Helene Bossert

D Helene Bossert (* 8. April 1907 z Zunzge; † 21. Februar 1999 z Dürne) isch e Schwyzer Mundartdichtere us em Baselbiet gsi.

Lebe

D Helene Bossert isch d Dochter vom Walter Bossert, eme Wägmacher, Chlibuur un Posamenter, und vo der Elise geb. Schneider, ere Posamäntere, gsi. No de Primarschuel z Zunzge het si e sprochpädagogischi Uusbildig gmacht un het als Huushältere un in Fabrike gschafft. Anne 1944 het si de Ulrich Fausch ghirote, e Schlosser vo Buchs SG.

D Helen Bossert isch in eifache Verhältnis uufgwachse und hät sich müese durs Läbe kämpfe. Sogar politischi Problem het si gha. Für s Radiostudio Basel het si Hörspiil gschribe.

Will si 1953 uf e Studiereis in d Sowjetunion gfahre isch und wel ihre Maa e Kommunischt oder wenigschtens e kommunistische Sympatisant siig, isch si vom Radio Studio Basel nüm iiglade worde. Si het au Churzgschichtli gschribe und e bizli gschauspileret.

1988 het si dr Baselbieter Literaturbriis übercho. E baar vo ihre Gedicht ("Was wäiss e Möntsch vom andere?", "Frooge") si vom Peter Escher (1915–2008) in de 1990er Johr verdont worde.

Äs Gedicht

Ihri Gedicht decke ä ziemli wiiti Palette ab.

Was wäiss e Möntsch vom andere?

Was wäiss e Möntsch vom andere?

was wäiss e Möntsch vo mir? -

i kenn mi mängisch sälber nit,

ischs nit au so bi Dir?

Me gseht enand. Redt mitenand,

und glaubt enand z verstoh,

elläiggen inere stille Stund,

do chönne Zwyfel cho.

Wärwäisset. Suecht en Antwort druf

und isch doch uf der Flucht,

me drout den alte Fründe nümm.

s drennt äim e diefi Schlucht.

Was wäisse Möntsch vom andere?

was wäisse e Möntsch vo mir? -

i kenn mi mängisch sälber nit,

ischs nit au so bi Dir?

Quellä: A druckts Falltblatt zu Ihrem Abläbä. Copyright Vermerk: Dä Sohn, Alleinerb, Urheberrechtsbsizer, Johann Ulrich Fausch (wohnhaft in CH-1283 La Plaine bi Gämf), isch iiverschtandä, dass das Gedicht ins GNU-GFL chunnt.

Wärk

• Blüemli am Wäg, Gedichte in Baselbieter Mundart, Selbstverlag, 1. Uuflaag, 1942.
• Unterwägs, Selbstverlag, 2. Uuflaag, 1973. (Gedichtli)
• Hööchi Zyt... , Selbstverlag /4 Illustrationen & Gesamtherstellung von Gilbert Uebersax 1. Uuflaag, Basel 1971. (Gedichtli)
• Änedra, Literarische Schriftenreihe Baselland, Band VIII, 1972. (Ä Churzgschichtlisammlig)
• Hüüser, Selbstverlag, 1989. (Gedichtli)
• «Verstöhntder mi no?» Alemannische Gedichte von Johann Peter Hebel und Helene Bossert, Jonas Breitenstein, Albin Fringeli, Dieter Fringeli, Hans Gysin, Sophie Hämmerli-Marti, Paul Haller, Franz Hohler, Karl Loeliger, Kurt Marti, Traugott Meyer, Elisabeth Thommen, Marcel Wunderlin im Dialog mit Fotos von Rolf Frei. Basel 2003, ISBN 3-9520-698-8-4

Literatur

• Ruedi Epple: Helene Bossert. In: Historisches Lexikon vo dr Schwiiz.
• Stefan Hess, Rea Köppel (Hg.): Helene Bossert – Heimatdichtung und Hexenjagd (= Quellen und Forschungen zur Geschichte und Landeskunde des Kantons Basel-Landschaft, Bd. 112). Liestal: Verlag Baselland, 2024, ISBN 978-3-85673-811-2.

Weblink

• Helene Bossert: Zwei Gedichte: "Wünsch" und "Gigampfe" (1976), Website zu den Deutschschweizer Dialekten, Tonbeispiele aus der Nordwestschweiz, Südbaden und dem Elsass, www.dialekt.ch / www.schweizerdeutsch.ch
• Erinnerungen an die Mundartdichterin Helene Bossert (Site cha nüme abgrüeft wärde; Suche im Webarchiv)[5] [6] Vorlage:Toter Link/www.volksstimme.ch, Mit Märchenaugen und durch Tränenschleier hindurch, Volksstimme, Donnerstag, 4. März 1999 Nr. 26.
• Foti vo dr Helene Bossert