Regio Basiliensis

D Regio Basiliensis isch ä Verein mit Sitz in Basel. Si isch d Schwizer Partneri für d Oberrhy-Kooperation und Kompetenzzentrum erschter Wahl zur Förderig vo dr grenzüberschritende Zämmenarbet am Oberrhy. Si stoht drby im Dienscht vo dr Politik, vo Behörde, dr Wirtschaft, dr Wüsseschaft, vo Organisatione und dr Bevölkerig. Ihre Zweck isch es, vo schwizerischer Site Impuls für d Entwicklig vom oberrhynische Ruum zun äre zämmeghörige europäische Gränzregion zgäh und bi de Realisierig mitzwürke. Als Ussestell vo de Kantön Aargau, Basel-Landschaft, Basel-Stadt, Jura und Soledurn koordiniert und vertritt si d Interesse vo dr Nordweschtschwiz in dr grenzüberschritende Zämmenarbet.

Gschichtlichs

Dr Verein isch 1963 vo Verträter us Wirtschaft und Wüsseschaft gründet worde. Als Ziil feschtghalte sind „d Planig und Förderig vo dr wirtschaftliche, politische und kulturelle Entwicklig“ vom Gebiet und dr „Abbau vo Grenzhemmniss zwüsche de verschidene Teilgebiet (vo de Region), sowit si e wirtschaftliche und sozialpsychologische Faktor“ darstelle.

1969 isch dr Staatsvertrag zwüsche de Kantön Basel-Stadt und Basel-Landschaft unterzeichnet worde, was d Gründig vo dr IKRB, dr Interkantonale Koordinationsstelle bi dr Regio Basiliensis betroffe het, wo an Verein Regio Basiliensis aaglidert isch. Sit däm erfüllt dr Verein näbe de Vereinsaktivitäte Ufgobe im Rahme vode kline Ussepolitik vo de beide Kantön. Sit 1996 gilt das ebefalls für de Kanton Aargau und sit 2003 für d Kantön Jura und Solothurn.

In de erschte Johrzehnt isch d RB vor allem Impulsgeberi gsi. Bereits in de 1970er Joor isch d Idee von äre grenzüberschritende Regio-S-Bahn lanciert worde. En eigentliche Schub het die grenzüberschritendi Zämmenarbet mit em EU-Förderprogramm Interreg ab 1990 erfahre.

Höt wird dr Verein, näbe de Kantön und de Eidgenosseschaft vo rond 250 Einzel- und Jugendmitglider sowie rond 150 Kollektivmitglider treit.

Ufgobe

Dr Vereinszweck gemäss Statute isch es, „von schweizerischer Seite Impulse für die Entwicklung des oberrheinischen Raumes zu einer zusammengehörigen europäischen Grenzregion zu geben und bei deren Realisierung mitzuwirken“. Sit ihrer Gründig im Jahr 1963 prägt d Regio Basiliensis die regionali Kooperation am Oberrhy entscheidend met und het zu de meiste trinationale Errongeschafte am Oberrhy en wesentliche Bitrag gleischtet.

Schwizer Beteiligung an Kooperationsgremie: IKRB

Dr Verein erfüllt syt 1970 als Ussestell vo de Kantön Basel-Stadt und Basel-Landschaft au staatlechi Funktione im Sinn vo dr chliine Ussepolitik. Sit 1996 gilt das ebenfalls für de Kanton Aargau und sit 2003 für d Kantön Solothurn und Jura. S Würkigsgebiet vo dr Regio Basiliensis längt drby vo dr Nordwestschwiz bis in d Südpfalz, und umfasst so die grenzüberschritendi Region Oberrhy mit rund 6 Mio. Iiwohner. Partner sind die staatliche Instanze wie au die öffentlich-rächtliche Körperschafte. Mit dr Interkantonale Koordinationsstell (IKRB) erfüllt d Regio Basiliensis vier Fünftel vo ihrne Ufgobe. Drzue ghöre d Schwizer Koordination vo Interreg Oberrhy wie au diversi Kooperationsgfäss (die Trinationali Metropolregion Oberrhy TMO, die Dütsch-französisch-schwizerischi Oberrhykonferenz ORK, dr Trinational Eurodistrict Basel TEB, d INFOBEST Palmrain). Generell stellt d Strategii vo dr Nordweschtschwizer Regierigskonferenz (NWRK) dr massgäbendi Rahme für die inhaltlechi Ziilsetzig vo dr IKRB dar.

Europäischi territoriali Zämmenarbet (Interreg) und Neui Regionalpolitik

Im Rahme vo dr Europäische territoriale Zämmenarbet (EtZ) vo dr Europäische Union (EU) und dr Neue Regionalpolitik vo dr Schwizerische Eidgenosseschaft fungiert d Regio Basiliensis/IKRB als regionali Koordinationsstell vo dä Nordweschtschwizer Kantön und vom Bund.

