Isabell Huber

D Isabell Huber (* 27. Augschte 1987 z Haalbrunn) isch e dytschi Bolitikeri (CDU) un syt Jänner 2019 Mitglid im Landdag vu Bade-Wirttebärg. Vu 2021 bis 2023 isch si Generalsekreteri vu dr CDU Bade-Wirttebärg gsii.

Lääbe

D Huber isch z Wüeschterot ufgwagse. Anne 2007 het si am Justinus-Kerner-Gimnasium z Weisberg s Abitur gmacht.

An dr Hochschuel Kähl het si ne Uusbildig zum ghobene Verwaltigsdienscht gmacht (Bachelor of Arts – Public Management) un derno vu 2011 bis 2015 bim Haupt- un Personalamt vu dr Stadtverwaltig Stuegert gschafft. Näb em Beruef het si 2013 bis 2016 an dr Hochschuel fir effentligi Verwaltig un Finanze z Ludisburg ne Master gmacht (Master of Arts – Public Management). Vu 2015 bis 2018 het si as Persenligi Mitarbaiteri vum Amtslaiter bim Haupt- un Personalamt vu dr Stadtverwaltig z Stuegert gschafft. 2018 bis aafangs 2019 isch si in Elterezyt gsii.

D Huber isch evangelisch, ghyrote un het zwai Chinder, e Dochter (* 2018) un e Suhn (* 2023).

Bolitik

D Isabell Huber isch vu 2013 bis 2014 Chraisvorsitzeri vu dr Junge Union z Haalbrunn gsii un vu 2013 bis 2015 Bysitzer im Bezirksverband Nordwirtebärg vu dr Junge Union. Vu 2013 bis 2015 isch si derzue Mitglid im Chraisvorstand vu dr CDU Haalbrunn gsii un Bysitzer im CDU-Bezirksverband Nordwirttebärg.

Bi dr Kommunalwahl 2019 isch si zur Ortschaftsreti vu Wüeschterot gwehlt wore un isch ab do stellverdrättendi Ortsvorsteheri gsii. Syt Merz 2024 isch d Huber Ortsvorsteheri vu Wüeschterot.

Bi dr Landdagswahl 2016 isch si im Wahlchrais Neckersulm as Ersatzkandidati vum Bernhard Lasotta aaadrätte, wu s Erschtmandat gwunne het. Wu dr Lasotta am 11. Jänner 2019 gstorbe isch, isch d Huber zum 22. Jänner in Landdag noogruckt. Im Landdag isch si Mitglid im Uusschuss fir Sozials un Integration un im Uusschuss fir Europa un Internationals.

Bi dr Landdagswahl 2021 isch si iber e Zwaitmandat im Wahlchrais Neckarsulm wider in Landdag gwehlt wore. Im Mai 2021 isch si as Noofolgeri vum Manuel Hagel zur kummissarische Generalsekreteri vu dr CDU Bade-Wirttebärg gwehlt wore. Im Novämber 2023 isch si in däm Amt dur d Nina Warken abglest wore.

Sunschtigs Engaschmänt

Mitglid bi dr Europa-Union Deutschland e. V.
Mitglid im Jugendförderverein Wüstenrot e. V.
2010 bis 2013: Landesgschäftsfiereri bi dr Junge Europäern - JEF Baden-Württemberg e. V.
2008 bis 2009: Stellverdrättendi Vorsitzeri vum Chraisverband Kähl vu dr Junge Europäer – JEF Baden-Württemberg e. V.

Weblink

Websyte vu dr Isabell Huber
d Isabell Huber uf dr Websyte vu dr CDU-Landdagsfraktion Bade-Wirttebärg
Abgordneteprofil bim Landdag Bade-Wirttebärg in dr 16. Wahlperiod
Michael Schwarz: Isabell Huber zieht für die CDU in den Landtag ein. stimme.de, 19. Jänner 2019