Oeschinensee

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Oeschinensee
Blick uf de Oeschinesee vom Oberbärgli uus
Datä
Laag: Berner Oberland
Flächi 1.1147 km²
maximali Tüüfi: 56 m
maximali Längi: 1.6 km
maximali Breiti: 1 km
Zueflüss: mehrere Gletscherbäch
Abfluss: Öschibach
Höchi über Meer: 1578 m
Grösseri Ortschafte am Ufer: Chanderstäg
Bsunderheite: underirdische Abfluss
Charte
Oeschinesee

Dr Oeschinesee liit oberhalb vo Chanderschtäg im Berner Oberland i dr Schwiiz. Siin Wasserschpiegel liit durchschnittlich uf ere Höchi von 1578 m über Meer. Dr See isch bi normalem Wasserschtand 56 m tüüf und hät e Flächi vo 1.5 km², womit er zu de grössere Alpeseeä i dr Schwiiz ghört.

Dr Oeschinesee isch oscht- und südsiitig vo de Dreituusiger Blüemlisalp, Oeschinehorn, Fründehorn und Doldehorn iigrahmt, vo dene Gletscherbäch wird er gschpise. Dr Öschibach (luut Landescharte vo dr Schwiiz mit »Ö« schtatt »Oe«) flüüsst underirdisch dur d Abrigelig vom See ab, tritt aber bald druuf wider as Tagesliecht. Siini Wasser werded zur Trinkwasserversorgig vo Chanderstäg und zur Schtromproduktion gnutzt. Dr Öschibach mündet im Ort Chanderschtäg i d Chander.

Am Oeschinesee entlang verlaufed die Wanderweg uf d SAC-Hütte Blüemlisalphütte (2834 m ü.M.) und Fründehütte (2526 m ü.M.).

Vo Chanderstäg uus isch dr See per Sessellift erreichbar. Vo dr Bergschtation (mit Sommerrodelbahn) erreicht mer de See uf liecht abfallender Schtrecki in öppe 20 Minute Gehziit. Zum Teil pendled au Fuehrgschpann zwüsched Lift und Oeschinesee. Sehr lohnend isch au d Wanderig vo dr Bergschtation über de Heuberg (1940 m ü.M., grandiosi Uussicht uf de See und di umgebende Dreituusiger) zur im Summer bewirtschaftete Alp Oberbärgli (1978 m ü.M.), vo wo mer über d Alp Underbärgli zu de Restaurants am See abschtiige chan.

Oeschinesee um 1900

Schwindelfreii und trittsicheri Bergschtiiger chönnd de See au umrunde. D Gras- und Felsbänder vo dr so genannte »Undere Schnuer« erlaubed uf öppe 1800 m Höchi e sehr luftigi Traversierig vo dr Alp Underbärgli zum Uufschtiegsweg zur Fründehütte. Bi Nässi oder unsicherem Wetter isch vonere Begehig dringend abzrate. Einigi vo de schpärliche Sicherige sind imene erbärmliche Zueschtand (trotzdem chann es Chlätterschtiigset hilfriich sii). Im »I de Fründe« gnännte Kar im Wandwinkel sind mehreri Bachläuf z überschriite. Einigi wenigi Schteimanne erliechtered d Orientierig. D Fründeschnuer erlaubt en hochinteressante Übergang vo dr Fründe- zur Blüemlisalphütte.

Weblinks[ändere | Quälltäxt bearbeite]

Bilder[ändere | Quälltäxt bearbeite]