Amyklai

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Amyklai (altgriechἈμύκλαι f.Pl.) isch en Ort und Hailigtum im Antike Lakonie gsii. De Ort isch archäologisch noogwise und litt ufem Hügel Agia Kyriaki, östlich vom Fluss Eurotas, öppe fööf Kilometer süüdlich vom antike Sparta. De hüttig Ort Amikles isch erst i de Noizitt nochem antike Ort binamst wore.

Mythos[ändere | Quälltäxt bearbeite]

Nochem griechische Mythos isch Amyklai vom Amyklas gründet wore. De Apollon hett sich do in Hyakinthos verliebt, e Soo vom Amyklas. Bim Diskuswörffe isch de Hyakinthos töödlich vom Diskus vom Apollon troffe wore. Zu sinene Eere isch denn z Amyklai s Fest vo de Hyakinthia gfiiret wore. Im Schiffkatalog vom Homer werd Amyklai as e Stadt uufglistet, wo em Menelaos ghört hett.

Gschicht[ändere | Quälltäxt bearbeite]

Amyklai isch ahand vo archäologische Fund scho i de mykenische Zitt bisidlet gsii.

Noch de Saag söll de König Teleklos vo Sparta Amyklai eroberet haa, da wäär, sofern die Uusaag historisch gwertet were taar, im uusgeende 9. Joordhundert v. Chr. gsii. I de historische Zitt isch Amyklai aini vo de fööf spartanische obai gsii mit aigne Ephore und s isch vor alem s wichtigste Hailigtum vo de Spartaner gsii, wo jedes Joor d Hyakinthie gfiiret wore sind. Wäred dem Fest hend d Spartaner kai Chrieg gfüert. S Hailigtum vo Amyklai isch bis zo de Christianisierig bsuecht wore.

s Hailigtum[ändere | Quälltäxt bearbeite]

S Hailigtum vo Amyklai isch e Hain gsii, ooni Sakralbaute. Im Mittelpunkt isch de "Thron vom Apollon" gstande, e Komplex us Kultbilder und Statue wo um 530 v. Chr. errichtet woren isch. De isch vom Pausanias, wo im zwaite Joorhundert n. Chr. Amyklai bsuecht ghaa hett, gnoier bischribe wore. Dezue hett o s Grab vom Hyakinthos ghört mitemene Altoor.

Literatur[ändere | Quälltäxt bearbeite]

  • Yves Lafond: Amyklai. In: Der Neue Pauly (DNP). Band 1, Metzler, Stuttgart 1996, ISBN 3-476-01471-1, Sp. 634.