Lucas Bernoulli

Us der alemannische Wikipedia, der freie Dialäkt-Enzyklopedy

Dr Lucas Bernoulli-Gries (* 19. April 1907 z Berlin[1][2]; † Oktober 1976 z Basel) isch e Schwiizer Architekt und Politiker (LdU) us der Familiedynastie Bernoulli gsi.

As Sohn vom Architekt Hans Bernoulli isch dr Lucas mit fünf Johr nach Basel[2] zoge, won er s Humanischtische Gymnasium und di Oberi Realschuel bsuecht het.[1] A de Technische Hochschuele vo Berlin-Charlottenburg und Münche het er Architektur schtudiert[3] und het denn as Architekt z Berlin, Paris und z Zürich gschaffed.[2] Ab 1940[3] het er a der Allgmeine Gwärbschuel Basel as Lehrer für konschtruktivs Zeichne gschafft.[2] Vo 1960 bis 1963 isch dr Bernoulli Presidänt vo dr Basler Schuelsynode gsi.[2]

Dr Bernoulli isch der Partei vo sim Vater bidrätte, em Landesring vo de Unabhängige (LdU), für die er vo 1941 bis 1944, vo 1950 bis 1953, vo 1956 bis 1968 und in de 1970er Johr as Freiwirtschaftler Mitglied im Grosse Rat vom Kanton Basel-Stadt gsi isch[1] und in verschidne Kommissione mitgwirkt het.[2] In sinere Wohngmeind Rieche isch er vo 1966 bis 1974 Mitglid vom Witere Gmeindrot gsi.[2] Zwüsche 1966 und 1969[1] isch er z Basel au Partei- bzw. Fraktionspresidänt vo sinere Partei gsi.[2]

„Mit em riche Rüschtzüg vom begabte Architekt het er im kantonale Parlamänt wärtvoll zur Lösig vo de schdaatleche Bau-ufgabe bidreit, und ebeso het er für s Gmeinwäse in der Verkehrs- und Theaterkommission gwüssehafti und fruchtbari Arbet gleischdet. Höchgschetzt isch au sini Tätigkeit as Ersatzrichter am Zivilgricht in de Johr 1966–1970 gsi…“

Gustaf Adolf Wanner: Lucas Bernoulli zum Gedenken. In: Basler Nachrichten, 7. Oktober 1976. (Hochdütsch)

„As ächti Persönlechkeit isch er hartnäckig in sine Überzügige gsi, und het usser Grund und Bode möglechscht vil dr private Initiative und ned em Schdaat welle überlo.“

fb: Lucas Bernoulli gestorben. In: Riehener Zeitung, 8. Oktober 1976. (Hochdütsch)

Literatur[ändere | Quälltäxt bearbeite]

Weblink[ändere | Quälltäxt bearbeite]

Einzelnochwiis[ändere | Quälltäxt bearbeite]

  1. 1,0 1,1 1,2 1,3 Gustaf Adolf Wanner: Lucas Bernoulli zum Gedenken. In: Basler Nachrichten, 7. Oktober 1976.
  2. 2,0 2,1 2,2 2,3 2,4 2,5 2,6 2,7 tt: Lucas Bernoulli zum Gedenken. In: National-Zeitung, 7. Oktober 1976.
  3. 3,0 3,1 Lucas Bernoulli, Architekt, 1907, Basel. Wahlen 1955. (Siehe Lucas Bernoulli (Memento vom 30. Juli 2019 im Internet Archive) im Staatsarchiv Basel-Stadt.)
Dä Artikel basiert uff ere fräie Übersetzig vu dere Version vum Artikel „Lucas_Bernoulli“ vu de dütsche Wikipedia. E Liste vu de Autore un Versione isch do z finde.