Chliine Zieglerhof
Koordinate: 47° 15′ 7,8″ N, 8° 41′ 33,2″ O; CH1903: 694918 / 234229
| Dialäkt: Züritüütsch |
De Chliini Zieglerhof isch es Landhuus z Mänidorf am Zürisee. Es isch am öschtliche Rand vom Dorf zwüsched em alte Leue und em Zieglerhof. Zäme mit em Zieglerhof und de Näbeboute gits es wichtigs Ensemble.
De chliini Zieglerhof staat traufständig a de Dorfgass. Uf de andere Siite isch de Garte, won bis an See gange isch (hüt no bis a d Seestraass). S Huus isch vilicht 1729 vom Jakob Christoph Ziegler als Lehehuus für de Zieglerhof poue la worde. Vilicht isch es aber scho vorane deet gstande und vom Hauptme Ziegler nume umpoue worde. En Änkel von em häts 1787 zäme mit em Zieglerhof für 17 000 Gulde em Adjutante und Landrichter Gerold Zuppinger verchauft.
Spööter, im 1806i, häd de Chasper Fierz im chliine Zieglerhof e Privatschuel mit 18 Schüeler eröffnet. Die Schuel häd bald en guete Ruef gha und scho im 1810i sind det 46 Chind id Schuel gange. Für Uswärtigi isch es Internat iigrichtet worde. Für das isch s Huus im klassizistische Stil umpoue worde und mer häd im Türsturz d Jaareszaal 1809 ine gmäislet.