Biermösl Blòsn

Biermösl Blosn

D Biermösl Blosn un dè Gerhard Polt 2010 im Münchner Volkstheater D Biermösl Blosn un dè Gerhard Polt 2010 im Münchner Volkstheater
Allgmeini Informatione
Härkumft	Günzlhoffè, Bayern, Dütschland
Genre	Volksmusig, Kabarètt
Gründig	1976
Uuflöösig	2012
Website	www.biermoesl-blosn.de
Gründungsmitglider
Baridon, Tuba, Flötè, Banjo, Drèèleièrè, Cello, Tenor-Jagdhorn, Bariton-Alphorn	Michael Well
Harfè, Giigè, Flötè, Gitarrè, Hackbrètt, Zither, Dudelsack, Ballaschtsitè, Tuba, Baridon-Jagdhorn, Sopran-Alphorn, Bacdrumbeetè	Chrischtoph „Stofferl“ Well
Gitarrè, Steirisches Akkordeon, Saxophon, Drumbeetè, Braatschè, Sopran-Jagdhorn, Tenor-Alphorn	Hans Well

D Biermösl Blòsn sin è bayrische Musig- un Kabarèttgruppè gsi, wo 1976 vo dè Well-Brüèder Hans (* 1953), Chrischtoph (* 1959) un Michael Well (* 1958) gründèt worrè sin. S Biermösl (hochdütsch: Beerenmoos) isch èn Deil vom Haschplmoor im Landchrais Fürschtèfäldbrugg. Blòsn (Blòs) isch èn bairischè Begriff für è Cliquè, Gruppè. D Grupp hèt bayrischi Volksmusig (Stubnmusi) un Mundart mit bolitischè un satirischè Tegscht vobundè un isch ein vo dè Wägbereiter vo dè asè benamstè Neuè Volksmusig. Am 18. Januar 2012 hèt d Band iri letschtes Konzèrt z Fürth gää.

Bandgschichtè

Diè drei Mitglyder vo dè Biermösl Blòsn chömmèd us dè 17-köpfigè Familliè vom Schuèlmeischter Hermann Well (1913–1996) un sinèrè Frau Traudl (geboreni Effinger, 1919–2015) uss èm Dorf Günzlhoffè bi Fürschtèfäldbrugg.

• Chrischtoph Well (Stofferl dauft, * 3. Dezembèr 1959 z Günzlhoffè) hèt Drumbeetè studyrt un isch Solodrumbeeter bi dè Münchner Philharmoniker un spôter Konzèrtharfèschpiller gsi.
• Michael Well (* 10. Oktobèr 1958 z Günzlhoffè) hèt è Uusbildung zum Solotubischt un Baritonischt, in isch ebbèfalls bi dè Münchner Philharmoniker gsi.
• Hans Well (* 1. Mai 1953 z Willprechtszèll), er hèt Germanischtik un Gschichte studyrt, un isch hauptsächlich für d Tegscht vo dè Gruppè voantwortlich gsi.

Großes Vorbild vo dè drei Brüèder isch dè Kraudn Sepp (1896–1977) us èm Isarwinkel. Sie hèn 1976 mit Volksmusiguffdritt aagfangè, wiè si schu dèvor unter Aaleitung vo irèm Vatter absolvyrt hèn. Si hèn hüüfig mit èm Gerhard Polt zämmègschafft un sin glegentlich i dè ARD-Sendung Schiibèwǜscher uffdrèttè. Drei vo irè Schwôschtèrè, Moni, Vroni un Burgi, hèn nõch irèm Vorbild 1986 diè bayrischi Volksmusig- un Kabarett-Gruppè D Wellkürè gründèt. È witteres Musigbrojèkt uss èm Chrais vo dè Well-Familliè isch d Formation Well-Buam, wo sich s Widderbeläbbè vo dè authentischè bayrischè Volks(tanz)musig als Uffgaab gschtellt hèt, dört hèn au dè Chrischtoph un Michael Well mitgwǜrkt.

