Die beiden Blinden

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Dr Kombonischt vo deam Werk uff-ma Fodole vom Félix Nadar
Dialäkt: Schwäbisch
S Titlbild vom Klaviirauszug vom Einakter Die beiden Blinden

Die beiden Blinden (Originaltitl: Les deux aveugles, schwäbisch kennt-mr Selle zwoi Blende drzua saga) ischt a franzeesischa Operedde en oim Uffzug vom Kombonischda Jacques Offenbach.[1] S Libreddo stammt em franzeesischa Original vom Jules Monaux ond en dr deitscha Fassong vom Friedrich Wittmann. Zom erschda Mol ibr d Bihne ganga isch des Werk am 5. Juli 1855 em Kombonischda seim oigena Théâtre des Bouffes-Parisiens en Paris. A Uffihrong dauret rond 25 Menudda.

Orkeschtr[ändere | Quälltäxt bearbeite]

Firs Orkeschtr braucht-mr zwoi Fleeda, oi Oboe, zwoi Klarinedda, oi Fagott, zwoi Herner, zwoi Kornett, oi Posaun ond a kloina Streichergrubbe. Fir de deitsch-sprochig Premiere en Wien hot dr Karl Binder des Werk fir a baar andre Instrument omorkeschtriirt, damit’s besser em eschtreichischa Gschmack entgegakomma ischt. Dui Bearbeidong spiilt heitzodag abr koi Roll meh.

Persona vo dr Handlong[ändere | Quälltäxt bearbeite]

(Gnannt werdet dia Nama zerscht en dr Originalfassong ond drhendr en dr deitscha Fassong)

  • Patachon – Kümmelberger: Tenor
  • Giraffier – Jerzabek: Tenor
  • Drzua kommet noh a baar Persona, wo Passanda spiilet, wo abr weder Schwätza noch Senga därfet.[2]

Ort ond Zeit[ändere | Quälltäxt bearbeite]

Dui Gschicht spiilt em Johr vo dr Uruffihrong (1855) uff-ra Bruck en dr franzeesischa Hauptstadt. Wuud dui Operedde em deitschsprochiga Raum uffgfihrt, wird en dr Regl irgend-a andra Großstadt gnomma, weil d Persona vo dr Handlong en dr deitscha Fassong au deitsche Nama traget.

Handlong[ändere | Quälltäxt bearbeite]

Uff dr Bihne standet zwoi Musikanda. Jeder hot a Instrument en dr Hand ond uff dr Bruschtseit a Schild, wo se sich als Blende druff bezeichnet. Noh vor kurzer Zeit hend sich selle Kerle als Taube ausgwiisa ghet. En Wirklichkeit abr ischt sowohl ihr Gheer wia au ihr Sehvormeega en beschder Ordnong. Se glaubet abr, als Behinderde meh Erfolg mit ihrer Beddelei zo han. Do drbei gennt koiner em andra ebbes. Drom beschempfet se sich gegaseidich uffs Hefdigschde.

Quell[ändere | Quälltäxt bearbeite]

  • Hellmuth Steger, Karl Howe: Operettenführer – Von Offenbach bis zum Musical, Fischer Bücherei Frankfurt am Main, November 1958, S. 124.

Litradur[ändere | Quälltäxt bearbeite]

  • Jacques Offenbach: Die beiden Blinden. = Les deux aveugles (= Bibliothek einaktiger Operetten in vollständigen Klavier-Auszügen mit gesungenem und gesprochenem Text.) Tekscht vom Jules Moinaux ond vom Carl Friedrich Wittmann mit-em vollstendiga Klaviir-Auszug mit-em deitscha ond-em franzeesischa Tekscht. Bote & Bock, Berlin 1940.

Weblink[ändere | Quälltäxt bearbeite]

 Commons: Les Deux Aveugles – Sammlig vo Multimediadateie

Fuaßnoda[ändere | Quälltäxt bearbeite]

  1. Dr Kombonischt selber hot sei Werk als bouffonerie musicale bezeichnet.
  2. Zor Not ko dia Passanda au emmr drselbe Darsteller spiila, wenn’r sich zwischdure a bissle anderscht vorkloidet.