Michael Studer

Dr Michael Studer (* 12. Dezämber 1940 z Thun; † 2. April 2024 z Bärn isch e Schwyzer Pianischt gsii.

Lääbe

Dr Michael Studer isch in eme musische Elterehuus ufgwagse. Sy Vater het as Räkter vum Gimnasium Thun un Inderlache gschafft. Sy Mueter isch Pianischti gsii, isch aber nit effetli ufdrätte. Är het syni Uusbildig am Klavier am Bärner Kunservatoorium bi dr Suzanne Eggli aagfange, het vu 1960 bis 1962 am Conservatoire National Supérieur de Musique de Paris bi dr Yvonne Lefébure wytergmacht un isch deiu as Privaatschueler zum Richard Hauser uf Wien gange. Perfäkzioniert het er sy Spiil in Maischterkiirs bim Bruno Seidlhofer z Köln un bim Géza Anda z Lozärn. Dr Studer isch 1962 erschte Bryysdreeger vum Klavierwettbewäärb vum Pariser Kunservatoorium woore un het druf Bryys gwunne bim Große Pembaur-Wettbewärb Bärn un bim Concours Musical International de Montréal. Är isch au uuszaichnet woore mit em Kulturbryys vu dr Stadt Thun.

Em Studer sy Klavierspiil isch dur tächnisch suverääni Interpretazioon, Täxtdreii, strukturälli Klaarhait, rhythmischi Bregnanz un hoochi chlangligi Sänsibiliteet gchännzaichnet gsii. Är het jedwääderi Säntimentalitet oder Affektierthait vum Uusdruck vermiide. Dank dr Kunzäntrazioon uf d Daarstellig vum musikaalische Ghalt isch dr Studer dr unterschiidligschte stilischtische Aafoorderige vu dr Klaviermusik zwische Bach un Ravel in exemplaarischen Yyspiilige gräächt woore. Ä het doodermit d Zyylede vu grooße Schwyzer Pianischte im 20. Jorhundert vum Edwin Fischer un em Paul Baumgartner wytergfiert.

Ab Mitti vu dr 1960er Joor isch dr Studer reegelmääßig as Solischt an Schwyzer Musikfeschtiwäl ufdrätte, zem Byschpel am Festival Tibor Varga (Sittu), em Festival Yehudi Menuhin (Gstaad), de Internationale Musikfestwochen Luzern (hite Lucerne Festival) un de Internationale Junifestwochen Züri (hite Festspiele Zürich). Dr Studer het mit internazionaal renommierte Dirigänte zämegschafft, doodrunter Charles Dutoit, Zdeněk Mácal, Paul Klecki, Armin Jordan, Wolfgang Sawallisch, Erich Leinsdorf, Esa-Pekka Salonen, Rafael Frühbeck de Burgos, Fritz Rieger, Herbert Blomstedt, Gerd Albrecht un Antal Doráti.

Ann 2001 het dr Studer syni Ufdritt bi Kunzärt un sy Brofässuur am Bärner Kunservatoorium wäg eme chroonische Gheerlyyde mieße ufgee. 2024 isch er mit Exit freiwillig us em Lääbe gschiide.

Yyspiilige

Dr Michael Studer het fir s Schallblatte-Label Luna, wun er grindet ghaa het, ab Ändi 1960er Joor druf fimf LP Soolowäärch vu Brahms, Chopin, Debussy, Liszt, Mozart, Ravel, Schubert un Schumann yygspiilt. Anderi Ufnaame het er bi verschiidene Schwyzer Label gmacht. Bi Jecklin isch e LP mit Melodraame vum Strauss, em Nietzsche un em Liszt uusechuu; sy chinschtlerische Paartner as Sprächer isch doo dr Gert Westphal gsii. Fir Claves Records het dr Studer Wäärch vu Bach, Haydn, Mozart (Klavierkunzärt Nr. 9, 11 un 12 mit em Helmut Müller-Brühl), Rachmaninow un Schumann ufgnuu. Sy letschti Yyspiilig vu 1999 het Wäärch vum Chopin gulte un isch vu Müller & Schade broduziert woore.

Anne 2007 het Claves Records e rebresäntatiivi Uuswaal vu s Studers Yyspiilige us de Joor 1971 bis 1999 unter em Titel Michael Studer – The Legacy uusegee, ergänzt um zwee Kunzärtmitschnitt vum Schwyzer Rundfunk mit em Klavierkunzärt G-Dur vum Ravel (mit em Orchestre de la Suisse Romande unter em Sawallisch) un em Klavierkunzärt Nr. 2 g-moll vum Camille Saint-Saëns (mit em Orchestre de Chambre de Lausanne unter em Rieger).

Literatuur

Olivier Verrey, Antonin Scherrer und Michael Studer im Booklet der CD-Edition Michael Studer – The Legacy. [Claves Records 50-2713/18, 6 CDs (2007)]

Weblink

• Literatur vu un iber Michael Studer im Katalog vu dr Dütsche Nazionalbibliothek
• Michael Studer bi Discogs (änglisch)

Fueßnote

Dä Artikel basiert uff ere fräie Übersetzig vu dere Version vum Artikel „Michael_Studer“ vu de dütsche Wikipedia. E Liste vu de Autore un Versione isch do z finde.