D Musig vo dè Biermösl Blòsn zeichnèt sich u. a. durch diè zum Deil ironischi Integration vo andrè Musigschtyl wiè öppè dè keltischè Folklorè, uugwöhnlichi Inschtrumèntyrungè wiè Dudelsack, Alphorn, Harfè odder Didgeridoo, abber vo allem durch bissigi satirisch-bolitischi bzw. gsellschaftskritischi Tegscht uus (byschpillswys hèn si dè Kardinal Josef Ratzinger mit èm Spitznammè Alpè-Ayatollah vosää), wo hüüfig uff traditionèllè bayrischè Reim- un Gsangsschtyl (Gschtanzl) beruèd un im Dialèkt vordrait wörrè sin.

D Biermösl Blòsn isch bundeswit bekannt worrè, wo si 1981 – „us Vosää“ zum traditionèllè Maibockaaschtich im Münchner Hofbräuhuus ygladè gsi sin, un dört diè bayrischi Regyrungspartei CSU im Zämmèhang mit dè Massèvohaftung vo Nürnbärch vor dè vosammeltè Minischter un Landdagsabgeordnètè scharf kritisyrt hèn un asè èn politischè Eklat voursacht hèn. 1981 hèt d Gruppè z Mainz dè Förderpriis zum Dütschè Chlykunschtpriis chriègt. Z Bayern sin ènè 1985 un 1996 trotz eidütigè Nominyrungè durch diè jewyligi Jury entschprèchendi Uuszeichnungè voweigert worrè.

Mit dè Mitglyder vo dè Band Diè Dotè Hosè sin dè Well-Brüèder sit dè gmeinsamè Deilnaam am Anti-WAAhnsinns-Feschtival fründschaftlich vobundè. 1990 hèn si zämmè mit èm Gerhard Polt am Erfolgsalbum Uff èm Chrützzug is Glück vo dè Dotè Hosè mitgschprillt. 1997 hèn si dè Sonderpriis Reif & Bekloppt vom Prix Pantheon, 1999 dè Bayrische Kabarèttpriis i dè Kategory Musik-Kabarètt chriègt.

Dè 1999 uff bayrischer Ebèni uusdraite Stritt um dè Bau von èrè McDonald’s-Filialè a dè Autobaanraschtschtätti uff èm landschaftlich reizvollè obberbayrischè Irschèbärg hèt d Gruppè zum Lièd vum Irschèbärg. Im Johr 2001 hèt è Lièd vo dè Gruppè èn witterè Skandal uusglöst. S „BayWa-Lièd“, è satirischi Vodubelung vo dè Bayernhǜmnè un dè Firma BayWa (Tegscht: „Gott mit Dir, du Land der BayWa …“), isch vo nèm Schuèlbuchvolaag in è Lièderbuèch für d Hauptschüler vo dè achtè Klassè gsetzt worrè. Diè scho druggtè Büècher sin uff Aawysung vom Bayrischè Kultusminischterium druffhy gly widder ygschtampft worrè.

Au dè Bayrische Rundfunk hèt s bolitische Engagement vo dè Musiger – öppè gegè d Widderuffbereitungsaalaag z Wackersdorf – mit èm zitwyligè Sendeboykott quittyrt. I dè Zwǜschèzit hèt sich abber s bolitische Klima im Bayrischè Rundfunk gänderèt, sellèwäg hèt dè Sender 2004 dè Biermösl Blòsn è eigeni 45-minütigi TV-Sendung innerhalb vo dè Reiè Alpèrock gwidmèt.

Im Johr 2005 isch dè Gruppè bim Tanz- un Folkfescht TFF.Rudolschtadt dè Wältmusig-Priis Ruth voliè worrè. Zum Abschluss vom Johr 2005 hèn si mit dè Dotè Hosè un èm Gerhard Polt durch voschideni Theater un Opèrèhüser tourt un unter dè Regie vom Hans Chrischtian Müller s Brogramm Abvent (sic) uffgfüürt. 2007 sin si gmeinsam mit èm Gerhard Polt z Münchè dè Großen Karl-Valentin-Priis un 2008 mit èm Göttinger Elch uuszeichnèt worrè.

Am 18. Januar 2012 isch dè letschte Auftritt übber d Bünni gangé. D Gruppè hèt sich denõch uffglöst. Dè Well Hans hèt als Grund für d Drènnung Meinungsvoschiddèheitè übber diè kümpftigi Uusrichtung güßerèt. Ußerdèm gäb s Schwirigkeitè, mit Lièder uff diè voändertè bolitischè Raamèbedingungè z reagyrè, wiè öppè dè Atomuusschtyg un d CSU sig au nimmi sèll, wa si mòl gsi isch. Anders gsait, hèn sich diè Zyl, uff diè d Biermösl Blòsn mit irè Lièder abzylt hèn, mee un mee erreicht gsi. Er hèt mit èm Kabarettischt Dieter Hildebrandt übber gmeinsami Uffdritt nõchdenkt.

