Hermann V. vu Bade
| Dialäkt: Undermarkgreflerisch |
Dr Markgrof Hermann V. vu Bade († 16. Jänner 1243) isch vu 1190 bis 1243 dr regiered Markgrof vu Verona un Bade gsi.
Är isch dr Suhn gsi vum Hermann IV. vu Bade un dr Bertha vu Dibenga. Um 1217 het er d Pfalzgrefi Irmengard bi Ryy (* um 1200; † 24. Februar 1260) ghyrote, d Dochter vum Pfalzgrof Heinrich I. bi Ryy, gnännt dr Lang.
Im dytsche Dronchrieg vu 1198 isch dr Hermann V. uf Syte vum Chenig Philipp gstande un 1208–1211 uf dr Syte vum Chaiser Otto IV.. Är isch au ne änge Verdröute vum Friedrich II. gsi.
Dr Hermann V. vu Bade isch dr Stadtgrinder vu Bagene, Pforze un Stuegert. Anne 1219 het er Pforze zue dr Residänzstadt vu dr Markgrofschaft Bade gmacht.
Anne 1218 het er uf d Erbaasprich z Zährige verzichtet un 1227 uf syyni Aasprich z Braunschweig. Derno isch er Grof vu dr Ortenau un vum Bryysgau wore. Dr Hermann IV. isch im Gfolg vum Friedrich II. in ganz Dytschland un z Italie unterwägs gsi un isch anne 1221 z Ägypte in Gfangeschaft grote. Är isch aini vu dr Gaisle gsi, wu em Sultan vu Ägypte ibergee wore sin.
Dr Hermann V. isch Rot am Hoft vum Chenig Heinrich VII. gsi, bis er mit däm Stryt iberchuu het. Anne 1235 isch er as Dailnämmer bim Mainzer Hoftdag gsi un bis 1238 im ängschte chaiserlige Gfolg. Är het wahrschyns an dr Abwährschlacht vu Liegnitz gege d Mongole dailgnuu.
Dr Hermann giltet as Ferderer vu dr Chleschter Maulbronn, Dännebach, Herrealb, Selz, Salem un Bagene. Syy Frau Irmengard bi Ryy giltet as Grinderi vum Chloschter Liechtedal z Bade in Bade, dr spetere Grablegi vu dr Markgrofe.
Dr Markgrof Hermann V. vu Bade isch im Auguschtiner-Koorherrestift Bagene begrabe gsi, bis syy Witfrau anne 1248 syy Lyycht ins Chloschter Liechtedal het iberfiere loo.
Us dr Eh mit dr Irmengard sin die Chinder fiirigange:
- Hermann, (* um 1225; † 4. Oktober 1250); speter regierede Markgrof
- Rudolf, (* um 1230; † 19. Novämber 1288); speter regierede Markgrof
- Mechthild, († um 1258) ∞ 4. April 1251 Grof Ulrich I. vu Wirttebärg (* um 1222; † 25. Februar 1265), gnännt dr Stifter.
- Elisabeth
- ∞ Graf Eberhard vu Eberstei
- ∞ Ludwig II. vu Lichteberg.
Weblink
[ändere | Quälltäxt bearbeite]| Vorgänger Hermann IV. |
Markgrof vu Bade Markgrof vu Verona 1190–1243 |
Nochfolger Hermann VI. |