Romantik

Dr Wanderer über em Näbelmeer vom Caspar David Friedrich

D Romantik isch e kulturgeschichtligi Epoche, wo d Ufklärig und dr Klassizismus abglöst het und vom Ändi vom 18. Johrhundert bis wiit in s 19. Johrhundert ine duurt het. Si het sich bsundrigs uf de Gebiet vo dr bildende Kunst (1790–1840), dr Literatur (1795–1848) und dr Musik (Chärnphase 1820–1850) güsseret. In dr Politik het d Romantik dr Nationalismus und dr Freiheitskampf verherrligt, isch denn aber meh und meh zun ere reaktionäre Geisteshaltig worde, wo anstatt vom nationale Freiheitsideal, wo die Französischi Revolution verbreitet gha het, ständischi, hüfig autokratischi Gsellschaftsforme as Ideal anegstellt het.

Im hütige, allgemeine Sproochgebruuch bezeichnet dr Begriff Romantik mit em Adjektiv romantisch d Eigeschaft von ere Sach oder eme Ereignis, in de Mensche Liebi und Sehnsucht z wecke, so öbbe in de Wortverbindige „romantischi Liebi“, „romantischi Musig“ oder „e romantische Brief“.