D Christoph Merian Stifdig

S Verwaltigsgeböid vo dr Christoph Merian Stifdig z Basel. S Blakaat an dr Huuskante zäigt d Bordret vo de Stifdigsgründer Christoph und Margaretha Merian.

Dialäkt: Baseldütsch

D Christoph Merian Stifdig (bis 1972 Chr. Merian’sche Stiftung) isch e gmäinnützigi Stifdig mit Sitz und Däätigkäit z Basel. S Spektrum vo iirer Däätikäit isch bräit. Si het as Ufgoob, s Wool vo de Mensche in dr Stadt Basel z fördere, und für daas Harmonii z schaffe zwüsche soziale, kulturelle, ökologische und wirtschaftlige Ziil.

D Gründig und s Ziil vo dr Stifdig

D Stifdig isch vom Christoph Merian (1800-1858) in sim Testamänt vom 26. Merz 1857 dur e Schänkig an d Stadt Basel gründet worde und isch noch em Dood vo sinere Witwe Margaretha (1806-1886) am 3. Mai 1886 rächtschreftig worde. S Testamänt vom Christoph Merian bestimmt in de Paragrafe 26 und 27, ass s Kapital söll erhalte wärde und dr Erdraag vo dr Stifdig sött brucht wärde, zum Noot und Unglück lindere, s Wool vo de Mensche fördere und d Iirichdige finanziere, wo s stedtische Gmäinwääse sich drum muess kümmere oder wo allgemäinnützlig und zwäckmässig si.

Däätigkäit

D Däätigkäit vo dr Stifdig isch noch em Testamänt uf d Stadt Basel beschränkt. D Stifdig het am Afang öffentligi Bauvorhaabe und die soziale Instituzioone vo dr Basler Bürgergmäind mit Gäldzaalige understützt, het aber vo 1952 aa afo Alterssiidlige oder Grossüberbauige realisiere und het iir Wirkigsspektrum sit de 1980er Joor stark usdeent. Si isch (Stand 2009) zur Hauptsach mit äigene Projekt in de Beriich

• Natuur, Landwirtschaft und Umwält
• Sozials und Stadtentwicklig
• Kultuur

däätig und understützt mit Förderbidrääg zuesetzlig Aktividääte vo andere. D Stifdig schüttet jeedes Joor öbbe elf Millioone Franke us, wo je 45 Brozänt drvo an d Bürgergmäind und d Iiwoonergmäind vo dr Stadt Basel gönge und zää Brozänt in e Fond zum baue und Land chaufe. D Gälder wärde dur Mietliigeschafte, Baurächt und Finanzaalaage erwirtschaftdet. S Stiftigsvermööge isch öbbe 300 Millioone Franke grooss (Stand 2008) und bestoot us 900 ha Land (z. B. Brüglige, Löijeburg oder Dreispitz), 1500 Mietobjekt und eme Bortföi vo Wärtschrifte.

D Stifdig füert administrativ au meereri sälbständigi und unsälbständigi Stifdige (z. B. s Cartoonmuseum Basel) und schafft mit Partner im In- und Usland zämme (z. B. im Künstlerusdusch iaab).

Gsetzligi Grundlaage und administrativi Struktuur

D Stifdig isch öffentlig-rächtlig und e sälbständigi Körperschaft. Si stoot allerdings under dr Oberufsicht vo dr Bürgergmäind, und fast alli Brojekt vo dr Stifdig müesse vo politische Gremie (Bürgerroot vo dr Stadt Basel, Bürgergmäindroot vo dr Stadt Basel, Regierigsroot vom Kanton Basel-Stadt) bewilligt wärde. D Bürgergmäind git d Bewilligung im Raame vom New Public Management und verabschiidet Läistigsufdreeg und Globalbüdsche. Für d Läitig vo dr Stifdig isch d Stifdigskommissioon zueständig, dr Vorsitz über die operativi Läitig (Gschäftsläitig) het dr Diräkter, wo men em bis 1975 Verwalter gsäit het. Wil die äigeni Stifdigsaktividäät usbaut worden isch, het mä dr Personalbestand vo ursprünglig drei Persone müesse vergröössere und d Däätigkäitsberiich müesse iidäile. 1958 isch en äigeni landwirtschaftligi Läitig iigrichdet worde, 1966 e Liigeschaftsverwaltig und 1974 e Bauverwaltig; 1976 isch dr Christoph Merian Verlag as Abdäilig drzue choo und 1985 s Ressor Stedtischi Ufgoobe. Sit Aafang 2007 isch d Stifdig in d Abdäilige Personal & Services, Immobilie, Finanze, Natuur, Landwirtschaft & Umwält, Sozials & Stadtentwicklig und Kultuur iidäilt. D Stifdig het im Joor 2008 89 Persone in 73,3 Stelle beschäfdigt, no 26 Persone si in dr Dreispitz-Management AG, e 100-prozäntigi Dochdergsellschaft, aagstellt gsi.

Litratuur

• Gustaf Adolf Wanner: Christoph Merian 1800–1858. Schwabe, Basel u. a. 1958.
• Rudolf Suter: Die Christoph Merian Stiftung 1886–1986. Christoph-Merian-Verlag, Basel 1985 (ISBN 3-85616-025-6).
• Robert Labhardt: Kapital und Moral. Christoph Merian - Eine Biografie. Christoph Merian Verlag, Basel 2011 (ISBN 978-3-85616-525-3).
• Leitbild der Christoph Merian Stiftung (Site cha nüme abgrüeft wärde; Suche im Webarchiv)[1] [2] Vorlage:Toter Link/www.merianstiftung.ch (PDF-Dokument), 2007.
• Jahresbericht 2008 (Site cha nüme abgrüeft wärde; Suche im Webarchiv)[3] [4] Vorlage:Toter Link/www.merianstiftung.ch (PDF-Dokument) der Christoph Merian Stiftung, 2009.

Weblingg

• Website vo dr Christoph Merian Stifdig

Fuessnoote

Dä Artikel basiert uff ere fräie Übersetzig vum Artikel „Christoph_Merian_Stiftung“ vu de dütsche Wikipedia. E Liste vu de Autore un Versione isch do z finde.