Oberrhykonferenz

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
S'Mandatsgebiet vo dr D-F-CH Oberrhykonferenz

D' Oberrhykonferenz (preziser: Dütsch-französisch-schwizerischi Oberrhykonferenz) bildet dr inschtitutionelli Rahme vo dr gränzüberschritende Zämmearbet im Oberrhygebiet uf regionaler und regionalstaatlicher Ebeni. Es goht dorum, gränzüberschritendi Frogestellige ufzugriffe, z'bearbeite und ere Lösig zuezfüehre zum Wohl vo de Bevölkerig uf beidne Site vom Rhy.

Iizugsberich[ändere | Quälltäxt bearbeite]

Dr Wirkigsperimeter vo dr Oberrhykonferenz isch naturrümlich begränzt durch d Vogese, dr Schwarzwald und dr Schwizer Jura und umfasst folgendi Teilrüüm: Bade und d Südpfalz in Dütschland, s Elsass uf französischer Site sowie d Nordweschtschwiz.

Ufbau und Organisation[ändere | Quälltäxt bearbeite]

Die gränzüberschritendi Zämmearbet im Rahme vo dr Oberryhkonferenz isch pyramideförmig ufbaut und kennt folgendi Gremie:

  • Die Dütsch-französisch-schwizerischi Regierigskommission bildet s'Dach uf nationaler Ebeni und verbindet d'Regierige vo de drei Länder Dütschland, Frankrich und dr Schwiz über ihri jewilige Usseminischterie. Sie chunt öppe alli zwei Johr zu Sitzige zämme.
  • Die Dütsch-französisch-schwizerischi Oberrhykonferenz verbindet d'Regierigs- und Verwaltigsbehörde uf regionaler Ebeni und isch vo de Regierigskonferenz iigsetzt. Beteiligt sind d'Fachverwaltige vo de Bundesländer Bade-Württebärg und Rhyland-Pfalz, vo de Kantön Basel-Stadt, Baselland, Aargau, Jura und Solothurn sowie die staatliche und gebietskörperschaftliche Behörde in dr Region Elsass.
  • S'Präsidium isch s'Haupt-Beschlussgremium und glichzitig Impulsgäber und Koordinator vo dr Oberrhykonferenz und chunnt zwei- bis dreimol im Johr zu Sitzige zämme. Es setzt sich us ere dütsche, französische und schwizerische Delegation mit jewils eim Delegationsleiter zämme. D'Delegationsleiter übernähme abwächselnd de Vorsitz vo dr Oberrhykonferenz für jewils ei Kalenderjohr. Die andere Delegationsleiter sind jewils Vizepresidänte. D'Ufgob vom Präsident isch es - mit Unterstützig vom Gmeinsame Sekretariat - d'Sitzige vorzbereite, die ständigi Begleitig vo de Arbetsgruppe z'gwährleischte und d'Oberrhykonferenz gege usse z'verträte. D'Delegationsleiter sind in Frankrich dr Prefäkt vo dr Region Elsass, in Dütschland dr Regierigspräsident vo Fryburg oder Karlsruh oder dr zueständigi Verträter vom Bundesland Rhyland-Pfalz und in dr Schwiz ä Regierigsroot us em Kanton Basel-Stadt oder us em Kanton Basel-Landschaft.
  • S'Plenum vo dr Oberrhykonferenz tagt eimol pro Johr. Es het d'Funktion vonere öffentliche Plattform für die gränzüberschritendi Zämmearbet am Oberrhy. Am Johresplenum wärde aktuelli Projäkt vorgstellt, Schwerpunkttheme behandlet und die vom Präsidium vorgstellte Entwickligsziel, Strategie und Arbeitsprogramm vo de Konferenz feschtgleit. Glich wie im Präsidium gits au drei Delegatione mit de gliche Delegationsleiter, wo die us höchstens 25 Mitglieder bestehendi Delegation bestimme.
  • Arbetsgruppe und Expärteusschüss: D'Oberrhykonferenz het zue dene vo ihre behandlete Theme trinational bsetzti ständigi Arbetsgruppe igsetzt. D'Verwaltige und zum Teil witeri Partner stelle ihri Fachlüt zur Verfüegig, um i däm Rahme einersits Problem ivernähmlich z'diskutiere und em Präsidium Lösigsvorschläg z'unterbreite, andersits Projäkt z'plane und Bschlüss vo dr Konferenz umzsetze. Zur Umsetzig vo dr Arbet vo dene rund 600 Fachlüt wärde Expärteusschüss iigrichtet, bsunders zur Durchfüehrig vo konkrete Projäkt oder zur Bearbeitig vo spezielle Themeberiich. Momentan schaffe rund 35 Expärteusschüss für die 12 Arbetsgruppe: - Erziehig und Bildig - Gsundheit - Jugend - Katastrophehilf - Kultur - Ruumordnig - Umwelt - Verkehr - Wirtschaft - Klima und Energie - Sport - Landwirtschaft.
  • S' Gmeinsame Sekretariat z'Kehl am Rhy in der Nöchi vo Stroosburg isch mit dr Koordination zwüsche Arbetsgruppe, Expärteusschüss und de Bschlussgremie vo de Konferenz beuftrait. Es gwährleistet zuedem d'Organisation vo de Plenar- und Präsidiumssitzige vo dr Oberrhykonferenz, schribt Bricht, unterhaltet regelmässig Kontäkt mit witere grenzüberschritende Akteure am Oberrhy und leischtet Öffentlichkeitsarbet. Im Gmeinsame Sekretariat isch jedi Delegation mit eme ständige Abgesandte verträte. Die drei Delegationssekretär wärde bi ihrer Arbet vonere Assistentin untersützt.

