Fasnachtsclique
| Dialäkt: Baseldytsch |
E Fasnachtsclique (viilmools kurz Clique aber au Fasnachtsgsellschaft gnennt) isch e Drummel- und Pfyffergrubbe wo an dr Basler Fasnacht mitmacht.
Fasnachtsclique wird ainersiits die musizierendi Formation, aber anderersiits au dr gsammti Verain gnennt.
Formation
[ändere | Quälltäxt bearbeite]D' Formation vo-n-ere Fasnachtsclique bestooht (vo Vorne zum Ändi) us Vordrab, Pfyffer, Dambuurmajor und Dambuure, wobii die eksaggti Raihefolg amme e bitz variert. D' Clique spiilt an de drey scheenschte Dääg, verklaidet in fantasiivolle Goschdyym und Larve uff ihrne Drummle und Piccolos traditionelli Fasnachtsmärsch.
Vordrab
[ändere | Quälltäxt bearbeite]
Dr Vordrab sorgt immer fyr gniegend Blatz uf dr Marschroute und präsentiert au s' Sujet vo dr Clique mit eme Requisit, ere kunschtvoll bemoolte Laterne, wo uf Reeder montiert isch, und verdailt Zeedel, wo uff baseldytsch satirischi und amme sarkastischi Värs uffdruggt sinn, wo s' Sujet witter beschriibe. Immer weniger wärde im Vortrab Vorriiter ygesetzt wo hoch uff de Ross voruss riite. Mängmool trifft me-n-aber stattdesse es Junteressli us Holz oder e Stäggeressli ah.
Spiil
[ändere | Quälltäxt bearbeite]D' Pfyffer, dr Dambuurmajor und d' Dambuure bilde s' Spiil. Je noch Greessi und Dradition wäggslet d' Reihefolg vo de drey Undergruppene in dr Formation. Hyffigschti Variante sinn P-TM-T und TM-T-P.
Usserdäm trifft me sehr oft au uff reini Dambuuren- oder Pfyffergruppene. S' Inschtrumänt vo de Pfyffer isch s Piccolo. D Dambuure (au Drummler) spiile uff ere Basler Drummle uss Metall oder Holz.
Verain
[ändere | Quälltäxt bearbeite]Fasnachtsclique hänn meischtens mehreri Formatione, wo an der Fasnacht lauffe. D' Gruppe sinn meischt noch Alter und mänggisch au nochem Gschlächt drennt. Einigi Clique verbiete sogar d' Migliidschaft vo aim Geschlecht in ihrne Statute. Ybligi Gruppe sinn Binggis (Kinder ab ca. 8 Joohr), Jungi Garde (Jugendliggi 12-18 Joohr), Stammverain (ab 18 Joohr) und Alti Garde (fyr Mitglieder wo nymm die zygigi Gangart vom Stammvereins wänn lauffe). Vili Verain bilde ihre Noochwuggs in aigne Drummel- und Pfyfferschuele uss. E baar Clique biete-n-au Erwaggsenekyrs aa.
Bekannti Clique
[ändere | Quälltäxt bearbeite]Die elteschti Fasnachtsgsellschaft, wo no eggsischtiert, isch d' VKB, die Vereinigte Glaibasler vo 1884 mit Sitz, genau, im Glaibasel. Die zwaitelteschti Clique isch d' Breo-Clique 1896 uss em Grossbasel. An dr Basler Fasnacht 2007 sinn total 225 Dambuuren- und/oder Pfyfferformatione aagmäldet gsi.[1]