Gustaf Adolf Wanner

Dr Gustaf Adolf Wanner (* 31. Januar 1911 z Begginge; † 14. Septämber 1984) isch e Baasler Historiker und Schurnalist gsi.

Biografii

Dr Wanner het an dr Baasler Uni zum Dr. phil. bromowiert und het vo 1935 bis 1945 und vo 1962 bis 1976 as Stadtredakder bi de Basler Nachrichten gschafft. Vo 1976 aa het er bis zu sim Dood für d Basler Zeitung gschafft, wo us dr Fusioon vo d Baasler Noochrichde mit dr Nazional Zitig entstande isch. Er het under anderem e hufe Biidrääg über d Gschicht vo alte Hüüser und Dänggmööler verfasst, wo au in Buechform erschiine si. Er het au meereri Büecher über d Baasler Gschicht uusegee, drunder e Biografii über e Christoph Merian. Dr Wanner, wo men em vilmol G.A.W. gsäit het, het as e „groosse Kenner“ und as dr „populärsti Chronist“ vo dr Stadt Baasel gulte.

Vo 1949 bis 1958 isch dr Wanner Konsul vo Dänemark und vo Schwede z Baasel gsi. Finnland het er as Konsul vo 1965 bis zu sim Dood verdräte. 1977 het en d Baasler Johann-Wolfgang-von-Goethe-Stifdig mit em Oberrhiinische Kulturbriis uszäichnet.

Schrifte (Uswaal)

• Geschichte des Dorfes Beggingen. Ein Beitrag zur Geschichte des Wandels ländlicher Besitzverhältnisse, Baasel 1939 (Dissertazioon)
• Christoph Merian.1800–1858, Baasel 1958
• Die Basler Handels-Gesellschaft AG. 1859–1959, Baasel 1959
• Hundertfünfzig Jahre Danzas 1815–1965, Baasel 1965. (mit em Nicolas Passavant)
• Rund um Basels Denkmäler, Baasel 1975
• Zunftkraft und Zunftstolz. 750 Jahre Basler Zünfte und Gesellschaften, Baasel 1976
• Berühmte Gäste in Basel, Baasel 1981
• Die Holzach. Geschichte einer alten Schweizer Familie, Baasel, Frankfurt a. M. 1982.
• Häuser – Menschen – Schicksale, 3 Bänd, Baasel 1985–1988

Litratuur

• Helen Liebendörfer. Spaziergang zu berühmten Gästen in Basel: Mit Gustaf Adolf Wanner durch die Stadt. Baasel: Reinhardt. ISBN 978-3-7245-1704-7

Weblingg

• Iidraag bi altbasel.ch