Hadrian II.

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Dr Hadrian II. (* 792; † 14.Dezämber 872 z Rom) isch vu 867 bis 872 Papscht gsii.

Dr Hadrian II. isch us em remische Adelsgschlächt vu dr Colonna gsii un het as e versehnlig Papscht gulte. Des het sich dodra zaigt, ass er Biet, wu sy Nikolaus I. Aasprich druf gstellt ghaa het, wider freigee het, un au dodraa ass er in dr Frog vu dr slawische Liturgi yyglänkt het.

Wu dr Hadrian Prieschter woren isch, isch er no ghyrote gsii. Dr Papscht Gregor IV. het e zum Kardnial vu San Marco ernännt. Scho noch em Dod vum Leo IV. un au noch em Dod vum Benedikt III. isch er as Papscht vorgschlaa wore, het des aber sälber abglähnt. Noch em Dod vum Nikolaus I. am 13. Novämber 867 isch er derno aber ändgiltig vum Klerus un vun Volk gwehlt wore. Bi syre Wahl isch er 75 Johr alt gsii. Är het d Wahl aagnuu un isch derno am 14. Dezämber 867 indroonisiert wore. Churz no syre Indroonisation sin sy Frau un sy Dochter vum Eleutherus, eme Verwandte vum friejere Gegepapscht Anastasius III., umbrocht wore.

Em fränkische Chenig Lothar II. het er gstattet, ass sälle sy Brobläm het derfe vordrage, wel er syni chinderlosi Frau verstoße het. Au do het si dr Hadrian II. dytli kompromissberaiter zaigt wie sy Vorgänger Nikolaus I. En Entschaidig het s aber in däre Frog nimi bruucht, wel dr Lothar II. bal derno gstorben isch.

Dr Hadrian II. het dur d Hailigsprächig vu dr Äbtissi Walburga an eme 1. Mai dr Aalass gee fir dr hit no verbraitet Bruuch vu dr Walpurgisnacht, wu in dr Nacht vor em Patronatsfescht vu dr Walburga gfyyrt wird.

Anne 867 het er dr ehmolig Gegepapscht Anastasius III. zum Bibliothekar vu dr remische Chilche ernännt.

Literatur[ändere | Quälltäxt bearbeite]

  • Rudolf Schieffer: Hadrian II. In: Lexikon des Mittelalters, Bd. 4 (1989) Sp. 1822–1823.
  • Friedrich Wilhelm Bautz: Hadrian II. In: Biographisch-Bibliographisches Kirchenlexikon (BBKL). Band 2, Hamm 1990, ISBN 3-88309-032-8, Sp. 425–427.

Weblink[ändere | Quälltäxt bearbeite]

 Commons: Hadrian II. – Sammlig vo Multimediadateie


Information icon.svg Dä Artikel basiert uff ere fräie Übersetzig vu dere Version vum Artikel „Hadrian_II.“ vu de dütsche Wikipedia. E Liste vu de Autore un Versione isch do z finde.