Moianacht

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Filmdate
Orginaltitel: Moianacht
Produktionsland: Deitschland
Erschinigsjoor: 2000
Längi (PAL-DVD): 20 Minute
Orginalsprooch: Schwäbisch
Altersfreigaab: FSK 6
Stab
Regie: Stefan Hering
Dräibuech: Stefan Hering
Produktion: Patrick Skerlec
Rafael Riss
Musig: Chris Weller
NTS
Kamera: Stefan Karle
Schnitt: Katja Hahn
Bsetzig
  • dr Tillbert Strahl-Schäfer als Micha
  • d Friederike Kempter als Ina
  • dr Christof Arnold als Richie
  • dr Sebastian Vogel als Tommy
  • dr Michael Lehnert als Benny
  • d Maylin Hausch als Julia
Dialäkt: Schwäbisch

Moianacht ischt a deitscha Filmkomeede (Kurzfilm) us-em Jôhr 2000 vom Regisseur Stefan Hering. Dr sell hôt au s Drehbuech vorfasst. D Hauptrolla werret vom Tillbert Strahl-Schäfer, vo dr Friederike Kempter ond vom Christof Arnold gschbiilt. Zom erschda Môl seha kenna hôt mr dean Film am
4. Juli 2001 em Fernseha vom Sender 3sat.

Vorbemerkong[ändere | Quälltäxt bearbeite]

Der Film schildret d Erleabnis vo zwoi Briader em jugendlicha Aldr en dr Walpurgisnacht emma fikdiva schwäbischa Dorf. En viil lendliche Gegenda geit’s noh da alda Brauch, dass a jonger lediger Bursch en dera Nacht sellem Mädle, wo-nr a Aug druff gwôrfa hôt, a gschmickda Birk als „Moiaboom“ en da Garda oder vôr d Hausdiir setzt. Ema Mädle abr, wo-nen amôl em Stich glau hôt oder wo-nr hôt et beira landa kenna, dui kriagt manchmôl an ganz kahla Boom, wo leere Bichsa (= Dosa) drô hanget. So ebbes hoißt-ma an „Bichsaboom“.

Handlong[ändere | Quälltäxt bearbeite]

Am Nôchmiddag vom 30. April probt dr 17-jährige Micha mit seira Bänd „Hangman“ fir dui am Ôbad staddfendenda „Tanz-in-den-Mai-Party“. Vo seine Bändmitglieder wuud’r uffzoga, weil’r abstreidet, en d Ina vorknallt zo sei. Uff oimôl daucht sei fenf Jôhr jengerer Bruader Benny auf ond will wissa, was mr fir-en Bichsaboom so älles braucha dät. Nôchdem’r d Antwort kriagt hôt, zuit’r mit seine Freind ab ens Derfle, wo dia Kerle s Schaufenschder vom Metzgergschäft mit Rasiirschaum „vorziiret“.

Wia d Bändmitgliader uff dr Bihne vom Danzsaal ihre Instrument uffbauet, kommt d Ina mit ihrer Freindin. Dr Micha gôht glei uff d Ina zua, om s Gschbräch mit-ra zo suacha. Des will abr et so richdich klabba, weil der Kerle arg schichtern ischt. Wia-nr grad sellem Mädle vorzehla will, dass’r extra fir sui a Liad gschriiba hôt, daucht pletzlich dr Weiberheld Richie auf, schnabbt-em des Mädle weg ond entfihrt-se an d Bar.

Dr Benny ischt grad dorbei, da Bichsaboom fir sei Schuelkameradin Julia uffzostella, dô wuud’r vo dera ihrer Mueder ibrrascht. Dui moint, der Bua wär a Vorehrer vo ihrem Dechterle ond ledt-en ei, ens Haus reizokomma.

Beim Ufftridd vo de „Hangmans“ kô dr Micha vo dr Bihne aus erkenna, wia dr Richie emmr noh mit dr Ina rombussiirt. Dô druff kindigt’r sein nuia Song ôô, was kurz dr Ina ihr Uffmerksamkeit erregt. Abr glei druff mueß dr Micha mit ôôgucka, wia sein Schwarm mit-em Richie Hand en Hand us-em Saal vorschwendet. Ohne lang zo ibrlega rennt’r deane zwoi hendrher ond stellt da Richie zor Red. Boide steigret sich e-na Wuat nei ond send fascht soweit, sich zo vordrescha, dô wuud dr Micha vo seim Bändkollega Tommy wegzoga. Dr sell macht-em jetzt gheerige Vorwirf, dass’r s Konzert hôt platza lau. Jetzt kriaget dia zwoi au noh Krach mitnandern. Dô druff lôôt sich dr Micha mit Alkohol volllaufa.