Nõch dè Ufflösung

Wellbrüder aus’m Biermoos 2014 bim Lièderfescht uff dè Burg Waldegg

Dè Chrischtoph un Michael Well hèn sich im Februar 2012 i dè Münchner Chammerschpyl mit èm „Huusmusigõbèd“ Fein sein, beinander bleibn  unter dè Regie vom Franz Wittèbrink, zämmè mit irè Schwôschtèrè, dè Gruppè Wellkürè, èm Bruèder Karl, dè Muètter sowiè (in èm Kurzuffdritt) ìm Gerhard Polt, bräsentyrt. I dè Spillzitè 2015/16 hèn d Brüèder Well mit èm Gerhard Polt i sim „Schauschpyl“ Ekzem Homo  widder bi dè Münchner Chammerschpyl gaschtyrt.

Dè älteschte Bruèder Hans isch zämmé mit sinè Chinder Sarah, Tabea un Jonas Well als Hans Well & Wellbappn uffdrèttè.

Dè Well Hans hét d Biography 35 Jahre Biermösl Blosn am 9. April 2013 im Antje Kunschtmaa Volaag publizyrt. È Biography vo dè Bierrmösl Blòsn us Sicht vom Chrischtoph un Michael Well unter m Titel Biermösl Blosn: Tokio – Kapstadt – Hausen isch bim Volaag Kein & Aber ebbèfalls im April 2013 uffglait worrè.

Chrischtoph, Michael un Karl Well sin sit 2013, zum Deil zämmè mit èm Gerhard Polt, unter dè Bezeichnung Wellbrüder aus’m Biermoos uffdrèttè.

Rezeption

D Journalischtin Annette Ramelsberger hèt 2011 i dè Süddütschè Ziting s Wärch vo dè Biermösl Blòsn als „Stachel im Fleisch der Obrigkeit, die anarchische Seele des Volkes“ sowiè als musikalischi Rügggängigmachung vo dè „Enteignung des Begriffs Heimèt durch d CSU Schritt für Schritt, Lied für Lied“. Si hebbe „das Zerrbild des Jodel-Bayern ersetzt durch messerscharfen Witz und intelligente Boshaftigkeit“, wa èn großè Vodiènscht vo sebbèrè Gruppè sig. Well diè aaltè Feindbilder jetzt „vobröckelèt“ sigèd, sig s sogsää „folgerichtig, dass sich d Biermösl Blòsn drennèt“, well si "gwunnè“ hèn. Si hebbèd „gegè Wackersdorf gschpillt, gegè diè Unvoantwortlichè bi dè Bayrischè Landesbank un gegè diè Voantwortlichè i dè Regyrung“ un sin „johrelang wǜrksamschti Opposition gsi“. Si hèn „mitghulfè, s Land z voänderè.“ Jetzt sigèd si nimmi dè bayrische „kratzige Ußèsiter, sondern ghätschlèts Kulturguèt“ un wörrèd vo „allè glièbt“ un sigèd „kein Uffreger mee.“ Mò chönnt sellèwäg au sägè „Mission erfüllt.“

2003 hèt d Warschteiner Brauerei znägscht humorlos uff è ironischs Gschtanzl vo dè Biermösl Blòsn übber dènnè yr Byr reagyrt. Am Ènd von èrè öffentlich vordraitè Korreschpondenz mit ebbèfalls satirischè Tegschtalternativè hèt d Brauerei mit Sitz z Nordrhy-Weschtfalè mit èrè Yladung a d Kabarèttgruppè yglenkt, um sich bi inè vo dè Qualidät vo irèm Byr z übberzüügè.

