirttebärgische Landesverband vu syre Bartei gsii. Syt 2021 isch er Abgornete im Landdag vu Bade-Wirttebärg.

Härchumft un Uusbildig

Dr Hildenbrand isch z Freudenberg-Wessental ufgwachsen un het s Abitur am Dietrich-Bonhoeffer-Gimnasium z Wertheim gmacht. Noch eme Freiwillige soziale Johr am Zäntrum fir Psichiatry Ämmedinge het er an dr Universitete Bamberg un Bonn Psichology studiert.

Bolitik

Dr Oliver Hildenbrand isch syt Dezämber 2004 Mitglid vu Bindnis 90/Di Griene un dr Griene Juged. Är het si Jänner 2005 bi dr Wertheimer Griene im Ortsvorstand engaschiert, wun er bis Merz 2008 Mitglid dervu gsii isch. Bi dr Landdagswahl 2006 z Bade-Wirttebärg het er im Wahlchrais Main-Tauber as landeswyt jingschte Kandidat fir dr Landtag kandidiert. Zwische Septämber 2006 un Novämber 2010 isch er Mitglid im Chraisvorstand vu Bindnis 90/Di Griene Main-Tauber gsii.

Im Mai 2007 isch dr Oliver Hildenbrand zum Landessprächer vu dr Griene Juged Bade-Wirttebärg gwehlt wore. Är het in däm Amt mit syre erfolgryche Widerwahl anne 2009 insgsamt vier Johr lang d Positionen un Inträsse vum Jugedverband in Bartei un Effetligkait verdrätte.

Ab Merz 2010 isch er Mitglid vu dr Programmkommission vu Bindnis 90/Di Griene Bade-Wirttebärg zue dr Landdagswahl 2011 gsii. Noch em Wahlerfolg isch er uf dr griene Syte bi dr Koalitionsverhandlige zue der Bildig vu dr erschte grien-rote Landesregierig derby gsii.

Im Oktober 2011 isch dr Oliver Hildenbrand in Landesvorstand vu dr bade-wirttebärgische Griene gwehlt wore. Syt Novämber 2013 isch er ain vu dr zwai Landesvorsitzer vu Bindnis 90/Di Griene Bade-Wirttebärg gsii, zerscht mit dr Thekla Walker, speter zäme mit dr Sandra Detzer.

2016 isch er Mitglid vu dr griene Verhandligsdelegation fir d Kolaitionsverhandlige mit dr CDU gsii, wu zue dr Bidlig vu dr erschte grien-schwarze Landesregierig gfiert het.

Bi dr Landdagswahl 2021 isch er im Wahlkrais Stuagert III aadrätte un het mit 33,9 % vu dr Stimme s Diräktmandat gwunne. In dr Griene-Landdagsfraktion isch er zum stellverdrättende Fraktionsvorsitzer un zum Spräche fir Innebolitik gwehlt wore.

Weblink

• Offiziälli Websyte vum Oliver Hildenbrand
• »Auch junge Leute müssen mitreden«, Intervieww mit em Oliver Hildenbrand im Main-Echo, 11. Oktober 2015

Fueßnote

Dä Artikel basiert uff ere fräie Übersetzig vu dere Version vum Artikel „Oliver_Hildenbrand“ vu de dütsche Wikipedia. E Liste vu de Autore un Versione isch do z finde.