Basler Mittwoch-Gesellschaft 1907

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dialäkt: Baaseldytsch

D Basler Mittwuch-Gsellschaft 1907, kurz BMG, isch die eltscht Männer-Fasnachtsclique in Basel.

D Basler Mittwuch-Gsellschaft isch im Dezämber 1907 als reini Männerclique vo siibe Damboure im Restaurant Muffler an dr Stainedorstross in Basel grindet worde.

Sithär nimmt sie jedes Johr an dr Basler Fasnacht dail. Sie hett sich scho frieh fir d Nochwuggsferderig ygsetzt und 1909 die erscht Jung Garde vo Basel grindet. Dr langjohrig Leiter vo dr Drummelschuel, dr Damboure-Instruggter Joseph Wintzer, entwigglet fir d BMG en aigeni Drummelnotation, d Hieroglyphe, wo no hitt bi vyle Dambourecorps brucht wärde.

Gschicht[ändere | Quälltäxt bearbeite]

1922 isch d BMG ins Restaurant Laienzor als ihr Stammlokal zoge, wo si sit denn dehaim isch, und si hett im glyche Johr d Uniforme vo dr ehemolige Basler Standeskompanie, de Stänzler, kauft. Als erschti Fasnachtsgsellschaft hett d BMG sit de Mitti 1920er Johr au am Fasnachts-Zyschdig trommeln- und pfyffenderwys en Umgang dur d Stadt gmacht. Zentrals Elemänt vom Oobe isch e Dote-Ehrig, s «Ladärnliverbrenne», e Tradition, wo bis zem hittige Dag wytergfiehrt wird und vyl vom Wäse vo dr BMG usmacht. 1930 spalte sich e paar Mitglieder vo dr BMG ab und grinde en aigeni Clique, d Basler Bebbi.

Stänzler[ändere | Quälltäxt bearbeite]

Die BMG in ihren Stänzlern am Sechseläuten 2018
D BMG in ihre Stänzler am Seggsilyte 2018

D Stänzler[1] sinn e Marggezaiche vo dr BMG. 1922 hett d Clique die Uniforme vo dr ehemolige Basler Standeskompanie[2] us em 18. und 19. Johrhundert kauft, und si wird no hitt an nationali und internationali Verastaltige yglade und vertritt Basel dert. E baar usestächendi Byspil sin ihri Uftritt an dr Landesusstellig 1939, dr Expo 64, em Carnaval d'Eté in St-Ouen Paris 1969, am grosse Trachte- und Schitzeumzug vom Minchner Oktoberfescht 1994, 2003, 2010 und 2015 oder uf de Cannstatter Wase in Stuttgart 2006, 2016 und 2017. 2014 hänn d Stänzler an dr Steuben Parade uf dr Fifth Avenue in New York mitgmacht, 2016 am Gauder Fest im Zillertal und 2018 am Säggsilyteumzug in Ziri. Drzue kemme e huffe Uftritt in Basel, ebbe bi dr Ereffnig vo dr Gartebauusstellig Grien 80, an offizielle Aless vo dr Basler Regierig, als Basler Delegation an verschiedene Eidgenössische Schitzenfescht oder an dr 450 Johr- und an dr 500 Johr-Fyr vom Ydritt vo Basel in d Eidgenosseschaft 1951 und 2001.

Künstler[ändere | Quälltäxt bearbeite]

BMG Tambourmajor Fasnacht 2006, Sujet „Aldi et Obi“
BMG Pfyffer Fasnacht 2004, Sujet „Basta Berlusconi“
BMG an der Fasnacht 2016
BMG Tambouren Fasnacht 2016: Sujet Mortabella
BMG Damboure Fasnacht 2016: Sujet Mortabella

Sit ihrer Grindig präggt d BMG mit ihre Sujets d Basler Fasnacht. Ihri Fasnachtszige wärde vo bekannte Basler Kinschtler und Grafiker gestaltet, so in de 1920er- und 1930er-Johr vom Burkhard Mangold und Charles Hindenlang, in den 1950er Johr vom Ferdy Afflerbach, speeter vom Fredy Prack und vom Domo Löw.

Runzle[ändere | Quälltäxt bearbeite]

1967 sin d BMG-Runzle als Alti Garde vom Stammverein Basler Mittwuch-Gsellschaft grindet worde. S Zyl vo de BMG-Runzle isch es dertsmol und hitt gsi, d Fasnacht e bitz ruehiger azgoh, s Cortège-Pensum de Megliggkaite vo de eltere Fasnachtsdailnähmer azbasse und d Fasnacht trotzdäm us volle Zig z gniesse. D Runzle hänn e eigeständig Johres- und Fasnachtsprogramm. Dr erscht Dail vom Morgestraich und vom Fasnachts-Zyschdig und verschideni Aless während em Johr wärde zämmn mit em BMG-Stamm begange. Wie beim Stamm stehn au bi de Runzle d Pfläg vo dr Frindschaft unterenander und guti Drummel- und Pfyfferkunst im Zentrum vom Gsellschaftsläbe.

avantGARDE[ändere | Quälltäxt bearbeite]

2016 isch d avantGARDE ins Läbe gruefe worde. Mit däre hett d BMG uf d Problem reagiert, wo sich e huffe Cliquen in ihre Nochwuggsabdailige konfrontiert sehn. D avantGARDE zielt uf d Altersgruppe vo de 14- bis 25-jährige Männer ab, also gnau das Alter, wo vyl ufhere, Fasnacht z mache – d Grind dodrfir sin vylfältig. D avantGARDE organisiert sich sälber und het en aiges Johres- und Fasnachtsprogramm. Si nimmt sich ihre Freihaite use, wo si brucht, und nimmt an de Anless vom Stamm und vo de Runzle dail, wo ihne Spass mache – das gilt bsunders fir Stänzleruuftritt und -usflig.

Vereinsorgan[ändere | Quälltäxt bearbeite]

Sit de 1970er-Johr hett d BMG en aige Cliqueorgan, „der Hirte“, wo regelmässig iber s Gsellschaftsläbe brichtet.

BMG hitt[ändere | Quälltäxt bearbeite]

Die BMG isch und blybt e raini Männerclique, wo mit em Stammverein, de Runzle und avantGARDE an dr Fasnacht dailnimmt. 2022 fyr si 100 Johr Stänzler und 100 Johr im Restaurant Laiezorn als Cliquenlokal.

Literatur[ändere | Quälltäxt bearbeite]

  • Basler Mittwoch-Gesellschaft: 75 Jahre Basler Mittwoch Gesellschaft 1907–1982.
  • Basler Mittwoch-Gesellschaft: Joorhundert-Blatt, 100 Jahre Basler Mittwoch-Gesellschaft 1907–2007[3]
  • Basler Mittwoch-Gesellschaft: 111 Geschichten. Reinhardt, Basel 2018 ISBN 978-3-724523-04-8

Weblinks[ändere | Quälltäxt bearbeite]

Einzelnachweise[ändere | Quälltäxt bearbeite]

  1. Die Stänzler der Basler Mittwoch Gesellschaft. Abgruefen am 7. September 2018.
  2. Stänzler / Standeskompagnie. Abgruefen am 7. September 2018.
  3. Basler Mittwoch-Gesellschaft: Joorhunderblatt – 100 Jahre Basler Mittwoch-Gesellschaft 1907–2007. Abgruefen am 7. September 2018.