Jean-Pierre Moulin (Journalist)

Dr Jean-Pierre Moulin (* 11. Jänner 1922 z Lausanne; † 8. Dezämber 2023 z Paris; haimeberächtigt z Lausanne) isch e Schwyzer Schurnalischt, Schriftsteller un Bihnenautor gsii.

Lääbe

Dr Jean-Pierre Moulin isch as Suhn vum Schurnalischt Robert Moulin (1891–1942)uf d Wält chuu. Är het an dr Uniwersitet Lausanne studiert un mit eme Lizenziat vu dr Gaischteswisseschafte abgschlosse. Anne 1946 isch dr Moulin uf Paris gange, wun er as Schurnalischt fir d Gazette de Lausanne un druf fir d Tribune de Lausanne gschafft het. Derno isch er vu 1947 bis 1980 Korreschpendänt vum Weschtschwyzer Radio gsii, vu 1976 bis 1989 vum Weschtschwyzer Färnseh. Dernäbe het er au Sändige produziert.

Dr Moulin het John McPhee ibersetzt, het Sachbiecher iber di franzesisch Gsellschaft un au Roman un Nowälle verfasst. Mit syre Schweschter, dr Sängeri un Schurnalischti Béatrice Moulin (1926–2006), em Charles Apothéloz un em Frank Jotterand het er, v. a. fir s Theater Les Faux-Nez z Lausanne, s Chanson uf d Bihni brocht un dodermit an syni frieje Inträsse aagchnipft. Är het au Liedtäxt fir Sänger*ne wie dr Serge Reggiani un d Edith Piaf gschribe un het 2004 syni Gschicht vum franzesische Chanson Une histoire de la chanson française, des troubadours au rap vereffetligt.

Uusgläseni Schrifte

• Retourne-toi sur l`ange, 1961, Roman
• Renata nue, 1963, Roman
• J`aime le music-hall, 1965, Essay
• L`humour des Suisses, anthologie, 1966, Buch
• Comment peut-on ne pas être Français, 1975, Essay
• Comment peut-on ne pas être fou, 1978, Essay
• Qu`est-il arrivé à la France? 1982, Essay
• Enquête sur la France multiraciale, 1986, Essay
• La France et ses populations, 1987, Essay
• L`amant américain, 1992, Roman

Literatur

• Toni Cetta: Jean-Pierre Moulin. In: Historisches Lexikon vo dr Schwiiz. 23. Juni 2008.

Weblink

• Yytrag über Jean-Pierre Moulin (Journalist) im Lexikon vom Verein Autorinnen und Autoren der Schweiz
• Fonds Jean-Pierre Moulin, Schwyzerisches Literaturarchiv
• Jean-Pierre Moulin. Biografy un Bibliografy uf Viceversa Literatur

Dä Artikel basiert uff ere fräie Übersetzig vum Artikel „Jean-Pierre_Moulin_(Journalist)“ vu de dütsche Wikipedia. E Liste vu de Autore un Versione isch do z finde.