Lovebugs

	Allgmeini Informatione
Genre	Alternative Pop
Gründig	1993
Website	http://www.lovebugs.ch/
Gründungsmitglider
Bass	Sebastian Hausmann
Gitarre, Gsang	Adrian Sieber
Schlagzüüg	Julie Lauper
Aktuelli Bsetzig
Gsang	Adrian Sieber
Gitarre	Thomas Rechberger
Bass	Florian Senn
Keyboard	Stefan Wagner
Schlagzüüg	Simon Ramseier

Dialäkt: Baseldütsch

D Lovebugs si e Schwiizer Musiggruppe us Basel. D Musig, wo si macht, ghört stilistisch zum Britpop.

D Gschicht vo dr Band

Ihri Gschicht het 1992 mit eme Zeddel im ene Blattelade aagfange: «Drummer gesucht». So si dr Sebastian Hausmann (Bass), dr Adrian Sieber (Gitarre und Gsang) und d Julie Lauper (Schlagzüüg) zämmechoo. Si hai denn bim «Basler Bandcontest» mitgmacht, em Taläntwettbewärb. D Band het sich dr Name «Lovebugs» gee und isch zur Live-Ändusscheidig iiglade worde, wo si gwunne hai und hai döffe e CD broduziere.

E Johr druf het d Schlagzüügere Julie müesse goh. Dr Sebastian und dr Adrian hai z zweit die ersti CD vo de Lovebugs mit em Diddel «Fluff» ufgnoh. Grad druf isch dr Simon Ramseier dr neu Schlagzüüger worde.

1995 si d Lovebugs uf Tour gange. Näbebii hai si ihr zweits Album broduziert und si zum erste Mol im Usland ufdräte. 1996 isch s erste Hitparaden-Album «Lovebugs» erschiine, wo denn mit dr Single «Fantastic» grad in d Top 40 iigstiige isch. 1998 isch dr Gitarrist Thomas Rechberger zur Band choo.

Im Johr 2000 het d Band ihr vierts Album «Transatlantic Flight» broduziert wo de Lovebugs zum Durchbruch verholfe het: S Album isch in dr Schwiiz bis uf Blatz drei ufgstiige und het für usverchaufti Konzärthüüser gsorgt.

D Band het 2001 s fümfte Album «Awaydays» ufgnoh und isch im April uf Blatz eins in de Schwiizer Albumcharts iigstiige. Dr Sebastian het d Lovebugs verloo, zum sich sim Glam-Rock-Projekt Fucking Beautiful z widme. An siiner Stell si dr Florian Senn am Bass und dr Stefan Wagner am Keyboard zu de Lovebugs choo.

2003 isch s Album «13 Songs With a View» erschiine und het s in dr Schwiizer Album-Hitparade uf Blatz 8 brocht. S neggste erfolgriiche Album «Naked» isch unplugged live iigspiilt worde und 2005 uusechoo. Es isch diräkt uf Nummere eins bi dr Schwiizer Hitparade iigstiige. D Band het bi dr Vorbereitig vo dere CD äng mit em Musigbroduzänt Chris von Rohr zsämmegschafft.

Im Juni 2006 hai d Lovebugs s Album «In Every Waking Moment» veröffentligt, wo ebefalls uf Blatz 1 vo dr Schwiizer Album-Hitparade iigstiige isch. Au die beide Singles «The Key» (Blatz 17) und «Avalon», e Duett mit dr Lene Marlin (Blatz 10) si e baae Wuche in dr Hitparade blatziert gsi.

Zu ihre Lieder, wo am meiste gspiilt wärde, ghöre «Fantastic», «Angel Heart», «Under My Skin», «Bitter Moon», «Music Makes My World Go Round», «Flavour of the Day», «A Love Like Tides» und «Everybody Knows I Love You».

Denn hai d Lovebugs e Pause gmacht, wo dr Sänger Adrian Sieber usgnützt het, e Soloprojekt, won er lang blant ghaa het, under em Name Adrian Solo umzsetze.

Im Mai 2009 si d Lovebugs für d Schwiiz bim Eurovision Song Contest 2009 mit em Diddelsong vo ihrem aktuelle Album «The Highest Heights» adräte, hai aber dr Iizug in dr Final nid gschafft, wil si nume 15 Pünkt überchoo hai und uf em 14. Blatz glandet si. S Album het s uf e zweit Blatz in de Schwiizer Charts brocht.

Diskografii

Albene

1994: Fluff
1995: Tart
1996: Lovebugs
1997: Lovebugs (Remix-Album)
1999: Live Via Satellite - The Radio X-Session
2000: Transatlantic Flight
2001: Awaydays
2003: 13 Songs with a View
2005: Naked (Unplugged)
2006: In Every Waking Moment
2009: The Highest Heights
2009: Only Forever – The Best Of
2012: Life Is Today

Singles

1996: Fantastic
1998: Angel Heart
1999: Under My Skin
2000: Bitter Moon
2001: Music Makes My World Go Round
2001: Coffee and Cigarettes
2002: Flavour of the Day
2003: A Love Like Tides
2006: The Key
2006: Avalon (featuring Lene Marlin)
2009: 21st Century Man
2009: The Highest Heights
2009: Shine
2012: Truth is

Quelle

Weblingg

Dä Artikel basiert uff ere fräie Übersetzig vum Artikel „Lovebugs“ vu de dütsche Wikipedia. E Liste vu de Autore un Versione isch do z finde.