Alexander Dobrindt

Dr Alexander Dobrindt bi dr Unterzaichnig vum Koalitionsverdrag vu dr 18. Wahlperiod vum Bundesdag (2013).

Dr Alexander Dobrindt (* 7. Juni 1970 z Peißenberg) isch e dytsche Bolitiker (CSU) un syt Septämber 2017 Vorsitzer vu dr CDU-Landesgruppe im Dytsche Bundesdag. Vu Dezämber 2013 bis Oktober 2017 isch er Bundesminischter fir Verchehr un digitali Infrastruktur gsii. Vum Februar 2009 bis Dezämber 2013 isch er Generalsekretär vu dr CSU gsii.

Läben un Beruef

Noch em Abitur anne 1989 am Gymnasium Weilheim het dr Dobrindt e Soziology-Studium an der Ludwig-Maximilians-Universität München absolviert, wun ere anne 1995 as Diplom-Soziolog abschgschlosse het. Derno isch er vu 1996 bis 2001 chaufmännische Laiter un vu 2001 bis 2005 Gschäftsfierer un stille Gsellschafter vu dr mittelständische Maschineböu-Firma Holzner & Sanamij z Peißenberg gsii.

Dr Alexander Dobrindt isch remisch-katholisch, syt 2006 ghyrote mit dr Tanja Dobrindt geb. Käser un het mit ere ne Suhn.

Bartei

Dr Dobrindt isch anne 1986 in di Jung Union un anne 1990 in d CSU yydrätte. Vu 1990 bis 1997 isch er Vorsitzer vum JU-Chraisverband Weilheim-Schongau un vu 1993 bis 1997 au stellverdrättende JU-Bezirksvorsitzer gsii. Syt 1996 isch er Mitglid im Märtgmairot Peißenberg un seit 2001 Ortsvorsitzer vu dr CSU Peißenberg gsii. Derzue het er em Chraisdag vum Landchrais Weilheim-Schongau aaghert. Syt 2009 isch er Vorsitzer vum CSU-Chraisverband Weilheim-Schongau.

Abgordnete

Anne 2002 het dr Dobrindt mit 59,4 Brozänt vu dr Erschtstimme s Diräktmandat im Bundesdagswahlchrais Weilheim gwunne. Im Bundesdag isch er vu Jänner bis Novämber 2005 stellverdrättende Vorsitzer vum Uusschuss fir Wirtschaft un Arbet gsii. Vu Dezämber 2005 bis Novämber 2008 isch er Vorsitzer vum Arbetschrais Wirtschaft, Technology, Energy, Bildig un Forschig, Turismus vu dr CSU-Landesgruppe, vu Novämber 2008 bis Februar 2009 Vorsitzer vu dr Arbetsgruppe Bildig, Forschig un Technikfolgenabschetzig vu dr CDU/CSU-Bundesdagsfraktion gsii. Syt 2005 ghert er derzue as Bysitzer em Vorstand vum Barlemäntschrais Mittelstand vu dr CDU/CSU-Bundesdagsfraktion aa. Bi dr Bundesdagswahl 2009 het dr Dobrindt in sym Wahlchrais 52 Brozänt vu dr Erschtstimmen iberchuu un isch wider in Bundesdag yyzoge. Bi dr Bundesdagswahl 2013 isch er mit 57,2 Brozänt vu dr Erschtstimme widergwehlt wore un 2017 mit 47,9 % vu dr Erschtstimme.

CSU-Generalsekretär

Wu dr bishärig CSU-Generalsekretär Karl-Theodor zu Guttenberg im Februar 2009 s Amt vum Bundesminischter fir Wirtschaft un Technology ibernuu het, isch dr Dobrindt vum CSU-Vorsitzer Horst Seehofer fir s Amt vum Generalsekretär vorgschlaa wore. Vum 9. Februar 2009 bis zum zum 15. Dezämber 2013 het dr Dobrindt des Amt uusgiebt.

Bundesverchehrsminischter

Am 17. Dezämber 2013 isch dr Alexander Dobrindt dur dr Bundesbresidänt Joachim Gauck zum Bundesminischter fir Verchehr un digitali Infrastruktur ernännt wore.

Mit dr Konschtituierig vum neie Bundesdag am 24. Oktober 2017 het er sy Minischteramt ufgee.

Gsellschaftligs Engaschmänt

• Stellverdrättend Mitglid vum Byrot vu dr Bundesnetzagentur fir Eläktrizitet, Gas, Telekommunikation, Boscht un Yysebahne
• Mitglid vum ZDF-Färnsehrot z Mainz as Verdrätter vu dr CSU
• Schitzeverain VSG Peißenberg
• Knappeverain Peißenberg

Weblink

 Commons: Alexander Dobrindt – Sammlig vo Multimediadateie

• Websyte vum Alexander Dobrindt
• Biographie beim Deutschen Bundestag
• Alexander Dobrindt uf abgeordnetenwatch.de

Fueßnote

Dä Artikel basiert uff ere fräie Übersetzig vu dere Version vum Artikel „Alexander_Dobrindt“ vu de dütsche Wikipedia. E Liste vu de Autore un Versione isch do z finde.