Filipp V. vo Makedonie

Münze mit em Bild vom Köönig Filipp V. vo Makedonie (London, British Museum)

Dr Filippos V. (altgriech. Φίλιππος, latiin. Philippus; * 238 v. d. Z.; † 179 v. d. Z.) isch vo 221 v. d. Z. aa Köönig vo Makedonie gsi. Er het us em Huus vo de Antigonide gstammt und isch dr Soon vom Köönig Demetrios II. Aitolikos und vo dr Fthia/Chryseis gsi.

Lääbe

Wil dr Filipp non e Chind gsi isch, wo si Bater gstorbe isch, het si Groossunggle und Stiefvater Antigonos III. Doson d Herrschaft über Makedonie übernoo und dr Filipp adoptiert. 221 v. d. Z. isch er Köönig vo Makedonie worde und Hegemon über dr grösst Däil vo Griecheland (dr hellenisch Bund). Im sogenannte Bundesgenossechrieg (220–217 v. d. Z.) het dr Filipp das Erb erfolgriich chönne verdäidige.

Wäge sine Chrieg gege die hellenistische Groossriich vo de Ptolemäer und Seleukide und gege chlineri griechischi Mächt het sich Rom mee und mee in Griecheland iigmischt.

Im Zwäite Punische Chrieg het dr Filipp 215 v. d. Z. woorschinlig e Bündnis mit em Hannibal abgschlosse und es isch zum erste makedonisch-römischen Chrieg choo. Im Friide vo Phoinike im Joor 205 v. d. Z. isch d Macht vom Filip e chli beschnitte worde.

Won er si Macht in dr Egeis uf Choste vom Ptolemäerriich het welle usbaue, het dr Filipp Händel mit Rhodos und em Köönigriich Pergamon aagfange, wo d Römer um Hilf bittet häi. Im zwäite makedonisch-römische Chrieg (200–197 v. d. Z.) het dr Filipp 197 v. d. Z. die entschäidendi Schlacht bi Kynoskephalai gege d Römer verloore und het im Friidensverdraag si Flotte und wichdigi Stützpünkt und d Hegemonii über Griecheland müesse ufgee.

Er het sich denn mit Rom im Chrieg gege dr Aitolisch Bund verbündet uund het si Stellig im Balkanruum wider chönne konsolidiere.

Noch em Filip sim Dood het si Soon Perseus brobiert, d Macht vo Makedonie wider z vergröössere. Rom het en aagriffe und 168 v. d. Z. im Dritte Makedonische Chrieg in dr Schlacht vo Pydna gschlaage

Kwelle

• Polybios, Historien, Büecher IV und V.

Litratuur

• Ernst Badian: Titus Quinctius Flamininus. Philhellenism and Realpolitik. University Press, Cincinnati, Ohio 1971.
• Hermann Bengtson: Herrschergestalten des Hellenismus. Beck, Münche 1975, ISBN 3-406-00733-3, S. 211–233.
• Arthur M. Eckstein: T. Quinctius Flamininus and the campaign against Philip in 198 B.C. In: Phoenix, Jg. 30 (1976), S. 119–142, ISSN 0031-8299.

Vorgänger Antigonos III. Doson

Köönig vo Makedonie 221–179 v. d. Z.

Nochfolger Perseus