Maximilian vo Bappèheim

Maximilian vo Bappèheim (* 1580; † 14. Februar 1639) isch dè Landgrõf vo Stüèlingè im Landgrõfschaft Stüèlingè un Rychserbmarschall.

Läbbè

Maximilian vo Bappüheim isch dè Sohn vom Conrad vo Bappèheim († 1603) un sinèrè Gemahlin Catharina vo Lambärg († 1599). Uffgrund vom hohè Alter vom Alexander II. vo Bappèheim hèt er in Vodrèttig scho ab 1607 s Rychserbmarschallamt uusgübt. Uss sellèm Grund hèt er 1611 am Kurfürschtèdaag z Nürnbärch sowiè 1612 am Wahl- un Krönigsdaag vom Kaiser Matthias z Frankfurt deilgnòò. È Johr spôter, 1613, isch er Deilnèmmer uff èm Rychsdaag z Rägensburg un a dè Krönung vom Kaiser Ferdinand II. gsi. Am Kurfürschtèdaag z Rägensburg 1630, wo dè Wallèschtei entlòò worrè isch, hèt er ebbèfalls deilgnõ. Ab 1635 hèt er schlièßlich offizièll s Seniorat vo dè Bappèheimer übbernõ.

Um sin aaschpruchsvollè Läbbènsschtyl uffrächtzerhaaltè, isch dè Maximilian vo Bappèheim zwungè gsi, Deile vo sim Bsitz z voüßèrè. Im Johr 1613 hèt er für 88.500 Guldè diè „hoche Forscht- Gelait- un Land-Grichtlichi Obrigkeit“ übber St. Bläsy vokauft, 1621 hèt er für 130.000 Guldè d Hèrrschaft Gräfèthal vokauft. Zu sèllèrè Zit, vo 1620-1624 hèt d Stüèlinger Burg zuè nèm Schloss umbaut, dèm mò hüt Schloss Hohèlupfè sait un übber Stüèlingè als Wòrzeichè thront. Bim Umbau hèt er druff beschtandè, dass dè Durm, èn aaltè, zimli gschlissènè Bärgfryd, zuè nèm Schlossdurm mit èm achteggigè Sockel un èrè abschlièßendè welschè Durmschpitzè uusbaut worrè isch. Letschteres dütet druff hy, dass dè Maximilian vo Bappèheim vom welschè Bauschtyl gsi isch. D Landgrõfschaft Stüèlingè isch im Bappèheimer übbrigens vum dütsche Kaiser als Lehè für sini treuè Diènscht übberdrait worrè, nõchdèmm sèll Lehè nõch èm Uusschterbè vom Lupfener Gschlècht öppè 30 Johr lang vowaist gsi isch.

Insgsamt isch dè Maximilian vo Bappèheim dreimòl vohürõtet gsi. In èrster Ehe hèt er 1600 d Elisabeth, Döchter vum Grõf Ludwig I. vo Sayn-Wittgèschtei ghürõtet, welli abber no im glychè Johr gschtorbè isch. Zwei Johr spôter hèt d Juliana, Döchter vum Grõf Hermann I. vo Wyd ghürõtè. Sèlli Ehe hèt abber au nur zwei Johr ghaaltè, bis d Juliana 1604 gschtorbè. I dè drittè un letschtè Ehe hèt er 1606 Maria Ursula, Döchter vum Grõf Ludwig vo Leiningè-Leiningè zur Frau gnò. Nõch sèllèrè irem Dòt 1638 hèt dè Maximilian vo Bappèheim èm Versuch für è virti Ehe mit dè Anna Sophia, è Döchter vum Pfalzgrõf Auguscht vo Sulzbach, unternõ. Sèll isch abber am Dòt vum Maximilian 1639 gschitterèt. Obwoll sèlli Ehe nimmi zschtand chò isch, hèt dè Maximilian am 6. Dezèmber 1638 no è Teschtamènt vofasst, wo d Anna Sophia begünschtigt worrè isch un irè unter andrem d Hèrrschaft Mettingè bi Stüèlingè vomacht, mit èm Sitz uff dè Burg Untermettingè.

Mit èm Abläbbè vom Maximilian isch diè Bappèheimischi Linniè Allgäu-Stüèlingè erloschè, welli vum Heinrich XI. vo Bappèheim aagfangè worrè isch. Im Aadenkè a dè Maximilian vo Bappèheim isch èn Epitaph i dè Pfarrkirchè z Bappèheim errichtet worrè, ebbèso è Doppelgrab uss Marmor i dè Stadtkirchè z Èngè.

Nõchkommèschaft

Uss sinèrè drittè Ehe hèt er drei Kinder ghaa, wo er alli übberläbbt hèt:

Èrnscht Fridrich vo Bappèheim (* 20. Dezèmber 1608; † 1609)
Heinrich Ludwig vo Bappèheim (* 1610; † 1633), bi dè Belagerig vom Schloss Hohèschtofflè durch èn Kopfschuss umbrocht worrè. Er isch z Schaffuusè beerdigt worrè.
Maximiliane Maria vo Bappèheim († 1635) ∞ Fridrich Rudolf vo Fürschtèbärg (* 1602; † 1655)

Literadur

Hans Schwackenhofer: Die Reichserbmarschälle, Grafen und Herren von und zu Pappenheim. Walter E. Keller, Berlin 2002, ISBN 3-934145-12-4, S. 164–169.

Weblinggs

Commons: Maximilian von Pappenheim – Sammlig vo Multimediadateie

Reinhard Heydenreuter: Pappenheim. In: Neue Deutsche Biographie (NDB). Band 20, Duncker & Humblot, Berlin 2001, ISBN 3-428-00201-6, S. 48–50.

Dä Artikel basiert uff ere fräie Übersetzig vum Artikel „Maximilian_von_Pappenheim“ vu de dütsche Wikipedia. E Liste vu de Autore un Versione isch do z finde.