Schiff

Us der alemannische Wikipedia, der freie Dialäkt-Enzyklopedy
s Passaschierschiff Queen Mary 2
dr Schlepper Fairplay 26 i dr Oschtsee

E Schiff isch e grosses Wasserfaarzüüg, wo noch em archimedische Prinzip schwümmt. Es underschaäidet sich vom Floss, wil s en äigene Aadriib het, und vom Boot in erster Linie wäge sinere Gröössi.

Wirtschaft[ändere | Quälltäxt bearbeite]

Schiff wärde in Wärfte baut. Wenn dr Rumpf fertig isch, loot me s Schiff bim Stapellauf i s Wasser, und denn tuet me s taufe und erst nochär wird s fertig usgrüschdet. Der erchste Reis vom ene Schiff seit me «Jumpferefaart». Zum es Schiff repariere, chunnt s mäischtens in e Drochedock oder e Schwümmdock.

Schiff sin s wichdigschte Transportmiddel für Massegüeter. Stückguet wird hützudags vor allem in Kontainer uf Containerschiff transportiert. Die grööschte Schiff sin d Ööltanker, wo mee as 560'000 tdw (Tons Deadweight) oder öbbe 100'000 BRT (Bruttoregisterdonne) chönne ha.

Sit spöötischtens de 1960er Joore stoot d Passaschierschifffaart mee und mee im ene Konkurränzkampf mit em Flugverkeer. Si wird wäge däm us eme räine Transbortmiddel imer mee zum ene vilsytige Verkeersmiddel, bsunders im Berych Erlääbnisräise und Chrüzfaarte.

Im Betriib het es Schiff als Kennzeiche en Fahne ufghänkt.

dr Radtampfer Uri ufem Vierwaldstettersee bi Flüelä

Aarte vo Schiff[ändere | Quälltäxt bearbeite]

Schiff, wo über s Meer faare, wärde au as Seeschiff bezäichnet, die andere, wo nume uf de Flüss und de Seeü faare, häisse Binneschiff.

Technik[ändere | Quälltäxt bearbeite]

Mit de spezielle Määss wird e Schiff genauer beschriibe.

Doodrzue ghööre zer Hauptsach:

  • d Verdrängig
  • d Traggfähikäit
  • dr Ruumghalt
  • d Tonnaasche
  • d Brutto- und d Nettoruumzaal (BRZ, NRZ)
  • dr Diefgang
  • verschiideni Lengiaagoobe

Dr Ufbau vom ene Schiff[ändere | Quälltäxt bearbeite]

d Schiffsdäili
  1. Dr Bug isch dr vorderi Däil vom Schiffsrumpf.
  2. Dr Bugwulscht verbesseret d Ströömigsäigeschafte und sänggt dr Verbruuch vo Trybstoff.
  3. Mit em Anker wird s Schiff am Boode vom Wasser festgmacht, wenn s nit faart.
  4. D Backbordsyte isch die linggi Syte vom Schiff, wemmä vom Heck gegen e Bug luegt. I der Nacht kennzäichnet mä sä mit eme roote Liecht.
  5. D Stüürbordsyte isch em Schiff syni rächti Syte, wemmä vom Heck gegen e Bug luegt. I der Nacht hät’s dört es grüens Liecht.
  6. S Heck isch dr hinderi Däil vom Schiff.
  7. S Oberdeck isch s Deck, wo dr Rumpf gegen oobe zuemacht.
  8. D Ufbaute si alli Ufbaute ooben uff em Oberdeck.
  9. E Motorschiff wird mit eme Propäller oder ere Schiffsschruube oder ere Wasserdüüse aatriibe; S Tampfschiff het e Tampfmaschine und e Propäller oder es Atriibsrad; es git grossi Meerschiff mit Atomatriib.
  10. D Abgaas vom Schiffsmotor wärde über e Chemmi abgläitet.

Weblingg[ändere | Quälltäxt bearbeite]

 Commons: Schiff – Sammlig vo Multimediadateie