Zum Inhalt springen

Bärbel Brüderle

Link zuefiege
Us der alemannische Wikipedia, der freie Dialäkt-Enzyklopedy

D Bärbel Brüderle (* 27. Augschte 1943 z Villinge as Bärbel Schneider; † 26. Februar 2024) isch e dytschi Dialäktautori un -aktivischti un Fasnetleri gsii.

Lääbe

[ändere | Quälltäxt bearbeite]

D Brüderle isch z Villinge in dr Brunnestroß uf d Wält chuu. Si isch uf d Maidlischuel (hite Kloschterringschuel) un derno uf d Huuswirtschaftsschuel gange. No dr Schuel het si ne Lehr as Chrankeschweschter im alte Villinger Chrankehuus (hite s Internat vu dr Hotelfachschuel) aagfange un het si anne 1961 im Klinikum im Friedengrund abgschlosse. Si het as OP-Schweschter z Iberlinge un z Khuur in dr Schwyz gschafft. Wel s ire Mueter schlächter gangen isch, isch si anne 1968 wider retuur uf Villinge chuu un het in ere Praxis vun eme Dokter aagfange.

Bim Wandere mit em Schwarzwaldverain het si dr Helmut Brüderle chännegleert. Im Johr 1970 hän si ghyrote un hän druf bis 1991 e Lääbesmittellade in dr Scheffelstroß gfiert, „s’Lädele“ oder au „s Milch-Brüderles“. Si hän zäme zwai Chinder ghaa, dr Suhn Alexander un d Dochter Stefanie. Dr Helmut Brüderle isch 2001 gstorbe.

D Bärbel Brüderle het si syt 1968 in dr Villinger Fasnet engaschiert, aafangs bi dr Narrozunft, ab 1975 derno bi dr „Münsterwieber“. Si het e Guggemusik mitgrindet un isch bi Fasnetsbäll ufdrätte. Vor allem aber isch si an dr Fasnet vu Baiz zue Baiz zoge un het Moritate im Dialäkt vordrait.

Noch eme Obe zum Villinger Dialäktautor Hans Hauser isch d Brüderle 1994 Mitglid vu dr Muettersproch-Gsellschaft wore. Ai Johr speter het si mit andere zäme d Muettersproch-Regionalgruppe „A Brig un Breg“ grindet un isch bis zue irem Dood Vorsitzeri vu däre Gruppe gsii. Iber 28 Johr lang isch si dr Motor un dr kreativ Chopf vu däre Regionalgruppe gsii un het alliwyl e neii Idee ghaa, was mer chennt mache zum s Alemannisch bfläge, mit em „z Liecht gau“, mit Dichterläsige, Stammdisch, Kunzärt, Diavordreg, Buechvorstellige, Uusflig, Mahnfyre, Museumsfescht un anders mee. Vor allem fir d Chinder het si si engaschiert, het zem Byschpel Sache gmacht im Summerferiebrogramm vu dr Stadt. Im Heftli vu dr Muettersproch-Gsellschaft, Alemannisch dunkt üs guet, het si in jedere Uusgab bricht, was es Neis git us dr Regionalgruppe, het Gschichtli un Gedicht yygschickt un bi alle meglige Akzione mitgmacht, wänn s zem Byschpel um s Sammle vu Sprichwerter, Witz oder andere Sächeli oder ums Uusdänke vu neie Dialäktwerter fir Neologisme gangen isch. Ab Novämber 2018 het si im Schwarzwälder Bote e Mundartrubrik gschribe, wu si alemannischi Werter vorgstellt un erklert het.

Iber 20 Johr lang het si z Villinge Stadtfierige gmacht. Au sunscht het si si all Ritt ebis Neis uusdänkt. Emol het si zum Byschpel vorgschlaa, mer chennt d Lyt derzue bringe, ass si si im Alldag mee bewege, wämer Zettel uf dr Stroß verdailt, wu umdrillt lige un wämer si ufhebt, list mer: „Bitte där Zettel wider uf dr Bode lege.“

Im April 2018 isch d Bärbel Brüderle fir ire ehrenamtlig Engaschmänt mit dr Landesehrenodle vum Land Bade-Wirttebärg uuszaichne wore. Vu dr Muettersproch-Gsellschaft het si ne Ehrenodle in Gold kriegt.

Iri Begaischterig fir s Alemannisch un d Fasnet het si au an iri Chinder wytergee: Ire Suhn Alexander Brüderle isch zweete Zumftmaischter vu dr Historische Narrozunft Villingen un iri Dochter Stefanie engaschiert si bi dr Muettersproch-Regionalgruppe.

Am 26. Februar 2024 het d Bärbel Brüderle im Alter vu 80 Johr d Auge fir immer zuegmacht.

Literatur

[ändere | Quälltäxt bearbeite]
Vun "https://als.wikipedia.org/w/index.php?title=Bärbel_Brüderle&oldid=1059119"