Dorothea Liebermann-Meffert

D Dorothea Liebermann-Meffert (* 6. Mai 1930 z Raschti as Dorothea Meffert; † 3. Septämber 2020 z Opfige) isch e dytschi Chirurgi gsii.

Lääbe

D Dorothea Meffert isch e Doochter vum Chirurg Karl Peter Meffert gsii, wu 1934 Schefdokter im Stedtische Chrankehuus vu Säckinge wooren isch. Si isch deert uf d Schuel gange un derzue au uf d Chunschtschuel vum Ernst Honigberger z Wäär. Si het e Hufe Porträt zaichnet, het Eelbilder gmoolt un bi Chunschtuusstellige mitgmacht. Noch em Abituur het si ab 1949 an dr Uniwersiteet Fryburg Mediziin studiert. Z Züri un z Paris het si Uuslandssemeschter gmacht. Si het anne 1955 z Fryburg s Staatsexame bstande un isch deert zur Dr. med. promowiert woore. D Bfliichtassischtänzzyt het si in dr Innere Mediziin vum Uniwersiteetsklinikum Fryburg verbrocht. Derno het si bim Vatewr z Säckinge, z Züri, z Paris un z Fryburg Chirurgi gleert. Anne1964 het si ne wisseschaftlgi Assischtänzstell in dr Fryburger Anatomy iiberchuu.

Anne 1965 isch si Fachdokteri fir Chirurgy woore. Ire Gsuech um e Assischtänzstell in dr Chirurgische Uniwersitetsklinik Fryburg isch vum Klinikdiräkter abglähnt woore, wel er kaini Fraue unter dr Dekter het welle. Wäge däm isch d Liebermann-Meffert am Anatoomische Inschtitut bliibe. Ire Schwäärpunkt isch uf dr makroskoopische Anatomy un Preparierkiirs glääg. Iri wisseschaftlige Aarbete hän derzue gfiert, ass ere dr Martin Allgöwer anne 1970 e Stell z Baasel aabote het. S anatoomisch Wisse, wu si z Fryburg gwunne het, hän ere bim Operiere ghulfe, un au ass si boodhändig gsii isch. Zue dr Aerbet im Operazioonssaal sin anderi wisseschaftligei Experimänt, Untersuechige un Vereffetlichunge chuu. Dr Allgöwer het au iri „uusgsprocheni graafischi un zaichnerischi Begaabig“ bewunderet. Anne 1977 het si d Liebermann-Meffert an dr Uniwersiteet Baasel chenne habilitiere. No dr Emeritierig vum Allgöwer isch si anne 1987 an d TU Minche gwägslet. No dr Umhabilitzioon vu Baasel uf Minchce het si 1989 d Lehrbefugnis fir Experimäntälli Chirurgy iiberchuu.

Anne 1992 isch si zur uuserblaanmääßige Brofässeri ernännt woore. Au no ire Pänsionierig het si no langi Johr wytergmacht mit ire beliebte „Nohtkiirs“ fir jungi Assischtänte*ne un Studänte*ne z Minche. As langjehrigi Chronischti vu dr International Society of Surgery het si ne Feschtschrift zue dr Hundertjohrfyyr uusgschafft. 2003/04 isch si Gaschtbrofässeri bim Tom Ryan DeMeester am Department of Surgery vu dr University of Southern California gsii, wu si ai speeter no ne baar Mool gsii isch.

Si isch syter anne 1956 ghyroote gsi mit em Eduard Liebermann, wu zletscht Bresidänt vum Verwaltigsgriicht Charlsrue gsii isch. Si het drei Deechtere un e Suhn ghaa.

Mitgliidschafte un Bryys

• Oordeli Mitgliid vu dr Dytsche Gsellschaft fir Chirurgy (1969)
• Eerschte Uusstelligsbryys vu dr Dytsche Gsellschaft fir Chirurgy, fir „Untersuchungen zur Pathophysiologie der Verbrennungskrankheit“ (1977)
• International Society of Surgery (1986)
• Fellow vum American College of Surgeons (1995)
• Member of the International Gastric Center Association (Kyoto, 1995)
• Woman of the Year (1998), American Biographical Institute
• 21st Century Award for Achievement / Illuminated Diploma of Honour (International Biographical Center of Cambridge, 2003)
• Ehremitgliid vu dr International Society of Surgery (2013), as eerschti Frau

Vereffetlichunge

• mit em Harvey White un em Ekkehard Vaubel: The Greater Omentum. Anatomy, Physiology, Pathology, Surgery. With an Historical Survey. Springer, Berlin New York 1983, ISBN 978-3-662-02374-7.
• mit em Hubert Stein: Rudolf Nissen and the World Revolution of Fundoplication. Johann Ambrosius Barth Verlag, 1999.
• A Century of International Progress and Tradition in Surgery. An Illustrated History of the International Society of Surgery. Kaden Verlag Heidelberg, 2001.

Fueßnote

Dä Artikel basiert uff ere fräie Übersetzig vu dere Version vum Artikel „Dorothea_Liebermann-Meffert“ vu de dütsche Wikipedia. E Liste vu de Autore un Versione isch do z finde.