Christoph Trummer
Dr Christoph Trummer (* 1978 z Frutige) isch e Bärner Musiker und Mundartsänger.
s Läbe und s Schaffe[ändere | Quälltäxt bearbeite]
Dr Trummer chunt usem Bärner Oberland und het zerscht s Lehrerseminar bsuecht und als Primarlehrer gschaffet. Er het s ehemolige Singer/Songwriterfestival z Frutige, wo si Vatter mit ufbout het, erläpt, und so het er sech immer meh für d Musig intressiert. Scho gly het er bi divärse Bänds Hardrockmusig gmacht und isch öppen au z Thun unden ufträtte. Sid anne 2002 isch er als Sänger und Liedermacher uf dr Büüni gstande, d Lieder sind am Afang uf Änglisch gsi. Mit em erschte Album, wo anne 2002 im Mokka z Thun vorgstellt worden isch, het er uf ere Turnee grad ganz e grossen Erfolg gha.
Anne 2004 isch bim Leibel Sound Service d Schallplatte Night Light usecho. Drufabe het dr Trummer als Musiker i verschidene Länder gläbt, zwöi Joor i den USA, und drno z Kenia, z Tunesie und no a andernen Oort. Er seit sälber, dozmol sig d Folkgitarre-Musig sin Styl gsi.
2007 het dr Christoph Trummer s erschte bärndütschen Album useprocht, das heisst Im Schatte vo däm Bärg. D Lieder do druff, wo dr Trummer mit verschidene anderne Musiker wie de Sängerinne Claire Bowmann und Valeska Steiner ufgnoo het, chame online, uf dr Syte im-schatte-vo-d-m-b-rg, lose – und chaufe.[1]
Für d Mundartkultur het dr Trummer öppis schöns gmacht, won er d Gedicht vo dr Frutigtaler Dichterin Maria Lauber (1891–1973) verdoont het. Die Lieder tuet er mit dr Sängerin Nadja Stoller vorträge.
Dr Künschtler, wo z Habstette bi Bollige woont, schaffet z Bärn näbem Musiziere deilzytlech als Theatermacher. Anne 2011 het är vo dr SUISA-Stiftig en Pryys übercho. Er isch bis im Novämber 2017 Presidänt bim Verband Musikschaffende Schweiz gsi, wo 2011 gründet worden isch.[2][3] Sider isch er Mitarbeiter bim Bruefsverband SONART.[4]
Wärch[ändere | Quälltäxt bearbeite]
- Im Schatte vo däm Bärg[5]
- Verdoonig vo Tegscht us: Maria Lauber – Ischt net mys Tel emitts[6]
- Heldelieder
- Fürne Königin
- Texte Mundart
- Dr ganz Wäg zrügg
- Trummers Labor1 – Amne sichere Ort
- Loryplatz
Weblink[ändere | Quälltäxt bearbeite]
- d Website vom Christoph Trummer
- Mathias Morgenthaler: «Ich weiss… ich kenne das… du bist nicht allein uf beruf-berufung.ch vom 23. Novämber 2013
- Christoph Trummer uf afondheart.ch
- Christoph Trummer uf playmusicagency.ch
Fuessnoote[ändere | Quälltäxt bearbeite]
- ↑ Lieder vom Album Im Schatte vo däm Bärg uf trummer.bandcamp.com
- ↑ Christoph Trummer, Presidänt vo Musikschaffende Schweiz (Memento vom 12. Augschte 2018 im Internet Archive)
- ↑ Über uns uf sonart.swiss abgruefen am 9. Novämber 2020
- ↑ Mitarbeitende & Gremien, Christoph Trummer, Leiter politische Projekte uf sonart.swiss abgruefen am 9. Novämber 2020
- ↑ Im Schatte vo däm Bärg uf trummer.bandcamp.com
- ↑ Tegscht als Nöiusgab bim Zytglogge-Verlag, Bärn 2016. ISBN 978-3-7296-0928-0