Bad Buebedorf
| Dialäkt: Baseldütsch |
As Bad Buebedorf wird s Gebiet zwüsche Liestel und Buebedorf (Basel-Landschaft, Schwiz) bezäichnet, wo s Daal vo dr Hindere Fränke (Reigoldswilertal/Föifliberdal) mit em Daal vo dr Vordere Fränke (Waldeburgerdaal) zämmechunnt. Ursprünglig het s in däm Gebiet nume e historischs Geböid und Hotel gha. Im 19. Joorhundert isch en Iisebaanstazion drzue choo. Hüte stöön im Bad Buebedorf au Gwärbgeböid und uf de Matte wärde Sportaaläss veraastaltet.
Gschicht
[ändere | Quälltäxt bearbeite]Die ersti urkundligi Erwäänig vom Bad Buebedorf goot uf d Middi vom 17. Joorhundert zrugg, wo am 20. April 1641 dr Statthalter vom Bürgermäisterdum vo dr Stadt Baasel die gsundi Brunnekwelle gegenüber em Vogt Jakob Zörnlein us Waldeburg erwäänt het. 1741 het sich dört en ersti Badhütte und e Badhuus mit ere Schüüre befunde, wo aber scho 1764 vom Schulthäiss David La Roche mit eme Nöibau ersetzt worde isch. S Bad het esone groosse Erfolg gha, ass es 1804 dr Matthias Flubacher vergröösseret het.
Berüemt isch s Bad Buebedorf wäge dr Versammlig vo 25 Baselbieter dört, wo am 18. Oktober 1830 mit ere Bittschrift an d «hoochgachtete Herre und Obere z Baasel», wo vom Stephan Gutzwiller verfasst worde isch, die vollkommeni Gliichberächtigung zwüsche de Stadt- und de Landbürger verlangt häi. Das isch dr ersti Schritt in dr Kantonsdäilig vo Baasel gsi. Sithär säit men em Bad Buebedorf mänggisch s Baselbieter Rütli.
1837 het mä Solbeeder iigrichdet, aber no im 19. Joorhundert het mä dr Badbetriib ufgee und nume d Hotellerii isch übrig bliibe. 1880 isch d Baanstazion vo dr Waldeburgerbaan wisawi vom Hotel ufdoo worde, und es isch seer vil lichter worde zum Landgasthof z choo.
1979–1981 het dr Rudolf Huber s Ansambel lo renowiere. Sit 1999 betribt d Hotel Bad Bubendorf AG s Restorant und s Hotel.
Hütigi Nutzig
[ändere | Quälltäxt bearbeite]D Geböid Bad Buebedorf wird hüte immer no as Restorant (Landgasthof) und Hotel gnützt. Rund um s Hotel, dr Hauptstrooss nooch, si e baar Industriibaute entstande. S Gebiet daaluf wird as Gwärbkwardier brucht. Daalab het s immer no Acker- und Wäidland. Uf däm Land wärde immer wider Groossveraastaltige organisiert. So isch im Joor 2002 s Festzentrum vom Äidgenössische Durnfest mit 75'000 Däilnäämer z Bad Buebedorf gsi und 2008 het mä für d Öiropamäisterschaft im Schutte dört e nüünts Stadion für public viewing ufgstellt, wo kä groosses Inträssi gfunde het und sidder wider abgrisse worde isch.
Für was mä s Gebiet in dr Zuekumft wird bruuche, isch nonig sicher, aber es git Blään für e Motorfaarzüügkontrollstazion und für e Polysportzentrum.
Weblingg
[ändere | Quälltäxt bearbeite]
|
Dä Artikel basiert uff ere fräie Übersetzig vu dere Version vum Artikel „Bad_Bubendorf“ vu de dütsche Wikipedia. E Liste vu de Autore un Versione isch do z finde. |
Koordinate: 47° 27′ 35,2″ N, 7° 44′ 31,7″ O; CH1903: 622886 / 256600