Chloster Fahr
S Chlooschter Fahr isch es Benediktinerinnechlooschter bi Underäigschtrige im Limettal.
wo s isch
[ändere | Quälltäxt bearbeite]S Areal vom Chlooschter ghört zu de politische Gmaind Würelos im Kanton Aargau. Es isch e chlini Enklave im Kanton Züri, ringsume isch de Gmeindsbann vo Nideräischtrige.
D Hüüser vom Chlooschter stönd am Fuess vom ene Abhang unden a de Autobahn A1H (Zuebringer Hardturm) am Rand vo de Limetebeni. Am südliche Chlooschterareal noo lauft de Bach Müligiesse, wo en chlini Sitearm vo der Limet isch.
d Gschicht
[ändere | Quälltäxt bearbeite]Es isch en Freiherr vo Rägeschbärg gsi, wo s Chlooschter anne 1130 gstiftet hät. De Name chunt devo, as döt scho denn e Fähre über d Limet gsi isch. Sone Fähre gits a däre Stell no hüt, es isch d Fähre «Mauritius» vom Wasserfahrverein Schliere und der Seepfadi Züri.[1]
S Chlooschter ghört sit sinere Gründig zum Chlooschter Äisidle und isch früener dur en Probst verwalted worde. De Abt vo Äisidle isch ofiziell au grad de Abt vo Fahr. D Chlooschterfraue wähled amigs sälber e Priorin. Sit 2003 isch da d Irene Gassmann.[2]
Am 22. Jänner 2009 hät de damalig Abt vo Aisidle, de Martin Werlen, em Fahr es neus Konväntsigel öbergee. Mit dere Sigelgwalt isch es de Benediktinerinne z Fahr noch 879 Johr Abhängigkait wider mögli, sälber rächtlechi Gschäft abzschlüüsse. En erschti Urkund mit eme alte Sigel isch us em Johr 1130.[3]
Em Chlooschter Fahr isch vo 1944 bis ane 2013 e Pürinneschuel aagschlosse gsii.[4]
Bis Endi 2007 hät s Areal vom Chlooschter gnau gnoo zu kainere Gmaind ghöört. Erscht 2008 isch es ofiziell em Gmaindsbann vo Würelos agschlosse worde.[2]
Em Chlooschter ghööre öppe füfzg Hektare Kulturland und füfedrissg Hektare Wald.
de Konvänt
[ändere | Quälltäxt bearbeite]D Chlooschterfraue tüend ires Läbe noch em Evangelium und de Regle vom Heilige Benedikt gstalte. Näbed de tägliche Gebätszite beschäftiged sich d Schwöschtere au mit Landwertschaft und Räbbau, und dezue psunders au mit de Herstellig vo liturgische Gwänder, de Paramänt.[5]
| Johr | 1873 | 2000 | 2012 | 2017 |
| Chlooschterfraue | 7 | 33 | 24 | 20 |
As Schriftstelleri isch d Schwöschter Maria Hedwig (1919–2011) under em Name Silja Walter bekant. Si hät au Mundartwärch gschribe.
Im Johr 2016 hät sich s Chlooschter idiell am Projekt Chile mit* de Fraue betailigt. Do dezue hät e Pilgerreis ghört, wo d Priorin Irene Gassmann de Wäägabschnitt vo Assisi bis uf Rom mitgloffe isch.
d Hüüser vom Chlooschter
[ändere | Quälltäxt bearbeite]S Chlooschter Fahr isch wien es chlises Dorf. Mit sine Konvänthüüser näbed de Chile und de andere Geböid innerhalb vo de Chlooschtermuur. Grad näbedra häts alles, wo für s Läbe vo de Gmeinschaft nötig gsi isch. Die schöni alti Bougruppe stoot im Bundesinventar vo de schützenswärte Ortsbilder ISOS.[6]
A de Muure vo der Chlooschterchile cha me grossi farbigi Moolereie gseh und de Chileruum innen isch riich usgschmückt.
Bim Chlooschter sind öppe zwänzg Näbehüüser, so wie d Propschtei, s St.-Anna-Chapeli, s Wirtshuus, die alti Müli, e Trotte, s Schuelhuus vo de ehmolige Pürinneschuel und no meh. Do devo stönd es paar uf zürcher Bode.[2]
Literatur
[ändere | Quälltäxt bearbeite]- Hélène Arnet: Chlooschter Fahr. In: Historisches Lexikon vo dr Schwiiz.
- Susann Bosshard-Kälin, Christoph Hammer: Im Fahr. 2019.
Weblink
[ändere | Quälltäxt bearbeite]
Commons: Chlooster Fahr – Sammlig vo MultimediadateieFuessnoote
[ändere | Quälltäxt bearbeite]- ↑ d Fähre Maurizius bim Chlooschter Fahr (Memento vom 4. Juli 2017 im Internet Archive) vom Wasserfahrverein Schliere
- ↑ 2,0 2,1 2,2 Priorin als Unternehmerin – VCU im Kloster Fahr Artikel i de Aargauer Zitig vom 27. Juni 2016
- ↑ Kloster Fahr erhält Siegelrecht zurück Artikel uf orden-online.de vom 24. Jänner 2009
- ↑ Nach 69 Jahren ist Schluss Artikel i de NZZ vom 29. Juli 2013
- ↑ Die Nonnen weben Gebete mit ein Artikel im Tagi vom 17. Dezember 2010
- ↑ Fahr, Kloster (Würenlos) PDF-Datei uf data.geo.admin.ch
