Eurysthenes

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

De Eurysthenes (altgriechΕὐρυσθένης) isch i de griechische Mythologi e König vo Sparta und de Stammvatter vo de Agiade. Er hett zäme mit siim Zwillingsbrüeder Prokles gherrscht.

De Eurysthenes isch de Soo vom Aristodemos und vo de Argeia. Er isch mit de Anaxandra, de Töchter vom Thersandros, verhürootet und de Vatter vom Agis.

De Vatter vom Eurysthenes isch gstorbe bivor de uf d Welt cho isch oder chorz denoo. De Theras isch de Vormund vo de beede Buebe gsii und hett bis si mündig wore sind as Regent öber Sparta gherrscht. Di beede Brüedere sind verschide gsii und hend sich onöd guet möge. Und da söll de Grund sii, wege waa z Sparta immer zwee Könige gliichzittig ggee hett.

De Eurysthenes isch de älteri Zwilling gsii. Noch de spartanische Saag, wie si de Herodot öberlifert, isch de Aristodemos grad nochdem z Zwilling uf d Welt cho sind gstorbe. D Spartaner hend d Muetter gfröögt, wer de älteri sai, si het aber gmaint, si wössis nöd. S delphische Orakel hett uf Aafroog den agroote, as beed Buebe König were söli, de Älteri aber mee geert were söli. De Messenier Panites het ne denn groote, si sölid d Muetter biobachte, wie si mit de Chind umgoot. Do hend si gmerkt, as si de Eurysthenes immer zerst badet und gstillt hett. De Theras aber, de Brüder vo de Argeia, isch de Vormund gsii und hett bis si volljöörig wore sind, regiert.

De Eurysthenes und de Prokles sölid a de Spartaner d Verfassig ggee haa.[1], zodem söled si Lakonie i sechs Piet uuftailt und Stedt baut haa.[2] Da sind gsii d Königsstadt Sparta, Amyklai, de Hafe Las, Pharis mit de Schatzchammere und Aigys, wo s Her stationiert woren isch und Helos. De Agis, de Soo vom Eurysthenes heb da aber wider gänderet.

Quelle[ändere | Quälltäxt bearbeite]

Noowiis[ändere | Quälltäxt bearbeite]

  1. Hellanikos, FGrH 4 F 116.
  2. Ephoros, FGrH 4 F 116

Literatur[ändere | Quälltäxt bearbeite]

  • Mischa Meier: Eurysthenes. In: Der Neue Pauly (DNP). Band 4, Metzler, Stuttgart 1998, ISBN 3-476-01474-6, Sp. 304.