Die hochi Bedütig vo de Interreg- bzw. EtZ-Programm für d Förderig vo dr grenzüberschritende und europäische Zämmenarbet hän d Kantön Aargau, Basel-Landschaft, Basel-Stadt, Jura und Solothurn früe erkannt: si beteilige sich sit 1990 an de hiesige Programm. In dr aktuelle sächste Förderperiode 2021–2027 beteilige sich d Nordweschtschwizer Kantön an sächs EtZ-Programm:

• Interreg VIA Oberrhein
• Interreg VIB Nordwesteuropa
• INTERREG VIB Alpenraum
• Interreg VI Europe
• URBACT
• ESPON Ruumplanig

Für d Nordweschtschwiz stellt s Programm Interreg Oberrhy jedoch s wichtigschte Programm dar: Bis jetzt (Stand Dezember 2023) sind sit 1990 am Oberrhy über 233 Kooperationsprojäkt mit Nordweschtschwizer Beteiligung realisiert worde. Im Zytruum vo 1995 (Interreg II) bis 2023 (Interreg VI) hän für grenzüberschritendi und europäischi Kooperationsprojäkt Bundesmittel in der Höchi von rund 29.95 Mio. Schwizer Franke in der Nordweschtschwiz chönne iigsetzt wärde. Si umfasse ä grossi Vielfalt vo Beriich: vo Ruumentwicklig und Verkehr über Wirtschaft und Bildig zu Jugend und Kultur. D Projekt vo dr aktuelle Förderperiode sind in dr Projektdatebank uff dr Websyte vo dr Regio Basiliensis iisehbar. Dass sich dr Bund syt 1995 an de Interreg- bzw. EtZ-Programm beteiligt und in dem Rahme Kooperationsprojäkt unterstützt, isch massgäblich uff d Initiative vo dr Regio Basiliensis/IKRB zruggzfüere. Sit 2008 erfolgt d Bundesbeteiligung im Rahmen vo dr Neue Regionalpolitik (NRP). Ziil vo dr NRP isch d Stärkig vo Innovation, Unternähmertum, Wärtschöpfig und dr Wettbewärbsfähigkeit vo de Regione. Do drmit unterstützt dr Bund usschliesslich gränzüberschritendi Projäkt, wo zu de Ziil vo dr NRP biitrage.

Information, Promotion, Lobbying

Dr Verein isch:

• Bürgerplattform: Si füert Informations-, Promotions- und Lobbyingmassnahme zur grenzüberschritende Zämmenarbet im Interesse vo de Bevölkerig dure (Schwerpünkt Wirtschaft, Verkehr, Bildig und Forschig, Umwelt).
• Europaplattform: Si informiert die breiti Bevölkerig und interessierti Chreis zum Verhältnis Schwiz-Europa und d Uswürkige uf d Nordweschtschwiz und d Oberrhy-Region.
• Dienschtleischtigsplattform: Si ermöglicht wyte Chreis us Wirtschaft, Wüsseschaft und Zivilgsellschaft de Zuegang zu grenzüberschritende Dienschtleischtige und Förderprogramm und bietet zu aagehendä Kooperationsprojäkt Berotige aa.
• Via Mitglidschaft und aktiver Metwörkig bi dr Arbeitsgmeinschaft vo Europäische Grenzregione (AGEG) sowie be anderne europäische Regionalorganisatione esch d Regio Basiliensis zuedem au uf europäischer Ebeni a zahlriche Vorstöss zör Stärkig vo de Regione vo Europa und vo de grenzöberschritende Zämmenarbet beteiligt

Ufbau

Dr Verein und die staatlechi Koordinationsstell bilde zäme ei betriiblechi Einheit mit insgesamt 500 Stelleprozänt. S jöhrlechi Gsamtbudget betreit derzyt 1.5 Mio. Schwizer Franke (2024). D Regio Basiliensis isch ä Verein nach Schwizer Zivilgsetzbuech, wo hütt vo rond 250 Einzel- und Jugendmitglieder sowie rond 150 Kollektivmitglider träit wird. D Vereinsorgan Generalversammlig, Vorschtand und Begleitgruppe stelle zentrali Stüürigsinschtrument für de Verein und d Oberrhy-Kooperation dar. Dr Vorstand als oberschts gschäftsführends Organ vertritt d Regio Basiliensis nach usse und setzt sich us Verträter vo de Wirtschaft, Wüsseschaft und Politik zämme. Die konsultativ tätigi Begleitgruppe setzt sich us Verträter vo dr Politik, Verwaltig, Wirtschaft, Wüsseschaft und Zivilgesellschaft us dr Nordweschtschwiz zämme und bringt über ihre/i Vorsitzende/-i Aaträg in Vorstand ii. Dr Verein isch zuedäm Aaschtelligskörperschaft für d Schwizer Mitarbeiter in de „Ussestelle“ im ORK-Sekretariat in Kehl (D) und bi dr INFOBEST Palmrain in Neidorf (Village-Neuf, F), wo vo de Vertragskantön mitträit wärde.

Die Interkantonali Koordinationsstell bi dr Regio Basiliensis (IKRB) isch in d Nordweschtschwizer Regierigskonferenz (NWRK) und ihri Strukture iibunde.

Weblink

• Offizielli Websyte

Einzelnochwiis

Dä Artikel basiert uff ere fräie Übersetzig vu dere Version vum Artikel „Regio_Basiliensis“ vu de dütsche Wikipedia. E Liste vu de Autore un Versione isch do z finde.