D Eberlerkapälle

Dialäkt: Baseldütsch

D Eberlerkapälle isch e Graabkapälle in dr Baasler Peterskiirche, wo dr Mathis Eberler zum Agtstäi 1474 het lo baue.

D Eberlerkapälle isch 1474/75 vom Baasler Archidekt Remigius Faesch as Mariekapälle baut worde, für e Mathis Eberler und si Familie, und mit e Hufe Wandmoolereie dekoriert worde. Vil vo däm isch aber in Umbaute, im reformatorische Bildersturm und vil spööter denn, 1909, wo mä dört e Häizruum und Koolelaager iigrichdet het, zerstöört worde.

Im Früelig vo 1915 isch d Kapälle, wo mä 1909 zuegmuurt het, under dr Läitig vom Brofässer Stückelbärg wider ufdoo worde und mä het drbii d Grabblatte vo de Eberler mit iirem Vollwabbe im Rölief widerentdeggt und sä in dr früenere Tresskammere (Sakristei) vo dr Stiftskiirche ufgstellt.^[1]

In de 1930er Joor het dr Baasler Dänggmolpflääger, der Rudolf Riggebach, wo in dr Stadt as «Dingedinge» bekannt gsi isch, wil er bi sine öffentlige Vordrääg immer wider emol e Begriff vergässe het und denn «… e Ding, e Ding …» gsäit het, d Restaurazioon vo dr Kapälle voraadriibe mit Hilf vom Arbetsrabbe. Vom Novämber 1940 aa het mä d Wandmoolereie wider chönne go bschaue, drunder Mariebilder vo öbben em Joor 1400 in dr Zibolnische, wo vom ene Wandpfiiler vo dr Eberlerkapälle versteggt worde si.^[2]