BuechBasel

D Buechmäss an dr Buechbaasel 2010

Dialäkt: Baseldütsch

D BuechBasel isch e Litratuurfestiwal z Basel, wo internazionali und umfassendi Aasprüch macht. Si isch vo 2003 bis 2011 zämme mit ere Buechmäss organisiert worde. S Brogramm isch s, möögligst vili Facette vom Buech und Medie, wo mit em verwandt si, vorzstelle. An dr BuechBasel wird in Zämmenarbet mit em Schwizerische Buechhändler- und Verleeger-Verband dr Schwizer Buechbriis vergee. E «Symposion» mit themebundene Vordrääg und e Bruefsinformazionsbörse si Däil vo de Veraastaltige. D Dräägerschaft vo dr BuechBasel isch dr Veräin «LiteraturBasel».

Gschicht

1998 het dr Matthyas Jenni dr Aastoos für s Litratuurfestiwal gee und 2003 het er s denn fertigbrocht, d Mäss Schwiz AG für e Buech- und Mediemäss z intressiere, wo denn jedes Joor parallel zum Festival stattgfunde het und bis 2007 vom Jenny gläitet worde isch. D Mäss Schwiz AG het s in däm Joor us finanzielle Gründ abgleent, d Buechmäss in iire Halle abzhalte. D Laitig vo dr BuechBasel het s Konzept gänderet und d Mäss under de Nääme «BucH.08» und «BucH.09» in de neggste zwäi Joor organisiert. D Mäss und s Festiwal si vom Verleeger Egon Ammann gläitet worde. Denn het mä s Konzept under em Felix Werner wider gänderet und sit 2010 isch d Mäss under em ursprünglige Naame BuechBasel abghalte worde.

2012 isch d Mäss wäge finanzielle Schwiirikäite nid duuregfüert worde. D Katrin Eckert vom Literatuurhuus Basel het s Festiwal in däm Joor gläitet, wo dr Peter von Matt drbii dr Schwizer Buechbriis 2012 überchoo het. S Festiwal het fast 100 Veraastaltige an de underschiidliste Ört in dr Stadt organisiert und mä het öbbe 6'000 Iidritt zelt.

Weblingg

• Homepage der BuchBasel
• Homepage des Vereins LiteraturBasel

Fuessnoote

Dä Artikel basiert uff ere fräie Übersetzig vum Artikel „BuchBasel“ vu de dütsche Wikipedia. E Liste vu de Autore un Versione isch do z finde.