Wärch

Diskografy

• 1980: Ex voto
• 1982: Grüèß Gott, my Bayernland – CD
• 1985: Tschüß Bayernland – CD
• 1987: Freibank Bayern (mit èm Gerhard Polt) – CD (neu: 2007)
• 1991: Jodelhorrormonschtershow – CD
• 1993: Sepp, Depp, Hennèdreck (Kinderlièder mit dè Chind vom Chrischtoph un Michael un zwei andrè Chinder)
• 1994: Wo samma (mit dè Dotè Hosè) – CD
• 1996: Klampfn Toni (mit Attwenger, Fredl Fesl, Georg Ringsgwandl, Hans Söllner un andrè)
• 1998: Wellcome to Bavaria – CD
• 1998: Grüaß di Gott Chrischtkindl (Krippèschpyl vom Hermann Well, zrächtgmacht vom Hans mit allè acht Chinder vo dè Biermösl Blosn un drei witterè Chinder vo dè Familliè Well)
• 2001: Erfolg (Hörbuèch mit èm Jörg Hube nõch èm glychnammigè Roman vom Lion Feuchtwanger)
• 2001: Zing Zang Zing – Sepp, Depp, Hennèdreck II (Chinderlièder mit allè acht Chinder vo dè Biermösl Blosn)
• 2002: Räuber & Gendarm – CD
• 2002: Dè unbekannte Valentin (mit Gerhard Polt un Gisela Schneeberger)
• 2003: Unterbayern (live) – CD
• 2006: Auftanz (bairische un internationali Volgstänz, vom Michael un Stopherl mit Chinder un Gäscht)
• 2006: Bayern Open – DVD (mit Gerhard Polt)
• 2006: Tschurangrati – DVD (mit Gerhard Polt)
• 2006: Obatzt is/Crème Bavaroise – DVD (mit Gerhard Polt)
• 2007: Stoibers Vomächtnis (mit èm Gert Heidèreich, Gerhard Polt un Jörg Hube)
• 2007: Rundumadum (Internationali Chinderlièder mit Hans, sinè drei Chinder un Gäscht)
• 2008: Offener Vollzug – DVD (mit èm Gerhard Polt)
• 2009: Jubiläum – Doppel-CD (mit èm Gerhard Polt zum 30-jöhrigÈ Bünnèjubiläum)
• 2010: Fröhlichi Frohheit – CD un DVD (Gerhard Polt un d Well-Familliè)
• 2011: Reschpekt! 30 Johr Gerhard Polt & Biermösl Blòsn - DVD (enthaaltet als Bonus dè Film D Heimètpfleger)
• 2013: Fein sy, binènand bliibè (Stopherl, Michael, Karl, Burgi, Bärbi, Moni, Gertraud Well, Gerhard Polt; Bümnèbroduktion a dè Kammerschpyl)
• 2020: Gerhard Polt und die Well-Brüder 40 Jahre

Lièderbüècher

• Biermösl Blòsn: S Lièderbuèch. Haffmans, Züri 1994, ISBN 3-251-00149-3
• Biermösl Blòsn: Grüèß Gott, my Bayernland. Das zweite Liederbuch. Haffmans, Züri 1994
• Biermösl Blòsn: Grüèß Gott, my Bayernland. Econ & Lischt, Münchè 1999, ISBN 3-612-26613-6
• Chrischtoph Well, Hans Well, Reinhard Michl: Sepp, Depp, Hennèdreck. Hièber, Münchè, ISBN 978-3-938223-14-7
• Chrischtoph Well, Michael Well, Hans Well, Reinhard Michl: Zing Zang Zing. Hièber, Münchè, ISBN 978-3-938223-27-7
• Chrischtoph Well, Michael Well, Hans Well, Reinhard Michl: Grüaß di Gott Chrischtkindl. Hièber, Münchè 1998, ISBN 978-3-938223-21-5
• Hans Well: Rundumadum. Bilder vom Hans Traxler un è Vorwort vom Gerhard Polt. Kein & Aber, Züri 2007, ISBN 978-3-0369-5509-4.
• Biermösl Blòsn: Welcome to Bavaria. Èn Lièderbuch für dè Hosèsack. Kein & Aber, Züri 2011, ISBN 978-3-0369-5621-3.

