Asine (Lakonie)

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Asine (altgriechἈσίνη) isch i de Antiki e chliises Stedtli am Lakonische Golf gsii, zwösched em Vorpirg Tainaron und de Hafestadt Gythion.[1] D Laag isch nöd völlig gsicheret, s werd aber agnoo, as es süüdlich vom antike Las a de Bucht vo Skoutári glegen isch, wo späärlichi antiki Fund us de klassische und de röömische Zitt gmacht wore sind.

Gschicht[ändere | Quälltäxt bearbeite]

D Gründig vo Asine isch nöd klar, s werd aber vermuetet, as sich d Biwoner vo Asine do niderloo hend, nochdem dene sini Stadt vo Argos geg s Endi vom 8. Joorhundert v. Chr. völlig zerstört woren isch. D Spartaner, wo mit dene Asinäer verbündet gsii sind, hend dene nochem Erste Messenische Chrieg e Chüstestraiffe z Messenie ggee, wo si messenische Asine gründet hend.

Ane 424 v. Chr. hend d Athener im Peloponnesische Chrieg under de Füerig vom Nikias vo de Insle Kythera us di lakonischi Chüste aagriffe, debii o d Stedt Helos und Asine.[2] Guet zwaihundert Joor spööter isch ane 219/8 v.Chr. im Makedonisch-Röömische Chrieg de makedonischi König Philippos V. miteme Heer bis as Vorpirg Tainaron zoge. Er hett Asine aagriffe, isch aber zruggschlage wore.[3]

Lueg no[ändere | Quälltäxt bearbeite]

Noowiis[ändere | Quälltäxt bearbeite]

  1. Strabon: Geographike 8.5.2 (363)
  2. Thukydides: Peloponnesische Chrieg 4.54.4
  3. Polybios: Historie 5.19.5

Literatur[ändere | Quälltäxt bearbeite]

  • Yves Lafond: Asine. In: Der Neue Pauly (DNP). Band 2, Metzler, Stuttgart 1997, ISBN 3-476-01472-X, Sp. 81.