Theuderich II.

Theuderich II.
König vo Austrasie und de Burgunder
Regierigsziit	596-613
Uf d Wält cho	587
Gstorbe	613
Dodesort	Metz
Vorgänger	1. As König vo Austrasie: Theudebert II. 2. As König vo de Burgunder: Childebert II.
Dronfolg	Lex Salica: Dr Sigibert, wo vo dr Grossmueter inthronisiert worden isch. S Erb isch nit under alle Söhn ufdeilt worde.
Nochfolger	Sigibert II.
Verhürotet mit	Ermenberge, d Dochder vom westgotische König Witterich

Dr Theuderich II. (latiinisch: Theudericus) (* 587; † 613 z Metz) isch König vo de Franke gsi mit dr Residänz Chalon-sur-Saône. Er isch dr zweit Sohn vom König Childebert II. gsi und isch noch däm siim Dod 596 si Nochfolger im Deilriich Burgund worde.

Si Vater het en 589 as Regänt nach Chalon im Burgund gschiggt, währed si elter Brueder, dr Theudebert II., z Soissons in Austrasie iigsetzt worden isch wurde. Für e Fall, ass dr König wurd stärbe und e Riichsdeilig nötig wurd, hai beidi Prinze scho gwüsst, weles Deilriich si wurde übercho.

Noch em Childebert siim Dod im Johr 596 si d Brüeder under dr Regäntschaft vo ihrer Grossmueter Brunichild gsi. Deren ihri Macht isch chliiner worde, wo si s Vordringe noch Weste vo de Aware mit ere Gäldzahlig aghalte het. S Land isch aber deilt worde, wie s vorgseh gsi isch, dr Theuderich het im Guntram siis Burgund ubercho, mit de Stedt Orléans, Toulouse, Agen, Nantes, Angers, Saintes, Angoulême, Périgueux, Blois, Chartres, and Le Mans. Aber d Fredegund, d Mueter vom Chlotar II., em König vo Neustrie, het s Machtvakuum usgnützt und Paris, wo neutrals Gebiet hät sötte si, für sich gnoh. Si het en Armee noch Laffaux gschiggt und d Armeä vom Theudebert und vom Theuderich gschlage.

D Brunichilde, nochdäm si dr Theudebert 599 us Austrasie gjagd het, het für e Theuderich regiert. Si het s em Theudebert übel gnoh, und si Brueder agstachlet, gegen ihn Chrieg z mache. D Sens isch s zum ene Gfächt cho, wo dr Theuderich gwunne het, aber wil ihren Unggle Chlothar nit Rueh geh het, hai si sich verbündet und hai en im Johr 600 in dr Schlacht vo Dormelles entscheidend gschlage. Dr Chlothar het vo denn a nume no über d Gegend vo Rouen, Beauvais und Amiens gherrscht. 602 si d Brüeder zsämme gege d Baske zoge, wo im Süde vom Land iigfalle si und hai denn e Gränzherzogdum zwüsche de Pyreneä und dr Garonne gründet, die spöteri Gascogne, und hai dr Genialis as Herzog iigsetzt.

Spöter hai d Brüeder wäge dr Landverdeilig afo händle und dr Theuderich het dr Theudebert z Étampes gschlage. Wo dr Chieg mit em Chlothar 605 wider agfange het, het dr Theudebert em Theuderich nit ghulfe drbii. Si hai sich z Étampes an dr Louet droffe, aber dr Theudebert het kei Understützig welle ge. Dr Theuderich het s Gfächt gegen em Chlothar siim Sohn Merowech und siim Huusmeier Landrich gwunne, si eigene Huusmeier, dr Berthoald isch aber gfalle. Dr Protadius, e Parteigänger vo dr Brunichilde, isch dr neu Huusmeier gsi und het en zum Chrieg gege Austrasie ufgstachlet, aber die Adlige hai en ermordet, so isch e Chrieg zwüschen en grad no verhinderet worde. Vo denn a het jede Verbündeti gege dr ander gsuecht.

610 hai si sich no einisch z Selz im Elsass droffe, für zum Friide z mache. Dr Theudebert isch aber mit ere Armee zu de Verhandlige cho und het siim Brueder siini Bedingige chönne diktiere und dä het s Elsass, Saintois, dr Thurgau und d Champagne verlore und denn si siini Manne östlig vom Jura vo de Alemanne gschlage worde.

611 si d Aware wider ins Riich iigfalle, und dr Theudebert het sich elei mit ene müesse schlo. Dr Theuderich het sich vom Unggle Chlothar lo verspräche neutral z bliibe und het 611 si Brueder agriffe. Zweimol het er dr Theudebert gschlage, zerst bi Toul (öbbe 611) und denn bi Zülpich (612) und isch im Driumph z Köln iizoge. Dr Theudebert und siini Söhn si gfangegnoh und umbrocht worde.

Dr Chlothar het d Belohnig für si Neutralitet verlangt, dr Theuderich, wo denn uf em Höhepunggt vo siiner Macht gsi isch, het abglähnt. Aber lang het er si Macht nit chönne gniesse. Mit 25 isch er 613 z Metz an dr Dysenterii oder an ere Vergiftig gstorbe, won er e Chrieg gegen e Chlothar vorbereitet het, wil dä s Herzogdum Dentelin zruggnoh het, wie s em dr Theuderich im letzte Bruederchrieg gegen e Theudebert versproche gha het, wenn er wurd neutral bliibe.

Familie

Dr Theuderich het vier Chinder gha, aber ihri Mueter oder Müeter kennt me nid. Dr eltist isch dr Sigibert gsi, wo 602 uf d Wält cho isch, dr Childebert (* 603) isch e Johr jünger gsi und dr Corbus (* 604) zwei Johr. Dr chliinst isch dr Merowech gsi, wo im Johr 607 uf d Wält cho isch. Si Götti isch dr Chlothar II. gsi, was em emol noch em Dod vo siim Vater s Läbe grettet het, wo dr Chlothar zwei vo siine Brüeder het lo umbringe, währed em Childebert d Flucht glungen isch. Wil die Chinder vo Konkubine gstammt hai, het dr Kolumban se nit welle sägne, si siige vo "Huere uf d Wält brocht worde."

Lueg au

• Dr Merowingisch Bruederchrieg

Quälle

Noch em Ardikel Theuderich II. uf dr dütsche, em Ardikel Thierry II (roi) uf dr französische und em Ardikel Theuderic II uf dr änglische Wikipedia.

Vorgänger Theudebert II.

König vo Austrasie und de Burgunder 596-613

Nochfolger Sigibert II.

Vorgänger Childebert II.

König vo de Burgunder 596-613

Nochfolger Sigibert II.