Nestor

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
De Nestor opferet am Strand vo Pylos zäme mit sinene Söö em Poseidon. Attisch-rootfiguriige Chelch vom Meleager-Mooller]; um 400–380 v. Chr.

De Nestor (altgriechΝέστωρ) isch i de griechische Mythologii de König vo Pylos und e Held, wo i de Ilias vom Homer e wichtigi Rolle iinint. Er isch en erfaarene waise Grais, wo no recht guet bi Chräften isch. En Abschnitt vo dem Heldenepos werd vo de Homerforschig Nestoris gnennt.

De Nestor isch de Soo vom Neleus und vo de Chloris. Er hett as anzige Soo de Aagriff vom Herakles öberlebt, wo im Champf all sini Brüedere töödt hett. De Nestor isch doozmool z Gerenia gsi, drum trait er de Name Gerenios oder Gerenische Grais. As junge Maa hett er gege de Wile vo sim Vatter im Chrieg gege d Eleer mitchämpft und isch siigriich mit vill Büüti zruggchert. Er het o gege d Molione und gege d Kentaure gchämpft.

De Nestor isch noch sim Vatter König vo Pylos wore, s isch aber scho i de Antiki umstritte gsii, weles Pylos as gmaint isch. De Pindar isch de erst gsi, wo de Nestor mit Messenie verbunde hett, indem er en "Messenische Grais" nennt.[1] De Nestor isch zimmli aalt gsii, woner in Troianische Chrieg zoge isch mitere Flotte vo 90 Schiff. Debii hend en zwee Söö, de Thrasymedes und Antilochos biglaitet.

As Grais hett er nöd a de Chempf tailgnoo und hett, wen er sich doch nöd het chöne zrugghalte jedesmool vo sinene Söö usem Champf müese grettet were und de Antilochos isch debii sogeer umchoo. As erfaarene Wagechämpfer het de d Raie vo de Striitwäge gornnet. Er isch e redseelige Grais gsii, wo gern öber sini jugedliche Heldetaate verzellt het. Er hett d Grieche biroote und bi de Striiteraie under de Grieche vermittlet. Sini Reede zaiget e gwössi Altersmildi im Gegesatz zo dene vom Odysseus wo uf Herti pocht hend. De Nestor und si Soo Thrasymedes hend zo de ganz wenige ghört, wo nochem Troianische Chrieg hail haichoo sind. De Nestor hett d Tootebai vom Machaon vo Troia mitgnoo und z Gerenia bistattet.

De Nestor hett nochene fridlich z Pylos wittergherrscht und er isch vom Telemachos bsuecht wore, wo de siin Vatter Odysseus gsuecht hett. D Odyssee git e guete Iidrugg, wie de Nestor und sini Famili glebt hend.

Verhüürootet isch de Nestor mit de Eurydike oder de Anaxibia gsii und hett sibe Buebe und zwoo Maitle ghaa. De ältist Sii isch de Antilochos gsii, wo vor Troia gfallen isch, de jüngsti isch de Peisistratos gsii. Di andere hend Thrasymedes, Perseus, Stratichos oder Stratios, Aretos und Echephron ghaisse.[2]. Sini Töchtere sind Peisidike und Polykaste, wo de Telemachos ghüüroote hett, gsii.

Wo de Pausanias im 2. Joorhundert n. Chr. d Stadt Pylos bim Vorpirg Koryphasion uufgsuecht hett, hend em d Lütt dai s Graab und s Huus vom Nestor zaiget und o d Hööli wo sini Chüe gwonnt hend.[3]

Anzelnoowiis[ändere | Quälltäxt bearbeite]

  1. Pindar: Pythischi Ode 6.35
  2. Bibliotheke des Apollodor 1, 9, 9.
  3. Pausanias 4.36.2

Literatur[ändere | Quälltäxt bearbeite]

  • Edzard Visser: Nestor. In: Der Neue Pauly (DNP). Band 8, Metzler, Stuttgart 2000, ISBN 3-476-01478-9, Sp. 861–864.