Dr Fischmäärtbrunne uf em Baasler Fischmäärt

Us der alemannische Wikipedia, der freie Dialäkt-Enzyklopedy

Koordinate: 47° 33′ 33,5″ N, 7° 35′ 12,8″ O; CH1903: 611159 / 267633

Dr Fischmäärtbrunne
Dialäkt: Baseldütsch

Dr Fischmäärtbrunne isch e groosse Brunne uf em alte Baasler Fischmäärt. Er gältet as dr schönst gotisch Brunne in dr Schwiz. Sit 1915 stoot er under Dänggmolschutz.

S Usgsee[ändere | Quälltäxt bearbeite]

Dr Brunne het e zwölfeggige Droog und dr Stock isch fast so hooch wie d Hüüser nääbedraa. Vo de vierezwanzig Figuure, won en emol verziert häi, so no zwäiäzwanzig übrig, drizää Ängel, won e baar von ene Baasler Wabbe drääge, säggs Häiligi und drei Brofeete. D Hauptfiguure si d Maria mit em Chind und eme Szepter in dr Hand, dr Petrus mit em Schlüssel und dr Evangelist Johannes. Dr Ängel uf em Spitz hebt e Zwiig von ere Palme in dr Hand.

Gschicht[ändere | Quälltäxt bearbeite]

Dr Brunne isch woorschinlig vom Johannes Parler (III.) us dr berüemte Baumäister- und Stäimetzfamilie vo de Parler gege s Ändi vom 14. Joorhundert baut worde.[1] Mä wäiss us em Joor 1476, ass er denn sis Wasser us em «Huus zu Sässel» am Dootegässli überchoo het. Er isch vor allem für d Fischverchöifer dört gsi, wo iiri Chääfig mit de lääbige Fisch in Brunne gstellt häi. D Bevölkerig het sit 1615 Wasser us eme chliinere Brunne nääbedraa chönne hoole, wo us em «Huus zem kalte Käller» (sit 1875 s «Marthastift») am Källergässli gspiist worde isch. Bis wit in d Nöizit isch die hügienischi Situazioon zimlig katastrofaal gsi. Wo zum Bischbil 1679 d Lüt sich über d Kwalideet vom Brunnewasser beklagt häi, het dr Brunnemäister uusegfunde, ass d Abtrittgruebe zu St. Peter überflosse isch. Sit 1869 isch s Wasser für e chlii Brunne vom groosse Brunne cho. 1874 häi d Brünne Grelliger Wasser überchoo und 1952 sin si an s stedtische Drucknetz aagschlosse worde.

Wo mä d Basler Börse baut het, het mä 1908 d Süüle, wo scho stark verwidderet gsi isch, ins Historische Museum brocht und e Kopii von ere gmacht. Mä het dr Brunne e baar Meter wiiter gege Nordweste mit ere Kopii vo dr Süüle uf em Blatz wider ufgstellt.[2] Vo 1971 bis 1974 isch dr Brunne renowiert worde und mä het drbii d Vergoldig ernöieret[1] und im Joor 2004 het men en no äinisch renowiert.[3]

Fuessnoote[ändere | Quälltäxt bearbeite]

  1. 1,0 1,1 Fischmarkt-Brunnen uf brunnenfuehrer.ch, abgrüeft am 12.1.2013
  2. Alter Fischmarkt (Memento vom 8. März 2016 im Internet Archive) uf basler-bauten.ch, abgrüeft am 12.1.2013
  3. Der Fischmarktbrunnen uf altbasel.ch