Christoph Merian Verlag
| Christoph Merian Verlag | |
|---|---|
| Unternähmensform | Stifdig |
| Gründig | 1973 |
| Sitz | Baasel, Schwiiz |
| Mitarbeiter | 6 |
| Branche | Verlaag |
| Produkt |
Büecher |
| Uffdritt im Netz | [1] |
| Dialäkt: Baseldütsch |
Dr Christoph Merian Verlag (CMV) isch e Schwizer Verlag mit säggs Mitarbäiter (2009). Si Sitz isch im Huus zum Suusebärg an dr Dalbe-Vorstadt 5 z Baasel.[1] Dr Verlag isch en Undernääme vo dr Christoph Merian Stifdig.
Dr Verlag isch gründet worde, wo d Christoph Merian Stifdig s Baasler Stadtbuech im Joor 1973 übernoo het. S Baasler Stadtbuech (bis 1959 Baasler Joorbuech) isch 1875 as e tüpischs gschichtsorientierts, nazionalstaatligs und lokalpatriotischs Periodikum entstande, wo vom Historismus vom 19. Joorhundert brägt gsi isch. Am Aafang vo de 1970er Joor het dr domoolig Herusgääber s Stadtbuech finanziell nüm chönne drääge und es isch drvor gstande iigstellt z wärde. In dere Zit het d CMS, wo bis denn vor allem im soziale Beriich däätig gsi isch, iir Wirkigsfäld wägen em gsellschaftlige Umbruch um kulturell-urbani Aktividääte erwiteret, zum «das städtische Bewusstsein der Einwohner Basels zu vertiefen». S Stadtbuech het ere as e wärtvolls Middel gschune für säl Ziil und si het sich entschlosse, es mit eme nöije und aktualidäätsbezogene Konzept z ediere.
Zum für d Produkzion und dr Verdriib nit uf e bishärig Verlag aagwiise z si und zum äigeni Buechbrojekt chönne realisiere, het d Stifdig 1976 dr Christoph Merian Verlag gründet, wo no in däm Joor die Baaseldütsch Grammatik vom Rudolf Suter uusegee het. S Verlagsbrogramm isch bis vor e baar Joor von ere Begläitkommission gstüürt worde; hüte entschäidet dr Verlag sälbständig drüber. Dr Verlag isch e Gschäftsberiich vo dr Stifdig und operiert noch betriibswirtschaftlige und branscheüüblige Grundsetz. Er git aber im Sinn vo dr Stifdig au Publikazioone uuse, wo kä Gwünn bringe, under dene s erwäänte Baasler Stadtbuech. D Jooreschroniken vom Baasler Stadtbuech vo 1882 bis 2010 si im Internet gratis zuegänglig und wärde sit 2011 unabhängig vom Stadtbuech as äigene Website fortgfüert.
Dr Verlag isch bekannt für Publikazioone, wo sorgfältig härgstellt si, was dr Teggst, d Gstaltig und d Druckkwalidäät betrifft. In de letschte Joor het er sich mee und mee uf en internazionali Lääserschaft usgrichdet. Am Aafang häi Büecher über regionalspezifischi Themene («Basiliensia») und die sozialethische Publikazione vo dr Stifdig dominiert, sit 1996 häi sich d Schwerpünkt em Publikumsinträssi aabasst. D Räije «Kinderbüecher» und «Schwizerischi Populärgschicht» si iigstellt worde. Die aktuelle Schwerpünkt si – näbe Publikazione über d Region Baasel/Oberrhii – vor allem Fotografii, Kunst und Archidektur, wo zum Däil in Kooperazion mit bekannte Instituzione entstöön. In dene Segmänt wärde jedes Joor zwüsche 20 und 30 Ditel broduziert. Sit 2005 entstöön usserdäm öbbe e Dotzed Hörbüecher in Zämmenaarbet mit em Schwizer Radio DRS. Dr Christoph Merian Verlag isch under anderem an dr Frankfurter Buechmäss und an dr Buechbaasel verdräte.
Litratuur
[ändere | Quälltäxt bearbeite]- Christoph Merian Stiftung (Hrsg.): Basler Stadtbuch 1973. Basel 1974, S. 7–10
- Christoph Merian Stiftung (Hrsg.): Basler Stadtbuch 2003. Basel 2004, S. 86–87.
Weblingg
[ändere | Quälltäxt bearbeite]- D Website vom Christoph Merian Verlag
- Basler Chronik mit alle Chronik-Iidrääg vom Baasler Stadtbuech sit 1882
Fuessnoote
[ändere | Quälltäxt bearbeite]
|
Dä Artikel basiert uff ere fräie Übersetzig vu dere Version vum Artikel „Christoph_Merian_Verlag“ vu de dütsche Wikipedia. E Liste vu de Autore un Versione isch do z finde. |