Markus Ramseier

Dr Markus Ramseier, wo am zwölfte Augschte 1955 z Lieschtel uf d Wält cho und am 21. Juli 2019 gstorben isch, isch e Schwiizer Schriftsteller, Naameforscher, Schnitzelbänkler und Museumsleiter gsi.

Lääbe

Er isch z Brattelen ufgwachse und het de a dr Uni Basel d Germanistik, d Anglistik und d Romanistik studiert. Mit ere Arbet zum Theema Mundart und Hochdüütsch am Radio vo der düütsche und der rätoromanische Schwiiz het er anne 1985 dokteriert. Er isch ghüroote gsi und het vier Chind gha.

Z’eerscht het dr Markus Ramseier als wüsseschaftlichen Assischtänt am Dütsche Seminaar vo dr Uni Basel gschaffet. Er isch de Lehrer, Journalischt und Lektoor gsi. Und vo 1995 bis 2017 isch syni Arbet am Baselbieter Namebuech ggange; er isch dr Leiter vo dr Forschigsstell für d Fluernäme vom Kanton Baselland gsi. Er isch i allne Gmeinde go d Kulturlandschaft aluege und mit de Lüüt über die lokale Nääme go reede. Derzue het me die alte Kwellen i den Archiv usegsuecht zum d Gschicht vo de Nääme und iiri sproochliche Wurzle erklääre. Für das alles het’s es ganzes Forschigsteam bruucht, und anne 2017 isch das sibebändige Wäärch trukt usecho, es het meh weder füfzgtuusig Nääme drinn.

Dr Ramseier het sälber es paar literarischi Wäärch gschribe, Gschichte und bsunders Romään. Er isch bim Schwiizer Schriftstellerverband und bi dr Basler Hebelschtiftig drby gsi. Vo 2008 bis 2011 het er näbeby s Dichter- und Stadtmuseum Lieschtel gleitet.

Übere Autoor vo der Baselbieter Mundartkolumne Ärbslizeller, wo dr Ramseier für d Oberbaselbieter Zytig Volksstimme gschribe het, isch i dr Mundartsändig Schnabelweid vom Schwiizer Radio am 29. Augschte 2019 en eigeti Sändig choo. Grad churz vorhäär isch dr Ramseier mit Drüesächzgi anere schwääre Chranket gstoorbe. Der SRF-Redakter Markus Gasser het drfür es paar Sache zum Adänken an Sproochforscher und Dichter zämegstellt; er seit i dr Sändig, bim Ramseier sig s bi allnen Arbeten immer uf verschideni Art um d Sprooch ggange: um d Mundart bi churze Tegscht, s Hochdüütsch für grossi Wäärch und au um d Värssprooch für d Basler Fasnacht, wo dr Ramseier mit sinere Schnitzelbankfigur «Stächpalme» uffträtte sig, wie dr Gasser verzellt. Me ghört i dere Schnabelweid-Nummere dr Ramseier tank früenere Tonufnaame vom Radio sälber no rede, und dr Redakter bringt au Muschter vom Ramseier syne Mundartkolumne.

Anne 2011 het dr Hebelbund Löörech em Baselbieter Sproochfründ als Anerchennig für syni vile Leischtige für d Mundart dr Heebeldank gää. 2014 het dr Markus Ramseier der Baselbieter Kulturpryys übercho.

Wäärch

• Mundart und Standardsprache im Radio der deutschen und rätoromanischen Schweiz. Sauerländer, Aarau 1988, ISBN 3-7941-2910-5.
• Sprachunterricht – Theorie und Praxis. Grundlagen zum „Schweizer Sprachbuch“ (mit Elly und Hans Glinz). Zürich 1997, ISBN 3-252-02070-X.
• zäme mit andernen Autoore: Baselbieter Namenbuch. Die Orts- und Flurnamen des Kantons Basel-Landschaft. sibe Bänd, Liestal 2017, ISBN 978-3-906819-17-4.
• Mäandertal. Roman. Cosmos, Muri bei Bern 1994. ISBN 3-305-00361-8
• Das Land der letzten Meter. Roman. Cosmos, Muri bei Bern 1998. ISBN 3-305-00361-8
• Wie küsst man einen Engel? Roman. Cosmos, Muri bei Bern 2002. ISBN 3-305-00363-4
• Löcher. Geschichten mit Bildern. Wolfbach, Zürich 2004. ISBN 3-9522831-9-3
• Licht. Geschichten. Cosmos, Muri bei Bern 2009. ISBN 978-3-305-00364-8
• Vogelheu. Roman. Haymon, Innsbruck 2013. ISBN 978-3-7099-7013-3
• In einer unmöblierten Nacht. Roman. Haymon, Innsbruck 2018. ISBN 978-3-7099-3420-3
• Ärbslizeller. Baselbieter Kolumnen. Verlag Wolfbach, 2019. ISBN 9783906929309

Literatur

• Markus Ramseier. In: Kürschners Deutscher Literatur-Kalender 2018/2019. Band II: P–Z. Walter de Gruyter, Berlin 2018, ISBN 978-3-11-057616-0, S. 742.

Weblink

• Markus Ramseier bi dr Stiftig Bibliomedia