Guet Rallige

Ds Guet Rallige isch e Landsitz z Merlige, wo zu der Gmeind Sigriswil ghört. Der Landsitz lyt diräkt am Thunersee im Kanton Bärn.

Gschicht

Ds Herrschaftsgeböide lat sech bis i ds 14. Jahrhundert zrügg verfolge u isch ursprünglech vom Chloschter Interlake als Räbguet bruucht worde. Nach der Reformation im Jahr 1528 het der Landsitz bis i ds 19. Jahrhundert de Parizier oder de Burger vo der Stadt Thun ghört. Irgendeinisch het du der Bärner Choufmee G. Chrischtian das Guet erworbe u het’s renoviert. Denn het im Guet Rallige lang e Handelsschuel gha. No hüt findet me im Herrschaftsgeböide Schriftstück us dere Zyt.

Syt em 1976 wird dä Landsitz als Chloschter bruucht u ghört der evangelische Kommunität vo de Chrischtusträger. Si bruuche ds Geböide als Gäschtehuus.

Gländ

Ds Herrschaftshuus

Im Herrschaftshuus gits zoberscht under em Dach e Kapälle. Dört bätte d Chrischtusträger zäme mit de Gescht drü mal am Tag. Zundersch isch der Spysaal mit Blick uf e Garte u uf e Thunersee. Uf der Ebeni vo der Reseption isch e Kafeteria mit Schouchäschte, wo d Gschicht vom Huus widergit. Zwüsche Spyssaal u Reseption het’s e Ruum mit em ne Schmine. Vo dert us chunnt me i gross Feschtsaal u zur Wändelträppe, wo me zu de Geschtezimmer im 1. Stock, zu de Privatrüüm im 2. Stock u i d Dachkapälle im 3. Stock chunnt.

Im 1. Stock gits e Bibliothek; die steit de Gescht wäret ihrem Ufenthalt zur Verfüegig. Näbscht biblischer Literatur finde sech dert ou Büecher für Chind.

D Wägkapälle

D Wägkapälle lyt e guets Stück oberhalb vom Herrschaftshuus. Si steit diräkt am Jakobswäg. Es handlet sech derby um ne ehemalige Stall. D Chrischtusträger hei dä zu nere Kapälle umboue. D Türe vo der Wägkapälle sy vom Dänkmalschutz. Es handlet sech um originali Stalltüre, wo me früecher vil bi Ställ gfunde het. Für d Kapälle chönne ufdue, muess me zersch der Rigel vom undere Teil vo der Stalltür gägen ufedrücke u ersch när cha me der Rigel vom undere Teil vo der Stalltür gäg ufe drücke u die ganz Tür uftue.

Im Innere findet me e Chrippe, wo im Winter e Jesusfigur im Stoh lyt. Zum Hocke het’s Strohballe u uf em ne Läsepult steit em Pilger zudäm e Bibel zur verfüegig. Über ne Stäge chunnt me bis zobersch i ds Dach vo der Wägkapälle. Vo dert us chame uf ds Herrschaftshuus u uf e Thunersee abeluege. Hinder de Stäge isch e Ruum, wo me cha Mateial abstelle oder e Gottesdienscht vorbereite.

Wyteri Geböide

Es git es Spilhuus für Chind. Es git ou e Jugendruum mit Tschütelichaschte u anderne Sache. Zudäm gits no eis zwöi wyteri Gäschtehüser.

Pilger u Wanderer

Für d Pilger wird wäret der Saison immer zwöi Zimmer reserviert, da derfür gits sogar Brueder, wo sech um d Pilger kümmeret.

Ds Grundstück isch grundsätzlech öffendlech, dass gilt sogar für e Garte. Allerdings wärde d Bsuecher u d Wanderer, wo nid als Gescht z Rallige sy, bätte, ds Herrschaftsgeböide u d Geschtehüser nid azluege. Das gilt natürlech nid für d Wägkapälle.

Verchersverbindige

D Verchersbetribe STI fahre mit der Böslinie 21 vo Thun us zwöi mal i der Stund Rallige a. Vo Interlaken us fahrt d Böslinie 21 all Stund richtig Rallige. U vo der Beatebucht us fahrt d Böslinie 21 zwöi mal i der Stund uf Rallige.

Vo Spiez us cha me im Summer mit em Schiff nach Gunte, Oberhofe, Beatebucht oder Merlige fahre u dert uf d Böslinie 21 umstyge. Ds Glyche geit ou vo Interlaken u Thun us.

Weblink

Commons: Gut Ralligen – Sammlig vo Multimediadateie