Bünnèbroduktionè

• 1984: Münchè lüüchtet, Münchner Kammerschpyle
• 1988: Diridari, Münchner Kammerschpyle
• 1993: Tschurangrati, Münchner Kammerschpyle
• 1996: Bayern Open, Münchner Kammerschpyle
• 2002: Crème Bavaroise – Obatzt is, Bayrische Staatsschauschpyl
• 2005: Abvent. Regisseur: Hans Chrischtian Müller; Musig un Kabarett, Tour zämmè mit èm Gerhard Polt un dè Dotè Hosè durch voschidni Theater un Opèrèhüser.
• 2006: Offenè Vollzug – è Staatsschauschpyl, Bayrisches Staatsschauschpyl
• 2012: Fein sii, binènand bliibè, Münchner Kammerschpyle
• 2015: Ekzem Homo, Münchner Kammerschpyle, Regy: Johan Simons, vo un mit Gerhard Polt un dè Well-Brüder

Filme

• 1986: WAAhnsinn – Dè Wackersdorf-Film.
• 2007: Plattln mit Umtata – Mit dè Biermösl Blosn z Afrika. Dokumentarfilm, Musigfilm, Dütschland, 2007, 90 Min., Buèch un Regy: Peter Heller, Broduktion: filmkraft, Bayrischè Rundfunk, Kinoschtart: 23. Novembèr 2010, Inhaltsangabe (Memento vom 1. Dezämber 2014 im Internet Archive) vom BR.
• 2010: 30 Johr Gerhard Polt un d Biermösl Blosn. D Heimètpfleger. Dokumentarfilm, Musigfilm, Dütschland, 2010, 58:40 Min., Realisation: Frederick Baker, Broduktion: Moviepool, megaherz, Bayrischè Rundfunk, Erschtsendung: 29. Dezembèr 2010 bim Bayrischè Fèrnsee, Inhaltsaagaab (Memento vom 2. Jänner 2015 im Internet Archive) vom BR.

Uuszeichnungè

D Biermösl Blosn 2010 bi dè Wittergaab vom Großè Karl-Valentin-Priis a dè Fredl Fesl

• 1981: Dütschè Chlykunschtpriis, Förderpriis
• 1984: Ludwig-Thoma-Medaille vo dè Stadt Münchè
• 1985: Ernscht-Hoferichter-Priis
• 1995: Ybbser Spaßvogl
• 1997: Prix Pantheon, Sonderpriis „Ryf un bekloppt“
• 1999: Bayrischè Kabarettpriis, Kabarett-Musigpriis
• 2000: Wilhelm-Hoegner-Priis, gmeinsam mit èm Jörg Hube
• 2005: RUTH – Dè dütsche Weltmusigpriis
• 2007: Großè Karl-Valentin-Priis
• 2008: Bayrischè Poetèdaler
• 2008: Göttinger Elch

Literadur

• Hans Well: Weder Kitsch noch Museum. Eine persönliche Standortbestimmung in Sachen Volksmusik, i dè: aviso. Zeitschrift für Wissenschaft und Kunst in Bayern, Heft 3, 1997, (nòmmòl abdruggt i dè: Augsburger Volkskundliche Nachrichten, 3. Jg., 1997, H. 2, Nr. 6, ISSN 0948-4299, S. 7–14; Volltegscht).

• Uwe Durst: Über die Lieder der Biermösl Blosn. Im: Neohelicon, 38, 2011, Nr. 1, ISSN 0324-4652, S. 223–241, doi:10.1007/s11059-010-0087-0.

Weblinggs

 Commons: Biermösl Blosn – Sammlig vo Multimediadateie

• Toni Drexler: Biermösl Blosn. In: Historisches Lexikon vo Bayern. Hrsg.: Bayrischi Staatsbibliotheek, 25. Juni 2013, archiviert vom Original am 20. Oktober 2013; abgruefen am 4. Februar 2014. 
• Biermösl Blosn. Michael Well, abgruefen am 4. Februar 2014 (Offizièlli Sitè vo dè Biermösl Blòsn): „Aus is, und gor is, und schod is, dass wohr is: D Biermösl Blòsn hèt sich uffglöst, sèlli Homepage bliibt als Online-Archiv no è Wyli im Netz stò. Gäschtebuèch un Forum sin zuè.“ 
• Die Well Brüder aus'm Biermoos. Chrischtoph & Michael Well, abgruefen am 4. Februar 2014 (Internetauftritt vo dè Well-Brüèder). 
• Hans Well & Wellbappn. Hans Well, abgruefen am 4. Februar 2014 (Internetauftritt von Hans Well). 

Einzelnõchwys

Dä Artikel basiert uff ere fräie Übersetzig vu dere Version vum Artikel „Biermösl_Blosn“ vu de dütsche Wikipedia. E Liste vu de Autore un Versione isch do z finde.