Lombardisch

Lombardisch
Verbreitig:	Italie, Schwiz
Sprecher:	3,5 Mio.
Linguistischi Klassifikation:	Indoeuropäisch Italisch Romanisch Italoromanisch Norditalienisch Galloitalisch Lombardisch
Sproochchürzel
ISO 639-1	—
ISO 639-2	roa (sustigi Romanischi Sprooche)
ISO 639-3	lmo

Verbreitung der lombardischen Sprache in Europa:

Regione, wo Lombardisch gredt werd

Regione, wo Lombardisch näbed andere Sproche gredt werd (Alemannisch, Bündnerromanisch und Ladinisch) und Regione mit Sprochübergang (mit Piemontesisch, mit Emilianisch und mit Venetisch)

Regione, wo s Lombardisch e gwössen Iifluss hät (öber s Venetisch)

? Regione, wo me nöd sicher isch, wie witt no Ladinisch gredt werd

S Lombardisch (lomb. lumbaart) isch e galloitalische Tielekt, wo i de Lombardei, i de Süüdschwiz, im östliche Piemont un im westliche Trentino gredt werd. S Lombardisch zellt zo de gfördete Sprooche.

Merchmool

Typischi lombardischi Merchmool sind d Palatalisierig vo /ū/ und /ǒ/ zu /ü/ und /ö/: müür (Muur" (lat. murus; it. muro), sööl „Bode“ (lat. solum; it. suolo), denn de Wandel vo /ct/ zu /č/: lač „Milch“ (lat. lact-; it. latte), de Abfall vom n im Uusluut: pã „Broot“ (lat. panis; it. pane) und de Abfall vom /r/ im Infinitiv: kantá „singe“ (lat. it. cantare).

Iitailig

di lombardische Tielekt

s Paternoster im Mailänder-Tielekt

S Lombardisch cha me i drai Gruppe iitaile, i s Alpelombardische, i s Westlombardische und i s Ostlombardische.

Alpelombardisch

S Alpelombardische (lumbard alpin) werd i de Alpetäler gredt und zaichnet sich dör Konservatisme uus, zum Tail au dör d Palatalisierig vo /a/ zumene offnige /ë/: cevra „Gaiss“ (lat. it. capra). Tielekt, wo dezue ghöred, sind:

• s Ossolano (ussulan) im Eschetal (Val d'Òssola) und i
• s Ticinese (ticinés) im Misox (Val Mesolcina) und im Tessin (Tesin) nördlich vom Monte Ceneri.
• s Chiavennese (cjavenasc) um Chläve (Cjavèna) ume;
• de Bergellertielekt (bargajot) im Bergell (Val Bargaja);
• s Puschlavisch (pusc‘iavin) im Puschlav (Pus‘ciaf);
• s Bormiese um Worms im Veltlin (Burmi) ume und
• s Livignasco (livignasc‘) im Tal vo Luwin (Livìgn).

Westlombardisch

S Westlombardische (lumbard ucidental) oder Insubrisch (insübrich) zaichnet sich under anderem uus dör de Rhotazismus: püres „Floo“ (it. pulex; it. pulce). S Westlombardische tailt sich i acht Hopttielekt, wo witter undertailt were chönet:

• s Valtellinese (valtulines) i de Provinz Sondrio (Sundri) bzw. im Veltlin (Valtulina).
• s Comasco-Lecchese rund um de Comersee (Lagh de Comm), zäme mit em südliche Tessin mit Lugano (Lügann) bis an Monte Ceneri ane. Variante sind:
  • de Seetielekt (laghee) westlich vom Comersee;
  • s Comasco (Comasch) um Como (Comm);
  • s Lecchese um Lecco (Lecch) ume.
• s Varese-Bosino (varesòtt) uf baidne Siite vom mitllere und südliche Langesee (Lagh Maggior)
• s Legnanese-Bustocco (legnàn & büstoch) im südliche Tail vo de Provinz Varese (Vares) um Legnano (Legnàn) und Busto (Büsti) ume.
• s Brianzolo (brianzöö) i de Brianza (Brianza) zwöschet Como und Monza (Munscia).
• s Milanese (milanes) isch de Tielekt vo Mailand (Milan) und de Umgebig.
• s Pavese-Lodese mit de Variante
  • s Lodese (ludesàn) um Lodi (Lod) ume;
  • s Pavese (paves) um Pavia (Pävia) ume und
  • s Vogarese (vugares) um Voghera (Vughera) ume. De isch de anzig lombardisch Tielekt, wo südlich vom Po gredt werd.
• s Novarese (nuaresat) um Novara (Nuara) ume. S Nuaresat isch en Öbergangstielekt zom Piemontesische.

Ostlombardisch

Im Ostlombardische (lumbàrd oriental) isch intervokalisches /v/ verschwunde: kaál „Ross“ (lat. caballus, it. cavallo). S glideret sich i:

• s Bergamasco (bergamàsch) zwöschet de Flüss Adda und Oglio (Òi), i de Provinz Bergamo (Bèrghem).
• s Cremasco (cremàsch) südlich vom Bergamasco, zwöschet de Adda und em Oglio um Crema ume.
• s Cremonese (cremunées) zwöschet em Po und em Oglio i de Provinz Cremona (Cremuna).
• s Bresciano (bresà) zwöschet em Oglio und em Gardasee i de Provinz Brescia (Brèsa) und im Val Giudicarie im westliche Trentino (Trentin). E Variante vo dem Tielekt werd im Val Camonica (Al Camonega) gredt.

Büecher

Michele Loporcaro: Profilo linguistico dei dialetti italiani. Bari 2009. ISBN 978-88-420-8920-9.

Dokumäntiert wird dr Wortschatz vom schwizerische Lombardisch im Vocabolario dei dialetti della Svizzera italiana.

Weblink

D Wikipedia uff Lombardisch

• Lombard uf de Website vo Ethnologue (englisch)
• Istituto di dialettologia e di etnografia valtellinese e valchiavennasca
• Centro di dialettologia e di etnografia del Cantone Ticino
  • LSI – Lessico dialettale della Svizzera italiana
  • VSI – Vocabolario dei dialetti della Svizzera italiana
  • DOSI – Documenti orali della Svizzera italiana