Fides vo Klinge

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

D Fides vo Klinge († am 28. Februar 1358 z Züri) isch vom Joor 1340 bis ane 1358 Äbtissi vom Fraumöischter z Züri gsi. Do dermit het si dört au als Stadtherrin gulte.

D Fides isch e Tochter vom Walter vo Klinge usem Thurgi gsi. Wo s Fraumöischter im Joor 1340 e nöii Äbtissi z bestimme gha get, sind grad zwo vo de Nonne gwält worde, d Fides vo Klinge und au d Beatrix vo Wolhuse. Dä Striit isch vore Kaiser Ludwig brocht worde, wo dä Fall em Berchtold vo Greyspach zum lööse gää het. Am 18. Dezämber 1341 het der Greyspach zu Gunschte vo de Fides entschyde.

Es isch e schwäri Zyt gsi für di nöi Vorsteheri. Wäge dr länge Vakanz het d Stadt Züri d Guetsheerschafte vom Fraumöischter lo überprüefe und d Uufsicht übers Chloschter a sich zoge. D Fides het sech als Äbtissi do dermit müesse abfinde. S Fraumöischtr het so wie d Stadt i sälere Zyt jo au vil duregmacht. D Pescht isch im 1348i cho, und Züri isch ine Chrieg verwicklet worde. Ane 1350 hets en Überfall i dr so gnänte Mordnacht vo Züri ggä, 1351 hend d Öschtriicher d Stadt belageret und 1352 s kaiserlige Heer. Das alls het derzue gfüert, ass us de Güeter ufem Land immer weniger Abgobe cho sind.

Drum het d Äbtissi alte Psitz vom Fraumöischter müesse verchaufe, zum Bischpil d Chile vo Horge un d Pfaarchile vom Sankt Peter z Züri. Ane 1358, ganz churz bevor d Fides gstorben isch, het ere wenigschtens dr Papscht Innozänz für ire Konvänt es Privileeg usgstellt, zum alle Psitz vom Fraumöischter z sichere.

Lueg au[ändere | Quälltäxt bearbeite]

Literatuur[ändere | Quälltäxt bearbeite]

  • Peter Vogelsanger: Zürich und sein Fraumünster. Eine elfhundertjährige Geschichte (853–1956). Zürich 1994, S. 173–188.
  • Helvetia Sacra, Abteilung III, Die Orden mit Benediktinerregel, Band 1, Dritter Teil. Francke Verlag, Bern 1986, S. 2008.

Weblink[ändere | Quälltäxt bearbeite]