Benno Malfèr

Dr Benno Malfèr OSB (* 20. Dezämber 1946 als Christian Malfèr z Boze-Gries; † 28. Augschte 2017 z Boze) isch e Benediktinermönch us em Südtirol gsi. Sid 1991 isch èr dr Apt vom Chloschter Muri-Gries bi Boze gsi.

Dr Malfèr isch z Gries bi Boze ufgwachse und het im Gümnasium vo de Franziskaner z Boze d Matuur gmacht. Ane 1966 isch èr is Chloschter Muri-Gries yträtte, won èr 1971 zum Prieschter gweit worden isch. Z Münche und z Rom het èr Theologii studiert. A der päpschtleche Schuel Sant’Anselmo het èr promoviert, und vo 1981 bis 1991 isch èr a dere Schuel Profässer gsi.

s Kondolänzbuech mit em Bild vom Benno Malfèr i de Chloschterchile z Muri AG

Ane 1991 isch dr Malfèr zum Apt vo Muri und do dermit au zum Prior vo Muri-Gries gwäält worde. Vo 1997 bis 2015 isch èr Abtpräses vo der Schwiizerische Benediktinerkongregation gsi, und vo 2003 bis 2012 het èr d Äbtekomferänz vo Salzburg gleitet.

D Vorsteher vo Muri-Gries gälte jewyls au als Äpt i dr Tradizion vom ehemolige Chloschter Muri im Aargau. Der Apt Benno isch mängmol uf Muri cho und hät dänn amel för e paar Täg au döt gwohnt. Ane 1992 het èr ghulfe d Vereinigung vo de Fründe vo der Chloschterchile vo Muri z gründe.

Lueg au

• Lischte vo de Äpt vo Muri und vo Muri-Gries

Weblink

• Abt Benno Malfèr OSB. In: Bezirkszeitung PLUS, Nr. 2, Februar 2016, S. 26.