En dr Zwischazeit hôt sich dr Benny vo dr Julia ond ihrer Mueder losreißa kenna. Mit de ibrig-bliibene Bichsa dekoriirt’r jetzt em Metzger sein schwera Mercedes. Dô drbei wuud’r abr vom Besitzer vordwischt.

Wia sich dr Micha uff-em Kloo frisch macha will, heert’r us-ra Kabine vordächdige Gereisch ond luegt ibr d Trennwand. Dô mueß’r mit ôôseha, wia sich sei Rivale Richie mit dr Susi – also et mit dr Ina – vorgniagt. Nôch-ra kloina Schlägerei hôt dr Richie a Ei-seha ond sait zom Micha, er soll noh zor Ina ganga, dui dät uff-en warda. Zruck em Saal entdeckt’r sein Schwarm uff dr Danzfleche. Weil-en abr dr Alkohol arg em Griff hôt, muaß’r sich ibrgäa. Dô druff wuud’s dr Ina ganz schleacht. Drom rennt-se drvoo. Dr Tommy siht ei, dass’r Scheiße baut hôt ond vorsehnt sich wiidr mit-em Micha.

Wia dr nuie Dag ôôbricht, machet sich älle Bändmitglieder mit-ma Trakdor-Fuhrwerk uff da Weag zor Ina ihrem Haus. Se fahret uff dr Dorfstrôß, wo en dr Freinacht mit ällerloi Gerätschafda ond Wescheleina dekoriirt wôrra ischt. Wia-se am Ziil ôôkommet, stellet-se an graußa Moiaboom auf. Glei druff schmeddret dr Micha sei nuis Liadle fir d Ina. De sell tridd uff da Balkon ond lächlet ihrem Vorehrer zua.

Auszoichnonga[ändere | Quälltäxt bearbeite]

2001 isch der Stroifa bei dr Filmschau Bada-Wirdaberg mit-em Publikomspreis auszeichnet wôrra. Em gleicha Jôhr ischt’r beim Sternafescht vo dr Minchner Abendzeitung fir da Regie-Preis nominiirt wôrra. D Filmbewerdongsstell Wiisbada hôt deam Werk s Prädikat «Wertvoll» vorliha ond des so begrendet: „Der Film ... geht unverkrampft und lustbetont mit der Welt der Provinz um. Jugendkultur einmal anders. Die Darstellerleistungen wurden im Bewertungsausschuß positiv aufgenommen, die dramaturgischen Einfälle als unterschiedlich gelungen gesehen und die Dominanz der Musikebene kritisch angemerkt. Aber auch in der Moianacht geht es etwas ungehobelt zu.“

Au des muaß noh gsait werra[ändere | Quälltäxt bearbeite]

„Moianacht“ isch em Stefan Hering sei Abschlussfilm an dr Hochschuel fir Fernseha ond Film en Mincha. D Stuegerter Schauschbiilere Friedrike Kempter geit en deam Stroifa ihr Filmdebüt. D Roll vo dr Julia schbiilt d Maylin Hausch, wo schbädr als deitscha Moischdere em Eiskunschtlauf glenzt hôt. S Liad „Ich und Du“ ischt s oinzige hochdeitsche Element en deam Stroifa. Gschriiba hôt dean Song d Karlsruher Rockbänd „NTS“, wo dômôls kurz vôr ihrem Durchbruch gschdanda ischt. Gschwätzt wuud ausschliaßlich Schwäbisch. Dreht wôrra isch der Film z Lauterstoi em Landkreis Gebbenga sowia z Megglenga, z Bartholomä ond z Heubach, älle drei Gmoida send em Ostalbkreis.

Weblink[ändere | Quälltäxt bearbeite]

Information icon.svg Dä Artikel basiert uff ere fräie Übersetzig vu dere Version vum Artikel „Moianacht“ vu de dütsche Wikipedia.

E Liste vu de Autore un Versione isch do z finde.