Theodor I. (Byzanz)

Theodor I. Laskaris

Theodor I. Laskaris Θεόδωρος Α΄ Λάσκαρις
Kaiser vo Nikaia (Kaiser vom Byzantinische Riich im Exil)
Bordret vom Theodor I. us eme Manuskript us em 15. Joorhundert
Regierigsziit	1205 bis 1222
Uf d Wält cho	öbbe 1174
Geburtsort	Konstantinopel
Gstorbe	1222
Vorgänger	Alexios V.
Nochfolger	Johannes III.
Ehefraue	Anna Komnena Angelina Philippa vo Armenie Marie de Courtenay
Nochkomme	Nikolaos Laskaris, Ioannes Laskaris, Eirene Laskarina, Maria Laskarina, Eudokia Laskarina, Konstantinos Laskaris
Vater	Manuel Laskaris
Mueter	Ioanna Karatzaina

Dr Theodor I. Laskaris bzw. Theodoros I. Laskaris (griechisch Θεόδωρος Α' Λάσκαρης, * um 1174; † 1222) isch vo 1205 bis 1222 dr byzantinisch Kaiser im Exil z Nikaia gsi.

Lääbe

Dr Theodor isch Schwiigersoon vom Kaiser Alexios III. worde und het sich bi dr Verdäidigung vo Konstantinopel gege die christlig-latiinische Chrüzridder wääred em Vierte Chrüzzuug vo 1203 bis 1204 uszäichnet. Noch dr Erooberig vo dr Stadt het er sich z Bitünie mit ere Grubbe vo Flüchtling in dr Stadt Nikaia niidergloo, wo eso zum Sammelpunkt für sini Landslüt worden isch.

Er het zwar nid müesse Angst haa, ass d Latiiner iin wurde aagriffe, aber er het scho bald müesse go hälfe, d Bulgare z bekämpfe. Er het aagfange e nöije byzantinische Staat in Chläiasie ufzbaue und het im Joor 1206 dr Kaiserditel aagnoo.

In de Joor druf het dr jungi Staat Find uf alle Site ghaa. Er het sich gegen e latiinisch Kaiser Heinrich vo Flandere müesse verdäidige, het si Rivaal Alexios I. vo Trapezunt gschlaage und het en erfolgriiche Geegenaagriff gege dr Kai Chosrau I., dr Sultan vo Rum gmacht, wo vom abgsetzte Alexios III. zum Chrieg gegen in aagstiftet worde isch.

1210 het dr Theodor in ere Schlacht bi Antiochia z Pisidie dr Alexios gfange gnoo und d Stadt sälber vo de Türke zruggerooberet.

Gege s Ändi vo sinere Herrschaft het er über e Gebiet regiert, wo öbbe de römische Browinze Asia und Bitünie entsproche het.

Weblingg

• Wilhelm Blum: Theodor I. (Byzanz). In: Biographisch-Bibliographisches Kirchenlexikon (BBKL). Band 11, Herzberg 1996, ISBN 3-88309-064-6, Sp. 861–863.

Vorgänger Alexios V.

Kaiser vo Byzanz 1204–1222

Nochfolger Johannes III.

Dä Artikel basiert uff ere fräie Übbersetzig vum Artikel „Theodor_I._(Byzanz)“ vu de dütsche Wikipedia. E Liste vu de Autore un Versione isch do z finde.