Chocolat Suchard

D Chocolat Suchard isch e Schwiizer Schoggifabrigg z Nöieburg gsi.

Der Konditer Philippe Suchard (1797–1884) vo Boudry het anne 1826 z Serrières bi Nöieburg es chlyses Atelier gründet zum d Waare für d Konditorey, won i der Stadt gsi isch, z mache. D Firma het divärsi Läbensmiddel härgstellt, aber vo Afang a isch d Schoggi im Zäntrum vo der Produkzioon gstande.

Der Suchard het sech für innovatyvi Sache inträssiert; ane 1834 het er ufem Nöieburgersee eis vo de erschte Tampfschiff lo fahre, und er isch au grad sälber der Kapitään vo dämm gsi. Em Schiff het er der Name L’Industriel ggää. Im Joor 1826 het der Suchard i sym Wärk e nöji Technik ygfüert zum s Gaggopulver und der Zucker besser underenand z rüere – de Suchard hät däre Maschine „Mélangeur“ gseit. Mit der Zyt isch Suchard e grossi Margge für Schwiizer Schoggi worde. Uf der Induschtryuusstellig vo 1851 z London het si e Guldmedalie übercho, und uf der grosse Wältuusstellig z Paris anne 1855 au wider. Scho im 19. Joorhundert het si e zwöiti Fabrigg z Lörech gründet, und gly drufabe anderi z Öschtrych und z Frankrych. Au z Serrières het s Undernääme wyter bout: 1906 isch die uuffelligi, grossi Rooti Fabrigg entstande.

1901 het Suchard d Margge Milka für ihri nöji Milchschoggi ygfüert, 1931 isch d Täfelisorte Sugus derzue cho. 1970 het d Nöieburger Fabrigg mit der Bärner Schoggifabrigg Tobler fusioniert, und sider het d Firma Interfood SA gheisse. Bekanti Margge vo dere sind d Toblerone, d La-Do-Re und s Schoggigetränk Suchard Express gsi.

1982 isch d Firma e Deil vom Undernääme Jacobs Suchard SA gsi, wo synersyts am Änd vom 20. Joorhundert vo der Zigerettefabrigg Philip Morris Companies übernoo worden isch, und jetz het mä d Schoggiprodukzioon z Nöieburg ufggää. S Undernääme vo der Läbensmiddelinduschtry het denn zytewys Kraft General Foods und derno Kraft Foods gheisse, und sid 2012 ghört d Suchard em Wältkonzärn Mondelēz International. Dä het vil Margge vo der alte Schoggifabrigg 2017 em französische Konzärn Carambar & Co verchauft.

Es isch de Inträssänte für die nöieburgisch Wirtschaftsgschicht glunge, alti Dokumänt us der Gschicht vo der Schoggifabrigg z Serrières am Stadtarchiv Nöieburg, em Kunscht-und Gschichtsmuseum Nöieburg und der Biblioteek vo Schodfoo z übergää.

• 
  e Wärbezedel vo Suchard usem 19. Joorhundert
• 
  d Dafele z Boudry, wo an Philippe Suchard erinneret
• 
  d Schoggi Milka
• 
  die rooti Schoggifabrigg vo Serrières

Literatur

• Vincent Callet-Molin: Suchard. In: Historisches Lexikon vo dr Schwiiz.
• Vincent Callet-Molin: Suchard, Philippe. In: Historisches Lexikon vo dr Schwiiz.
• Jean-Bernard Vuillème: Philippe Suchard, chocolatier, industriel (1797–1884). In: Biographies neuchâteloises, Bd. 2. Hauterive 1998, S. 287–293.
• Claire-Aline Nussbaum, Laurent Tissot: Suchard. Entreprise familiale de chocolat, 1826–1938. Naissance d’une multinationale suisse. Neuchâtel 2005.

Weblink

 Commons: Suchard – Sammlig vo Multimediadateie