Honshu
Honshu (jap. 本州) isch di gröschti vo de viir japanische Hauptinsle. De Name bedütet Hauptprovinz. Au d Hauptschtadt Tokio liigt uf Honshu und zwar an de Oschtküschte.
Geographii
[ändere | Quälltäxt bearbeite]Nördlich vo Honshu ligt, getrennt durch d Tsugaru-Schtroos d Insle Hokkaido, im Süde d Insle Shikoku und im Südweschte Kyushu. Honshu isch öppe 1300 km lang und an de breiteschte Stell 240 km, an de schmalschste 50 km breit. D Gsamtflächi vo de Insle isch öppe 230'500 Quadratkilometer, wo öppe 60 % vo de gsamte Flächi vo Japan entschpricht. De höchschti Punkt vo de Insle isch uf em Gipfle vom Fuji, eme Vulkan, wo 3776 Meter höch isch.
Honshu ligt an ere seismisch aktive Schtell, wo di pazifische Platte mit de nordamerikanische Platte zämme unter di eurasischi abtaucht. Us dem Grund gits uf Honshu vili aktivi Vulkan und hüüfig Ärdbäbe. Di gröschte in de letzschte hundert Johr sind di vo 1923, 1995 und 2011 gsi.
Verwaltig und Bevölkerig
[ändere | Quälltäxt bearbeite]D Insle isch in 34 Präfekture iiteilt, wo sich widerum uf füf Region verteile. D Regione sind Chugoku (中国) im Weschte, Kinki (近畿) im mittlere Weschte, Chubu (中部) im Zentrum, Kanto (関東) im Oschte und Tohoku (東北) im Norde. Bewohnt gsi isch d Insle im Johr 2000 vo öppe 100 Millione Lüt. Die meischte läbe in de Kanto-Ebeni in und um di Schtädt Tokio und Jokohama. Witeri grossi Schtädt sind Kyoto, Osaka, Kobe und Hiroshima.
Weblink
[ändere | Quälltäxt bearbeite]
Commons: Honshu – Sammlig vo Multimediadateie