Ilias

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Manuskript F205 in dr Biblioteca Ambrosiana z Mailand mit Teggst und Illustrazioon vo de Värs 245–253 vom achte Buech vo dr Ilias us em spoote 5. oder früeje 6. Joorhundert n.d. Z.
Chupferstich 18,8 x 34,3 cm 1793 noch ere Zäichnig vom John Flaxman

D Ilias (griechisch Ἰλιάς Iliás) isch äins vo de eltiste schriftlige Wärk in Öiropa und schilderet en Abschnitt vom Trojanische Chrieg. S Epos umfasst 24 Büecher bzw. Gsäng, wie mä die Abschnitt sit dr Übersetzig dur e Johann Heinrich Voß bezäichnet. D Ilias basiert uf früegschichtlige Müüthe und Gschichte und wird im Homer zuegschriibe. D Ilias-Daarstellig vo de Olympische Götter het woorschinlig vil zur Entwigglig von ere nazionale griechische Religioon bidräit und brägt die öiropäischi Kunst- und Gäisteswüsseschaft bis in d Geegewart.

S Thema isch dr Chrieg zwüsche Troja und dr griechische Allianz vo de Achaier, wo denn scho in sim zääte Joor gsi isch. D Ilias beschribt nume 51 Dääg us em Chrieg und wie in dere Zit dr Zorn sich immer witer usbräitet und s Schiggsal vo de Heroe und de Götter wird, wo si nüd chönne drgeege due. Es het aagfange mit em Raub vo dr Chryseïs, wo d Eer vom Gott Apollon verletzt het. Wäge däm het er sich an de Achaier afo rääche. Wo schliesslig dr Apollon-Briester Chryses si Dochder zruggüberchunnt, verlangt dr Agamemnon, wo dr Oberbefäälshaaber vo de Achaier gsi isch, Ersatz für sini Büti und grootet eso in Komflikt mit em Achilleus. Dä gseet sich dorum enteert und ziet sich us de Kämpf zrugg. Dr „Zorn vom Achilleus“ wird zur Chlammere vom Epos, und findet zum Ändi aane aber non e nöiji Ursach. Wo dr Achilleus im 19. Gsang sich öffentlig mit em Agamemnon versöönt und wider bim Kämpfe mitmacht, verhinderet er e Niiderlaag vo de Achaier, git aber em Zorn uf e Hektor nooch, wo grad im Achilleus si best Fründ Patroklos döödet het. D Wuet vom Achilleus nimmt erst im letschte bzw. 24. Gsang ab, won er im Hektor si Liiche, wo 12 Dääg lang gschändet worde isch, im Vater vom Trojaner, em Köönig Priamos, überloot, so dass er sä cha begraabe.

Dr müüthisch Usgangspunggt für e Trojanisch Chrieg isch s Urdäil vom Paris und däm si Entfüerig uf Troja vom Agamemnon sinere Schwöögere Helena. Bäides wird in dr Kypria beschriibe. Dr Autor vo dr Ilias het aagnoo, ass mä die Gschicht kennt und si wird dorum in dr Ilias nume äinisch churz aadütet.

Vo dr List vom Odysseus, wo mit eme Ross us Holz e Grubbe vo bewaffnete Achaier in d Stadt Troja het chönne iineschlöise, wo denn d Stadtdoor ufdoo häi, so dass d Achaier Troja häi chönne eroobere und dr Chrieg ume gsi isch, vo däm verzellt nid d Ilias, sondern under anderem d Iliu persis us em sogenannte Epische Züklus.

D Ilias ghöört zu de bedütendste Wärk vo dr Wältlitratuur.

Litratuur[ändere | Quälltäxt bearbeite]

Kritischi Usgoobe
Übersetzige
Noocherzäälige
  • Gustav Schwab: Troja. Insel-Taschenbuch, Frankfurt/Leipzig 2004, ISBN 3-458-34717-8
  • Homerus, Ilias und Odyssee. Nacherzählt von Walter Jens. Bilder von Alice u. Martin Provensen, Ravensburg 1956 ISBN 978-3-473-35503-7
  • Franz Fühmann: Das hölzerne Pferd. Berlin 1968
Kommentar
  • Homerus, Ilias. vom Karl Friedrich Ameis. Bearbäitet vom Carl Hentze. Leipzig 1905–1932.
  • The Iliad: A Commentary. General edited Geoffrey Stephen Kirk. (6 Bänd) Cambridge 1985–1993 ISBN 978-0-521-31209-7
  • Homers Ilias: Gesamtkommentar. uusegee vom Joachim Latacz. Münche/Leipzig 2000 ff. (bis jetz erschiine: Prolegomena und zwäi Bänd in vier Däilbänd) ISBN 978-3-598-74302-3 (Hintergrundinformationen)

Weblingg[ändere | Quälltäxt bearbeite]

Wikisource Ilias im dütschsprochige Wikisource

 Allmänd (Commons): Iliad – Sammlig vo witere Multimediadateie