Gschichtlichs[ändere | Quälltäxt bearbeite]

D'Aafäng vo dr gränzüberschritende Zämmearbet am Oberrhy gön zrugg uf d'Zyt nach em 2. Wältchrieg. Näbe de informelle Kontäkt sind als erschti Etappe dr Bau vom binationale Flughafe Basel-Mülhuse und d'Iisetzig vonere gmeinsame Verwaltig vom Kehler Hafe vo Bedütig. Als Ergäbnis vo dr intensivere Beziehig zwüsche de Gebietskörperschafte sind die 1963 bzw. 1965 gründete Verein Regio Basiliensis und Regio du Haut-Rhin z'gseh. Die Zämmearbet bechunt bi dr Unterzeichnig vonere Regierigsveriibarig 1975 (Bonner Abkomme) zwüsche Dütschland, Frankriich und dr Schwiz ä inschtitutionelle Rahme, wo mr d'Iisetzig vonere Dütsch-französisch-schwizerische Regierigskommission bschliesst. Die vo dr Kommission drby iigsetzte zwei Regionalusschüss im Norde und Süde wärde 1991 zur Oberrhykonferenz zämmegleit. Als witeri Etappe gälte d'Schaffig vom Gmeinsame Sekretariat in Kehl 1996, d'Unterzeichnig vonere 2. Regierigsveriibarig 2000 (Basler Veriibarig) als staatsvertraglichi Bestätigung vom iigschlagene Wäg und Gründig vo dr Trinationale Metropolregion Oberrhy (TMO) am 9. Dezember 2010 uf Initiative vo dr Oberrhykonferenz. Durchs Konzäpt von dr TMO wärde d'Verträter us Politik, Verwaltig, Wirtschaft und d'Bürger zämmebrocht, um gmeinsam und uf Augehöchi dr Oberrhy zumä dynamische Wirtschafts-, Wüsseschafts- und Lebensruum in Europa z'entwickle.

Projäkt[ändere | Quälltäxt bearbeite]

Dä rund 50 Arbetsgremie vo dr Oberrhykonferenz sind zahlriichi Projäkt entsprunge. Sie hälfe mit, dass Gränze abbaut und dr Oberrhy als gmeinsame Läbensruum wohrgnoh wird. Bischpiel sind dr Oberrhynischi Museumspass, s'Forum Junior, dr Oberrhynischi Lehrertag, s'Euregio-Zertifikat, d'Internetplattform Luftqualität am Oberrhy, d'Statistikbroschüre Oberrhy,... Als Impulsgäber für Projäkt am Oberrhy chönne zuedem die ungfähr alli zwei Johr duregführte Dreiländerkongräss aagluet wärde. Dr letschti Dreiländerkongräss het am 27. Juni 2012 unter em Motto "Rendez-vous régional - Zivilgesellschaft im Dialog mit..." z'Landau in dr Pfalz stattgfunde. Vieli Projäkt sind schliesslich nur dank dr Kofinanzierig us dr Schwiz und em INTERREG-Programm vo dr Europäische Union z'Stand cho.

RegioTriRhena[ändere | Quälltäxt bearbeite]

Ùnderm Dach vù dr Oberryykonferränz hän 1995 d Verain Regio Basiliensis, Regio du Haut-Rhin ùn d RegioGesellschaft Schwarzwald-Oberrhein dr RegioTriRhena-Rat grinded. D RegioTriRhena isch e Europaregion, wù iber d Ländergränze wäg d Zämeaarbed in dr Wirdschafd, in dr Kultur ùn in dr Gselschafd sol verbesere.

Weblinks[ändere | Quälltäxt bearbeite]