Maria Beyerle

d Maria Beyerle

D Maria Anna Beyerle (* 21. Augschte 1882 z Konschtanz; † 18. Dezämber 1968 au dert) isch e dytschi Pedagogi un Bolitikeri (Zäntrum, BCSV, CDU) gsii.

Lääbe

D Maria Beyerle isch as Dochter vum Konschtanzer Rächtsaawalt Karl Beyerle uf d Wält chuu. Si het vier Brieder ghaa, dodrunter dr Rächtswisseschaftler un Zäntrumsbolitiker Konrad Beyerle un dr Rächtshischtoriker Franz Beyerle.

No dr Volksschuel un dr Hechere Dechterschuel (Chloschterschuel Zoffinge) het d Beyserle vu 1898 bis 1900 s Lehrerneseminar bsuecht, wu si mit dr Erschte Lehrernebriefig absgchlosse het. Derno isch si bis 1901 uf Pänsionat St. Joseph z Ferney-Voltaire (Schwyz) gange. Anne 1902 het si di Zwoot Lehrernerbriefig bstande. Si het vu 1904 bis 1906 as Brivatlehreri beim Grof Clemens Heidenreich Droste zu Vischering gschafft, vu 1906 bis 1907 as Hilfslehreri an dr Hechere Maidlischuel z Fryburg un vu 1907 bis 1908 as Unterlehreri z Neckargemünd. Derno het si as Gaschthereeri Vorläsige an dr Uniwersitet Fryburg bsuecht un het si uf s Abitur vorberaitet, wu si anne 1910 bstande het.

D Beyerle het vu 1911 bis 1925 as Lehreri z Konschtanz-Petershuuse gschafft un isch 1919 zur Hauptlehreri beferderet wore. Vu 1925 bis 1928 isch si Lehreri an ere Furtbildigsschuel z Konschtanz gsii. Anne 1928 isch si Räkteri vu dr Maidlifurtbildigsschuel z Fryburg wore. Im nämlige Johr un wider vu 1929 bis 1932 het si as Studiereti mit em Lehrufdrag Methodik an dr Lehrerbildigsaastalt z Fryburg gschafft. 1932 isch si Räkteri an dr Maidlifurtbildigsschuel z Kallsruh wore, bis si 1933 as Studiereti an d Maidlioberrealschuel z Konschtanz gwägslet isch. Anne 1935 isch si uf gsundhaitlige Grind vorzytig pänsioniert wore.

Näbe irem Beruef as Lehreri het si d Beyerle in kadolische Organisazione engaschiert. Si isch syter 1910 Vorsitzeri vum Kadolische Dytsche Frauebund (KDFB) z Konschtanz gsii, het dert 1914 dr Verain vu kadolische dytsche Lehrerne (VkdL) mitgrindet un isch zur Vorsitzeri vum Badische VkdL-Verband gwehlt wore. Si isch in dr Zäntrumsbartei yyderätte, un fir die vu 1919 bis 1925 un wider vu 1926 bis 1928 as Abgordneti im Landdag vu dr Republik Bade ghockt.

Noch em Zweete Wältchrieg isch d Beyerle wider bolitisch aktiv wore un isch in d BCSV yydrätte, wu speter dr CDU-Landesverband Sidbade drus firigangen isch. Si isch vu 1946 bis 1948 Stadtreti z Konschtanz gsii un isch 1947 as Abgordneti in Badische Landdag gwehlt wore, wu si bis zue däm syre Uflesig 1952 aaghert het. In ire Zyt as Barlemäntarieri isch si fir d Grindig vum Sidweschtstaat Bade-Wirttebärg gsii.

Ehrige

• Päpschtlig Ehrechryz Pro Ecclesia et Pontifice, 1964

Literatur

• Landtag von Baden-Württemberg (Hrsg.): MdL, Die Abgeordneten der Landtage in Baden-Württemberg 1946–1978, Stuttgart 1978, ISBN 3-12-911930-2, S. 99
• Clemens Siebler: Maria Anna Beyerle, in: Baden-Württembergische Biographien. Band 1, S. 23–24 (online)

Weblink

• Rede vu dr Maria Beyerle im Badische Landdag in dr Digitale Sammlige vu dr Badische Landesbibliothek

Dä Artikel basiert uff ere fräie Übersetzig vu dere Version vum Artikel „Maria_Beyerle“ vu de dütsche Wikipedia. E Liste vu de Autore un Versione isch do z finde.