Henry Purcell

Us der alemannische Wikipedia, der freie Dialäkt-Enzyklopedy
Dr Henry Purcell, e Bordret vom John Closterman (1660-1711)

Dr Henry Purcell [ˈhɛnɹɪ ˈpɜːsəl] (* 10. Septämber 1659 (?) z Westminster; † 21. Novämber 1695 z London) isch en änglische Komponist im Barock gsi. Scho zu sine Läbzite het er as dr bedütendsti änglischi Komponist gulte und dorum het men em dr Eereditel Orpheus britannicus gee.

Biographii[ändere | Quälltäxt bearbeite]

Dr Henry Purcell isch dr Soon vom ene Mitgliids vo dr Chapel Royal gsi, dr Sängerkapälle vom Karls II, wo um 1660 errichdet worde isch. Er het bim Henry Cooke († 1672) und denn bim Pelham Humfrey (1647–1674) gleert, und wo dää gstorbe isch bim John Blow und Matthew Locke (1621/22–1677). 1676 isch er Organist an dr Westminster Abbey worde. Im däm Joor het er d Muusig zum John Dryden sim Schauspiil Aureng-Zebe und zum Thomas Shadwell sim Epsom Wells und The Libertine gschriibe. Denn si no mee Wärk für Schauspiil choo, drunder en Uwertüüre und e Masque zum Shadwell sinere Bearbäitig vom Shakespeare sim Timon of Athens.

Bischbil zum Loose: „I was glad“

1682 isch dr Purcell au no Organist vo dr Chapel Royal. Sini erste Wärk, wo im Druck erschiine si, d Twelve Sonatas, si 1683 veröffentligt worde. In deere Zit het er vor allem gäistligi Muusig und Ode zu festlige Aaläss vom Köönigshuus gschriibe, drunder 1685 zwäi Anthems zur Chröönig vom James II.. 1687 het er d Muusig für d Dragödie Tyrannick Love vom Dryden komponiert.

1689 is isch si ersti Opere Dido und Aeneas gspiilt worde und spööter het er no 38 dramatische Muusigwärk gschriibe. Sini Zitgenosse, drunder dr Händel, häi au sini Chillekomposizione gschetzt.

1690 het erfür e Version vom Dryden vo The Tempest d Muusig komponiert, für em Betterton si Bearbäitig vom Fletcher und Massinger iirer Prophetess und für em Dryden si Amphitryon. 1691 isch d Opere King Arthur entstande mit eme Libretto vom Dryden. 1692 het er d Muusig zu The Fairy Queen komponiert und im Joor druf für zwäi Komödie vom William Congreve: The Old Bachelor und The Double Dealer.

Zu de Mäisterwärk vom Purcell ghööre si Te Deum und Jubilate, wo für e Cäciliedaag vom Joor 1694 entstande si. 1694 het er e Anthem für d Druurfiir vo dr Köönigin Maria II. vo England gschriibe.

Dr Henry Purcell isch 1695 gstorbe und in dr Westminster Abbey näbe dr Orgle begraabe.

Wärk[ändere | Quälltäxt bearbeite]

Opere:

  • 1689: Dido and Aeneas

Semi-Opere:

  • 1690: The Prophetess, or the History of Dioclesian
  • 1691: King Arthur, or the British Worthy
  • 1692: The Fairy Queen
  • 1695: The Tempest (vermutlich nicht oder nur teilweise von Purcell)
  • 1695: Timon of Athens
  • 1695: The Indian Queen (Masque zum Abschluss von Daniel Purcell)

Anthems, z. B.:

  • 1695 Funeral Music for Queen Mary [Z 860]

E Hufe Vokal- und Instrumentaalmuusig wie Dschembalo- und Orglestücke, Chorwärk und 42 Duett und über 100 Lieder.

Litratuur[ändere | Quälltäxt bearbeite]

  • Michael Burden (Hrsg.): The Purcell Companion. London 1995.
  • Peter Holman: Henry Purcell. Oxford 1994.
  • Curtis Price: Henry Purcell and the London Stage. Cambridge 1984.
  • Curtis Price (Hrsg.): Purcell Studies. Cambridge 1995.
  • Franklin B. Zimmerman: Henry Purcell 1659–1695. His Life and Times. London 1967, ²1983.
  • Jonathan Keates: Purcell. A biography. London: Faber and Faber 2009. ISBN 978-0-571-24909-1.
  • Bruce Wood: Purcell. An extraordinary life. London 2009. ISBN 978-1-86096-298-1

Weblingg[ändere | Quälltäxt bearbeite]

 Commons: Henry Purcell – Sammlig vo Multimediadateie
Dä Artikel basiert uff ere fräie Übersetzig vum Artikel „Henry_Purcell“ vu de dütsche Wikipedia. E Liste vu de Autore un Versione isch do z finde.